ມອບອຸປະກອນການແພດໃຫ້ສຸກສາລາ ຫ້ວຍຊາຍນ້ອຍ ແລະ ບ້ານພູຫວານໃຕ້

419

ເພື່ອເຮັດໃຫ້ວຽກງານ ສາທາລະນະສຸກຢູ່ໃນເຂດບ້ານຈຸດສຸມພັດທະນາຂອງເມືອງ ມີຄວາມເຂັ້ມແຂງ ສາມາດເອື້ອອຳນວຍຄວາມສະດວກ, ເຂົ້າໃນການບໍລິການປິ່່ນປົວສຸຂະພາບຂອງປະຊາຊົນບັນດາເຜົ່າ ເວົ້າລວມ ເວົ້າສະເພາະ ແມ່ນແມ່ຍິງ ແລະ ເດັກນ້ອຍໃຫ້ນັບມື້ດີຂຶ້ນ, ມີອຸປະກອນຮັບໃຊ້ທີ່ແທດເໝາະກັບຄວາມຮຽກຮ້ອງຕ້ອງການຕົວຈິງ ທັງຮັບປະກັນດ້ານປະລິມານ ແລະ ຄຸນນະພາບ.

ດັ່ງນັ້ນ, ທາງສະມາຄົມສົ່ງເສີມຄວາມຮູ້ ເພື່ອການພັດທະນາຊົນນະບົດແບບມີສ່ວນຮ່ວມ ປະຈຳແຂວງບໍ່ແກ້ວ ຄົ້ນຄວ້າສູ້ຊົນຂໍທຶນການຊ່ວຍເຫຼືອລ້າ ນຳບັນດາອົງການສາກົນ ທີ່ເຄື່ອນໄຫວຢູ່ໃນສປປ ລາວ ຢ່າງຕໍ່ເນື່ອງ ແລະ ໄດ້ຮັບການສະໜອງທຶນຊ່ວຍເຫຼືອລ້າຈຳນວນໜຶ່ງ ມາຈັດຊື້ອຸປະກອນການແພດປະກອບມີ ຕຽງປະສູດ 1 ຊຸດ, ໂຕະພັບກວດແມ່ມານແບບເຄື່ອນທີ່ 2 ໜ່ວຍ, ເຄື່ອງຟັງສຽງເຕັ້ນຫົວໃຈເດັກນ້ອຍ 1 ຊຸດ, ຊິງຊັງນ້ຳໜັກ 2 ໜ່ວຍ, ໄມ້ແມັດແທກລວງສູງ 2 ອັນ, ຜ້າກັ້ງ 1 ຊຸດ, ລໍ້ຍູ້ຮັບໃຊ້ຄົນເຈັບ 2 ຄັນ, ໂຄມໄຟຮັບໃຊ້ໃນຫ້ອງປະສູດ 2 ຊຸດ, ເຄື່ອງວັດແທກຕັງຊົງ 2 ຊຸດ, ບັ້ງອົກຊີແຊນ 2 ຊຸດ, ຊຸດປະສູດລູກສຳລັບແມ່ຫົວສາວ 2 ຊຸດ, ຕັ່ງສຳລັບຄົນເຈັບນັ່ງລໍຖ້າການກວດ 2 ຊຸດ ແລະ ອື່ນໆ ລວມມູນຄ່າທັງໝົດ 57 ລ້ານກວ່າກີບ ໂດຍແມ່ນທຶນຊ່ວຍເຫຼືອລ້າຈາກ ສະຖານທູດປະເທດອົດສະຕາລີ ປະຈຳລາວ.

ສະນັ້ນ, ໃນວັນທີ 14 ສິງຫາ 2019 ຜ່ານມາ ໄດ້ຈັດພິທີມອບ-ຮັບ ອຸປະກອນການແພດດັ່ງກ່າວ ຢູ່ສຸກສາລາບ້ານຫ້ວຍຊາຍນ້ອຍ ໂດຍການເຂົ້າຮ່ວມມີທ່ານ ຄຳລັງ ທະຍານິນ  ຫົວໜ້າຫ້ອງການສາທາລະນະສຸກເມືອງ, ທ່ານ ນາງ ສອນໄຊ ທະວີວົງໄຊ ປະທານສະມາຄົມ ສົ່ງເສີມຄວາມຮູ້ ເພື່ອການພັດທະນາຊົນນະບົດແບບມີສ່ວນຮ່ວມ, ມີບັນດາຄະນະພັກຜູ້ຊີ້ນຳກຸ່ມບ້ານ, ຫົວໜ້າ-ຮອງຫົວໜ້າສຸກສາລາ, ແຂກຖືກເຊີນ, ຫ້ອງການທີ່ກ່ຽວຂ້ອງ, ອຳນາດການປົກຄອງບ້ານ ແລະ ພະນັກງານແພດໝໍ ເຂົ້າຮ່ວມ

ໃນພິທີ ທ່ານ ຈິກ ຄຳທະວົງ ຮອງປະທານສະມາຄົມສົ່ງເສີມຄວາມຮູ້ເພື່ອການພັດທະນາຊົນນະບົດແບບມີສ່ວນຮ່ວມ ປະຈຳແຂວງບໍ່ແກ້ວ ໄດ້ຜ່ານບົດບັນທຶກການ ມອບ-ຮັບ ອຸປະກອນການແພດ ຮ່ວມລົງນາມມອບໂດຍ ທ່ານ ນາງ ພອນໄຊ ທະວີວົງໄຊ ແລະ ຮັບໂດຍທ່ານ ບຸນປັນ ດວງວິຈິດ ຫົວໜ້າສຸກສາລາ ຫ້ວຍຊາຍນ້ອຍ ແລະ ທ່ານ ນາງ ສົມຈັນ ແກ້ວສົມດີ ຮອງຫົວໜ້າສຸກສາລາ ບ້ານພູຫວານໃຕ້

ໂອກາດນີ້, ທ່ານ ຄຳລັງ ທະຍານິນ ໄດ້ກ່າວສະແດງຄວາມດີໃຈ ແລະ ຂອບໃຈເປັນຢ່າງຍິ່ງ ຕໍ່ການສະໜັບສະໜູນໃຫ້ການຊ່ວຍເຫຼືອຈາກລັດຖະບານຂອງປະເທດ ອົດສະຕາລີ ກໍ່ຄື ສະມາຄົມ ສົ່ງເສີມຄວາມຮູ້ ເພື່ອພັດທະນາຊົນນະບົດ ແບບມີສ່ວນຮ່ວມປະຈຳແຂວງບໍ່ແກ້ວ ແລະ ຈະຊີ້ນຳໆການນຳໃຊ້ອຸປະກອນການແພດດັ່ງກ່າວ ເຂົ້າໃນການບໍລິການປິ່ນປົວ ແລະ ຮັກສາສຸຂະພາບຂອງປະຊາຊົນບັນດາເຜົ່າໃຫ້ເກີດຜົນປະໂຫຍດສູງສຸດ.