ແຂວງບໍ່ແກ້ວ ມອບເງິນກວ່າ 80 ລ້ານກີບ ໃຫ້ພະນັກງານ ກ່ອນຮັບບຳນານ

339

ເມື່ອກາງເດືອນ ສິງຫາ 2019 ຜ່ານມາ,ກອງບັນຊາການທະຫານ ແຂວງບໍ່ແກ້ວ ໄດ້ຈັດພິທີມອບ – ຮັບ ເງິນນະໂຍບາຍກ່ອນຮັບບໍານານແລະ ເງິນອຸດໜູນ ໃຫ້ແກ່ບັນດາພະນັກງານອາວຸໂສ ໂດຍການເຂົ້າຮ່ວມ ແລະ ເປັນປະທານຂອງທ່ານພັນໂທ ບຸນມີ ພາມີໄຊ ຄະນະປະຈຳພັກ ຫົວໜ້າຫ້ອງການເມືອງ ກອງບັນຊາການທະຫານແຂວງບໍ່ແກ້ວ, ມີຄະນະພັກ-ຄະນະບັນຊາອົງການ, ພະແນກການທີ່ກ່ຽວຂ້ອງຕະຫຼອດຮອດພະນັກງານທີ່ຮັບບຳນານເຂົ້າຮ່ວມ.

ໃນພິທີ ພັນຕີ ມານິດ ຈັນສີ ຮອງພະແນກພະນັກງານທະຫານແຂວງບໍ່ແກ້ວ ໄດ້ຂຶ້ນຜ່ານຂໍ້ຕົກລົງຂອງກະຊວງປ້ອງກັນປະເທດ, ຕາມກົດໝາຍວ່າດ້ວຍນາຍທະຫານກອງທັບປະຊາຊົນລາວ (ສະບັບປຸງໃໝ່) ໃນພາກທີ III ໝວດທີ 4, ມາດຕາ 33, ການພັກບໍານານ ເຊິ່ງມີຈຳນວນ 4 ສະຫາຍ, ຍິງ 1 ສະຫາຍ, ເປັນກຽດຂຶ້ນມອບເງິນອຸດໜູນບຳນານ ໂດຍທ່ານ ພັນໂທ ບຸນມີ ພາມີໄຊ ຄະນະປະຈຳພັກ ຫົວໜ້າຫ້ອງການເມືອງ ກອງບັນຊາການທະຫານແຂວງບໍ່ແກ້ວຂື້ນ ເງິນທີ່ນໍາມາມອບໃຫ້ພະນັກງານອອກບຳນານໃນຄັ້ງນີ້ ມີທັງໝົດ 85.987.000 ກີບ (ແປດສິບຫ້າລ້ານເກົ້າແສນແປດສິບເຈັບພັນກີບ).

ໃນພິທີ ຫົວໜ້າຫ້ອງການເມືອງ ກອງບັນຊາການທະຫານແຂວງບໍ່ແກ້ວກໍໄດ້ຍ້ອງຍໍຊົມເຊີຍຕໍ່ຜົນງານທີ່ບັນດາສະຫາຍໄດ້ປະກອບສ່ວນເຂົ້າໃນພາລະກິດປົກປັກຮັກສາ ແລະ ສ້າງສາປະເທດຊາດ ເວົ້າລວມ, ເວົ້າສະເພາະແມ່ນຢູ່ກອງບັນຊາການ ທະຫານແຂວງບໍ່ແກ້ວ ໄດ້ມີຄວາມເຕີບໃຫຍ່ເຂັ້ມແຂງມາເປັນກ້າວໆ ແລະ ຍັງໄດ້ຮຽກຮ້ອງໃຫ້ພະນັກງານອາວຸໂສພັກການຮັບເບ້ຍບຳນານຈົ່ງສືບຕໍ່ເປັນ ທີ່ປຶກສາໃຫ້ແກ່ອຳນາດການປົກຄອງທ້ອງຖິ່ນໃນຮາກຖານ ແລະ ສຶກສາອົບຮົມການເມືອງ-ນຳພາແນວຄິດໃຫ້ແກ່ພໍ່ແມ່ປະຊາຊົນ, ໃຫ້ມີຄວາມຮັບຮູ້ເຊື່ອມຊຶມຕໍ່ແນວທາງປ້ອງກັນຊາດ-ປ້ອງກັນຄວາມສະຫງົບທົ່ວປວງຊົນຮອບດ້ານ.