ປະລິມານນ້ຳໃນອ່າງເກັບນໍ້າເຂື່ອນນໍ້າງື່ມ 1 ຫຼຸດລົງເກືອບ 3 ເທົ່າ

521

ຈາກປະລິມານນ້ຳຝົນທີ່ມີໜ້ອຍ ແລະ ມາຂາດຊ່ວງໃນປີ 2019 ເຮັດໃຫ້ປະລິມານນ້ຳໃນອ່າງເກັບນ້ຳເຂື່ອນນ້ຳງື່ມ 1 ຫຼຸດລົງເກືອບ 3 ເທົ່າ ສາມາດຜະລິດໄຟຟ້າໄດ້ພຽງແຕ່ 40 ລ້ານກິໂລວັດໂມງເທົ່ານັ້ນ ຫາກທຽບກັບເດືອນສິງຫາ ໄລຍະດຽວກັນຂອງປີ 2018 ຜ່ານມາ ເຂື່ອນແຫ່ງນີ້ສາມາດຜະລິດກະແສໄຟຟ້າໄດ້ 100 ກວ່າລ້ານກິໂລວັດໂມງ. ແນວໃດກໍດີ, ເຂື່ອນດັ່ງກ່າວແມ່ນຈະໄດ້ສຸມໃສ່ພາກຂະຫຍາຍຢ່າງເຕັມທີ່ໃຫ້ສຳເລັດຕາມແຜນ.

ທ່ານ ສົມໃຈ ສີຈັນທະລາດ ຮອງຜູ້ອໍານວຍການເຂື່ອນໄຟຟ້ານໍ້າງື່ມ 1 ທີ່ຂຶ້ນກັບ ບໍລິສັດ ຜະລິດ – ໄຟຟ້າລາວ ມະຫາຊົນ ໃຫ້ສໍາພາດວ່າ: ເຂື່ອນນ້ຳງື່ມ 1 ເປັນເຂື່ອນໃຫຍ່ແຫ່ງທຳອິດທີ່ສ້າງຂຶ້ນໃນລາວ ຕັ້ງຢູ່ເມືອງແກ້ວອຸດົມ ແຂວງວຽງຈັນ, ມີເນື້ອທີ່ອ່າງໂຕ່ງ 8.460 ຕາລາງກິໂລແມັດ, ສາມາດກັກເກັບນໍ້າໄດ້ 7.030 ລ້ານແມັດກ້ອນ. ໃນນັ້ນ, 4.700 ລ້ານແມັດກ້ອນ ຖືກນໍາໃຊ້ເຂົ້າໃນການຜະລິດກະແສໄຟຟ້າ, ເຂື່ອນດັ່ງກ່າວສ້າງຂຶ້ນໃນປີ 1968 ແລະ ສໍາເລັດປີ 1971 ມີກໍາລັງຕິດຕັ້ງ 30 ເມກາວັດ, ຕໍ່ມາກໍໄດ້ມີການພັດທະນາຢ່າງຕໍ່ເນື່ອງເປັນໄລຍະສອງ 1976 – 1978 ໄດ້ເພີ່ມກໍາລັງຕິດຕັ້ງ 80 ເມກາວັດ, ໄລຍະທີສາມ 1983 – 1984 ໄດ້ເພີ່ມກໍາລັງຕິດຕັ້ງອີກ 40 ເມກາວັດ, ໄລຍະທີສີ່ 2016 – 2018 ໂຄງການກໍ່ສ້າງພາກຂະຫຍາຍຈັກເບີ 7 ແລະ ເບີ 8 ກໍາລັງການຕິດຕັ້ງ 80 ເມກາວັດ ແລະ ໄລຍະທີຫ້າ ໂຄງການກໍ່ສ້າງພາກຂະຫຍາຍຈັກເບີ 6 ມີກໍາລັງຕິດຕັ້ງ 40 ເມກາວັດ ຄາດວ່າຈະໃຫ້ສໍາເລັດໃນປີ 2021, ຫາກໂຄງການດັ່ງກ່າວສໍາເລັດເຂື່ອນໄຟຟ້ານໍ້າງື່ມ 1 ຈະມີກໍາລັງຕິດຕັ້ງທັງໝົດ 275 ເມກາວັດ ສາມາດຜະລິດກະແສໄຟຟ້າໄດ້ 1.140 ກິໂລວັດໂມງຕໍ່ປີ.

ທ່ານກ່າວຕື່ມວ່າ: ປັດຈຸບັນເຂື່ອນໄຟຟ້ານໍ້າງື່ມ 1 ມີກໍາລັງຕິດຕັ້ງທັງໝົດ 235 ເມກາວັດ ສາມາດຜະລິດກະແສໄຟຟ້າໄດ້ 1.085 ລ້ານກິໂລວັດໂມງຕໍ່ປີ ເຊິ່ງລະດັບນໍ້າເຕັມອ່າງສູງສຸດແມ່ນ 212 ກວ່າແມັດ ແລະ ຕໍ່າສຸດ 196 ແມັດ ທຽບໃສ່ລະດັບໜ້ານໍ້າທະເລ ເຊິ່ງບົດບາດສໍາຄັນແມ່ນຜະລິດພະລັງງານໄຟຟ້າເພື່ອຮັບໃຊ້ສັງຄົມ ໂດຍສະເພາະໃນນະຄອນຫຼວງວຽງຈັນ, ສ່ວນທີ່ເຫຼືອແມ່ນສົ່ງອອກໄປຍັງປະເທດເພື່ອນບ້ານ.

ຄຽງຄູ່ກັນນັ້ນ, ເຂື່ອນໄຟຟ້ານໍ້າງື່ມ 1 ຍັງມີບົດບາດໃນການຕ້ານແລ້ງ – ຕ້ານຖ້ວມ ໂດຍສະເພາະໃນລະດູຝົນ, ເຂື່ອນໄດ້ກັກເກັບນໍ້າໄວ້ເພື່ອຊ່ວຍຕ້ານຖ້ວມ ແລະ ລະບາຍນໍ້າລົງສູ່ສາຍນໍ້າງື່ມຕອນລຸ່ມໃນລະດູແລ້ງ ເຮັດໃຫ້ປະຊາຊົນທໍາການຜະລິດ – ຊົມໃຊ້ນໍ້າຕະຫຼອດປີ, ແຕ່ໃນກໍລະນີທີ່ເກີດນໍ້າຖ້ວມແມ່ນເກີດຈາກການໄຫຼໂຮມບັນດາສາຍນໍ້າຕ່າງໆທີ່ປ່ອງເຂົ້າສູ່ນໍ້າງື່ມຕອນລຸ່ມ ແລະ ຝົນຕົກສະສົມຈຶ່ງເປັນທີ່ມາເຮັດໃຫ້ນໍ້າຖ້ວມ.

ມາຮອດວັນທີ 27 ສິງຫາ 2019 ນ້ຳໃນອ່າງນ້ຳງື່ມ 1 ມີປະມານ 3.956 ລ້ານແມັດກ້ອນ ຄິດເປັນ 55,66% ຂອງປະລິມານນ້ຳເຕັມອ່າງ, ປັດຈຸບັນເຂື່ອນໄຟຟ້ານໍ້າງື່ມ 1 ແລ່ນເຄື່ອງຈັກພຽງແຕ່ 1 ໜ່ວຍເທົ່ານັ້ນ ໂດຍປ່ອຍນໍ້າອອກຈາກເຂື່ອນ 120 ແມັດກ້ອນຕໍ່ວິນາທີ ເຊິ່ງທຽບໃສ່ກັບໄລຍະດຽວກັນຂອງປີຜ່ານມາແມ່ນແລ່ນເຕັມ 7 ເຄື່ອງ ແລະ ປ່ອຍນໍ້າ 700 ແມັດກ້ອນຕໍ່ວິນາທີ. ນອກຈາກເຂື່ອນໄຟຟ້ານ້ຳງື່ມ 1 ແລ້ວ ຍັງມີເຂື່ອນໄຟຟ້ານໍ້າງື່ມ 2 ແລະ ເຂື່ອນໄຟຟ້ານໍ້າງື່ມ 5 ທີ່ຕັ້ງຢູ່ທາງຕອນເທິງຂອງເຂື່ອນໄຟຟ້ານ້ຳງື່ມ 1 ແລະ ມີບັນດາເຂື່ອນຕ່າງໆທີ່ກຳລັງຢູ່ໃນໄລຍະການກໍ່ສ້າງ ເຊັ່ນ: ເຂື່ອນນໍ້າງື່ມ 3 ສໍາເລັດແລ້ວ 30% ແລະ ຍັງມີເຂື່ອນນໍ້າງື່ມ 4 ທີ່ຈະມີຂຶ້ນໃນອະນາຄົດຕື່ມອີກ.

ຈາກການລົງພື້ນທີ່ຕົວຈິງຂອງສື່ມວນຊົນໃນອາທິດຜ່ານມາ ພົບວ່າປະລິມານນໍ້າຝົນທີ່ໄຫຼເຂົ້າອ່າງນໍ້າງື່ມ ແມ່ນມີໜ້ອຍກວ່າປີທີ່ຜ່ານມາ ຈຶ່ງເຮັດໃຫ້ລະດັບນ້ຳໃນອ່າງຢູ່ໃນເກນປົກກະຕິ ແລະ ຢູ່ໃນການຕິດຕາມຢ່າງໃກ້ຊິດຂອງໜ່ວຍງານຜູ້ຊ່ຽວຊານໃນການບໍລິຫານຈັດການນໍ້າຂອງເຂື່ອນນໍ້າງື່ມ 1. ພ້ອມດຽວກັນນີ້, ຜູ້ບໍລິຫານຂອງ ຜ – ຟຟລ ພ້ອມດ້ວຍຜູ້ບໍລິຫານຂອງເຂື່ອນ ໄດ້ປະຊຸມ ແລະ ວາງແຜນປະສານສົມທົບກັບອຳນາດການປົກຄອງ ແລະ ປະຊາຊົນທ້ອງຖິ່ນທີ່ອາໄສຕາມສາຍນ້ຳງື່ມຕອນລຸ່ມ ເພື່ອບໍ່ໃຫ້ເກີດຜົນກະທົບ ຫຼື ໃຫ້ກະທົບໜ້ອຍທີ່ສຸດໃນເວລາມີການລະບາຍນ້ຳອອກຈາກເຂື່ອນ ກໍລະນີຫາກມີປະລິມານນໍ້າທີ່ເກີນກວ່າລະດັບມາດຕະຖານ.