ຮອງລັດຖະມົນຕີ ຖວທ ລົງຢ້ຽມຄົນເຈັບ ແລະ ບ່ອນເກີດເຫດລົດເມຕົກເຫວ, ສ່ວນດ້ານການສອບສວນມອບໃຫ້ເຈົ້າໜ້າທີ່

452

ທ່ານ ອຸ່ນທວງ ຂາວພັນ ຮອງລັດຖະມົນຕີກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ (ຖວທ) ພ້ອມດ້ວຍຄະນະ ໄດ້ລົງຢ້ຽມຢາມ ຜູ້ໄດ້ຮັບບາດເຈັບ ແລະ ສະຖານທີ່ເກີດອຸບັດຕິເຫດລົດເມຕົກເຫວຢູ່ເສັ້ນທາງ ກາສີ-ເມືອງນານ ໃນຕອນບ່າຍວັນທີ 21 ສິງຫາ 2019.

ທ່ານ ອຸ່ນທວງ ຂາວພັນ ໄດ້ກ່າວວ່າ: ໃນນາມສ່ວນຕົວ ກໍຄືໃນນາມ ກະຊວງ ຖະແຫລງຂ່າວ ວັດທະນະທຳ ແລະ ທ່ອງທ່ຽວ ຮູ້ສຶກເສຍໃຈເປັນຢ່າງຍິ່ງຕໍ່ກັບເຫດ ການທີ່ບໍ່ຄາດຝັນຄັ້ງນີ້ ເຊິ່ງທາງພວກເຮົາ, ປະຊາຊົນລາວ ກໍຄື ການ ນຳ ບໍ່ມີໃຜຢາກໃຫ້ເກີດເຫດການແບບນີ້ ເພາະການໄປທ່ຽວແລ້ວ ເກີດອຸບັດຕິເຫດ, ແຕ່ວ່າພາຍຫລັງທີ່ໄດ້ລາຍງານຕໍ່ການນຳຂອງ ກະຊວງ ທາງກະຊວງກໍໄດ້ມີການແຕ່ງຕັ້ງໃຫ້ຂ້າພະເຈົ້າລົງມາ ສົມທົບກັບທ້ອງຖິ່ນ ກໍຄື ແຂວງຫລວງພະບາງ ແລະ ກົງສູນຈີນ ປະຈຳແຂວງ ເພື່ອຮ່ວມກັນແກ້ໄຂບັນຫາໂດຍໄດ້ແຕ່ງຕັ້ງຄະນະ ຮັບຜິດຊອບແກ້ໄຂບັນຫາ ໂດຍສະເພາະເນັ້ນໃສ່ໃນການຊ່ວຍເຫລືອ ຜູ້ທີ່ປະສົບອຸປະຕິເຫດ ຜູ້ທີ່ເສຍຊີວິດ ກໍຄືຜູ້ທີ່ໄດ້ຮັບບາດເຈັບ ພວກເຮົາກໍໄດ້ໄປຢ້ຽມຢາມ ສ່ວນທາງທ້ອງຖິ່ນກໍໄດ້ຕັ້ງໜ້າປະຕິບັດ ໜ້າທີ່ສຸດຄວາມສາມາດໃນການກອບກູ້ຊ່ວຍເຫລືອຜູ້ປະສົບໄພ ໃນຄັ້ງນີ້ ທາງສູນກາງກໍໄດ້ຕິດຕາມເປັນແຕ່ໄລຍະ. ພາກສ່ວນທີ່ກ່ຽວ ທັງໝົດກໍໄດ້ສືບຕໍ່ປະຕິບັດ ແລະ ເຊົ້າມື້ນີ້ກໍໄດ້ໄປຢ້ຽມຢາມເພື່ອ ໃຫ້ກຳລັງໃຈຜູ້ທີ່ໄດ້ຮັບບາດເຈັບ.

ສຳລັບເຫດການຄັ້ງນີ້ບໍ່ມີໃຜຢາກໃຫ້ເກີດຂຶ້ນ ແຕ່ໃນເມື່ອເກີດແລ້ວ ຈະໄດ້ເອົາເປັນບົດຮຽນເພື່ອສຶກສາເບິ່ງວ່າສາເຫດເກີດຍ້ອນຫຍັງ ສ່ວນສາເຫດຂອງການເກີດອຸປະຕິເຫດຄັ້ງນີ້ ແມ່ນໄດ້ມອບໃຫ້ ເຈົ້າໜ້າທີ່ດຳເນີນການສອບສວນ ແລະ ພາກສ່ວນພວກເຮົາແມ່ນ ຈະໄດ້ອຳນວຍຄວາມສະດວກທາງດ້ານການບໍລິການຂົນສົ່ງຕ່າງໆ ແລະ ແນ່ນອນວ່າທາງພັກ-ລັດກໍ່ຈະປຶກສາຫາລືເພື່ອຫາຊ່ອງທາງ ແກ້ໄຂໃຫ້ດີຂຶ້ນເທື່ອລະກ້າວ.

ຂໍ້ມູນຈາກ: CRI, ຂ່າວ: ນ.ດາ. ພາບ: ທ.ຍາວ