ເຈົ້າໜ້າທີ່ ເມືອງວຽງພູຄາ ລົງກວດກາ ສິນຄ້ານຳເຂົ້າບໍ່ຖືກຕ້ອງ ພ້ອມທຳລາຍຖິ້ມ

572

ໃນວັນ 20 ສິງຫາ 2019 ຜ່ານມາ ຫ້ອງການອຸດສາຫະກຳ ແລະ ການຄ້າ ເມືອງວຽງພູຄາ ແຂວງ ຫຼວງນໍ້າທາ ຮ່ວມກັບ ຫ້ອງການຖະແຫຼງຂ່າວ ວັດທະນະທຳ ແລະ ທ່ອງທ່ຽວ ເມືອງ ແລະ ປກສ ເມືອງ ລົງກວດກາ ຈານດາວທຽມ ທີ່ນໍາເຂົ້າບໍ່ຖືກຕ້ອງ ເຊີ່ງນໍາພາໂດຍ ທ່ານ ຄໍາມ່ວນ ແອ່ບຸນເຫຼືອງ ຮອງຫົວໜ້າຫ້ອງການ ອຸດສາຫະກຳ ແລະ ການຄ້າເມືອງ

ໂດຍປະຕິບັດຕາມແຈ້ງການຂອງກະຊວງອຸດສາຫະກຳ ແລະ ການຄ້າ ເລກທີ 1398/ຫອກ.ກຄພນ ວັນທີ 11 ກໍລະກົດ 2019 ແລະ ແຈ້ງການຂອງພະແນກອຸດສາຫະກຳ ແລະ ການຄ້າແຂວງ ຫຼວງນໍ້າທາ ເລກທີ 483/ພອຄ ນທ ລົງວັນທີ 18 ສິງຫາ 2019 ກ່ຽວກັບການຈັດຕັ້ງປະຕິບັດຕິດຕາມກວດກາການນຳຂົ້າ ແລະ ຈຳໜ່າຍ, ຊຸດອຸປະກອນຮັບສັນຍານໂທລະພາບ ຜ່ານຈານດາວທຽມຢູ່ ສປປລາວ.

ສວ່ນຈານດາວທຽມທີ່ນຳເຂົ້າບໍ່ຖືກຕ້ອງໂດຍທາງເຈົ້າໜ້າທີ່ ຫ້ອງການອຸດສາຫະກໍາ ແລະ ການຄ້າເມືອງ ຮ່ວມກັບ ຂະແໜ່ງການກ່ຽວຂ້ອງຂອງເມືອງໄດ້ກວດພົບເຫັນເຊັ່ນ: ຈານ DTV. IPM. PSI ຈໍານວນ 14 ຈານ, ຫົວດີສີເວີ ຈໍານວນ 10 ຫົວ, ຫົວຮັບສັນຍານຈານດາວທຽມ 1 ຫົວ, ລວມທັງໝົດ 25 ລາຍການ, ຄິດເປັນມູນຄ່າ 2.950 000 ກີບ, ສິນຄ້າດັ່ງກ່າວໄດ້ລະເມີດການຄຸ້ມຄອງການຄ້າ ແລະ ບໍ່ໄດ້ຮັບອະນຸຍາດ ແລະ ນໍາເຂົ້າບໍ່ຖືກຕ້ອງ, ຈິ່ງໄດ້ຍຶດສິນຄ້າດັ່ງກ່າວໄວ້ ແລະ ເອົາໄປທຳລາຍຖິ້ມ.

ທ່ານ ຄຳມ່ວນ ແອ່ບຸນເຫຼືອງ ຮອງຫົວໜ້າຫ້ອງການ ອຸດສາຫະກຳ ແລະ ການຄ້າເມືອງ ແລະ ຂະແໜງການກ່ຽວຂ້ອງໄດ້ອະທິບາຍ, ກ່າວເຕືອນສຶກສາອົບຮົມຕໍ່ຜູ້ຄ້າຂາຍ ບໍ່ໃຫ້ນໍາເອົາສິນຄ້າທີ່ຕ້ອງຫ້າມ, ສິນຄ້າລອກແບບທີ່ບໍ່ຖືກຕ້ອງທຸກປະເພດເຂົ້າມາຈຳໜ່າຍ ເພາະເປັນການຜິດຕໍ່ລະບຽບກົດໝາຍຂອງການຄ້າວາງອອກ

ທີ່ມາ: ຂ່າວສານຫຼວງນໍ້າທາ