ບ້ານຈອມແຈ້ງ ສາມັກຄີກັນທຳລາຍບ່ອນເພາະພັນຍຸງລາຍ

390

ເມື່ອເຊົ້າຂອງວັນທີ 23 ສິງຫາ 2019 ນີ້, ປະຊາຊົນ​ບ້ານຈອມແຈ້ງ ເມືອງ​ຫົງ​ສາ ແຂວງ ໄຊຍະບູລີ ​ໄດ້ສ້າງຂະບວນການອອກແຮງງານລວມ ໂດຍການຊີ້ນຳ-ນຳພາຂອງທ່ານ ຄຳສຸກ ພັນລັກທຳ ຫົວ​ໜ້າ​ອົງການໄອຍະການປະຊາຊົນເຂດ III ພະນັກງານລົງຊີ້ນໍາວຽກງານຂະບວນການປະຈຳບ້ານຈອມແຈ້ງ,​ ມີທ່ານ ຈັນ ສີສັງວອນ ນາຍບ້ານຈອມແຈ້ງ, ພ້ອມດ້ວຍປະຊາຊົນ​ພາຍໃນ​ບ້ານເຂົ້າຮ່ວມ.

ການອອກແຮງງານລວມໃນຄັ້ງນີ້ ແມ່ນໄດ້ອານາໄມຕັດຫຍ້າ, ຂຸດຮ່ອງລະບາຍນໍ້າ ແລະ​ ຖົມດິນ ຕາມເສັ້ນທາງທີ່ເປັນບວກເປັນຂຸມ ບໍລິເວນຫ້ອງການບ້ານ, ວັດ,ໂຮງຮຽນ ແລະ ບ່ອນອື່ນໆ ໃນຂອບເຂດບ້ານຂອງຕົນ.

 ຈຸດປະສົງຂອງການອອກແຮງງານລວມໃນຄັ້ງນີ້ ເພື່ອທໍາລາຍບ່ອນເພາະພັນຂອງຍຸງ, ປ້ອງກັນການລະບາດຂອງພະຍາດໄຂ້ຍຸງລາຍ, ແກ້ໄຂບັນຫານໍ້າຖ້ວມຂັງ ເນື່ອງຈາກຮ່ອງລະບາຍນໍ້າອຸດຕັນ, ຫຼຸດຜ່ອນການເກີດອຸບັດຕິເຫດຕາມທ້ອງຖະໜົນ, ຍ້ອນທາງເປັນຂຸມ, ເປັນບວກ. ພ້ອມທັງເປັນການສ້າງຂະບວນການເພື່ອຂໍ່ານັບຮັບຕ້ອນກອງປະຊຸມໃຫຍ່ ຄັ້ງທີVIII ຂອງອົງຄະນະພັກເມືອງຫົງສາ, ທີ່ຈະໄຂຂຶ້ນໃນຕໍ່ໜ້ານີ້ອີກດ້ວຍ.