ຫຼາຍພື້ນທີ່ໃນນະຄອນຫຼວງມີນໍ້າຖ້ວມຂັງ ຫຼັງຝົນຕົກໜັກຕິດຕໍ່ກັນຫຼາຍຊົ່ວໂມງ

354

ນັບແຕ່ກ້າວເຂົ້າສູ່ເດືອນ ສິງຫາ ຈະສັງເກດເຫັນມີຝົນຕົກຢ່າງຕໍ່ເນື່ອງ ໂດຍສະເພາະໃນລະຫວ່າງວັນທີ 1-5 ສິງຫາ, ກາງຄືນຂອງວັນທີ 17 ສິງຫາ ແລະ ຫຼ້າສຸດໃນວັນທີ 20 ສິງຫາ ນັບແຕ່ທ່ຽງຄືນຈົນຮອດ ຕອນເຊົ້າວັນທີ 21 ສິງຫາ 2019 ຫຼາຍພື້ນທີ່ໃນນະຄອນຫຼວງວຽງຈັນເກີດມີຝົນຕົກໜັກ ສົ່ງຜົນເຮັດໃຫ້ນ້ຳຖ້ວມຂັງຢູ່ຫຼາຍບ່ອນເປັນຕົ້ນແມ່ນ: ເສັ້ນທາງການສັນຈອນຫຼາຍເສັ້ນຖືກນໍ້າຖ້ວມ ເນື່ອງຈາກວ່າຮ່ອງລະບາຍນ້ຳໄຫຼບໍ່ທັນ ແລະ ບາງບ່ອນມີການອຸດຕັນ ເຮັດໃຫ້ເກີດມີນ້ຳຂັງອັ່ງ ສ້າງຄວາມລຳບາກຕໍ່ການໄປ-ມາຂອງປະຊາຊົນຫຼາຍບ້ານ. ນອກນັ້ນ, ບ້ານເຮືອນຂອງປະຊາຊົນຈຳນວນໜຶ່ງຢູ່ເຂດບ້ານໜອງບົວທອງ ເມືອງສີໂຄດຕະບອງ ນະຄອນຫຼວງວຽງຈັນ ກໍ່ປະສົບກັບໄພນໍ້າຖ້ວມຂັງເຊັ່ນດຽວກັນ.

ທ່ານ ທະວີໄຊ ໄຊປະເສີດ ຫົວໜ້າຫ້ອງການໂຍທາທິການ ແລະ ຂົນສົ່ງ ເມືອງໄຊເສດຖາ ໃຫ້ຮູ້ວ່າ: ບັນຫານ້ຳອັ່ງອໍໃນຕົວເມືອງ ໂດຍສະເພາະເຂດທີ່ຢູ່ຕ່ຳເຊັ່ນ: ຖະໜົນເຕ 4 ເວລາຝົນຕົກຕິດຕໍ່ກັນຫຼາຍຊົ່ວໂມງຈະເຮັດໃຫ້ນ້ຳທີ່ໄຫຼລົງມາຈາກເຂດສູງທາດຫຼວງ, ນາໄຊ, ໂພນສີນວນ ແລະ ໂພນທັນ ທີ່ລະບາຍລົງທໍ່ບໍ່ທັນກໍຈະໄຫຼມາຕາມເສັ້ນທາງ ຜ່ານມາຈະເຫັນວ່າບ່ອນທີ່ມີນ້ຳອັ່ງຫຼາຍກວ່າໝູ່ແມ່ນໄຟແດງທາດຫຼວງ, ໄຟແດງໂພນທັນເປັນຕົ້ນ ເມື່ອນ້ຳມາຫຼາຍເກີນໄປໃນເວລາດຽວກັນຈະເຮັດໃຫ້ນ້ຳໄຫຼລົງທໍ່ລະບາຍນ້ຳບໍ່ທັນຈຶ່ງມັກພົບເຫັນຢູ່ເຂດໄຟແດງທາດຫຼວງເປັນປະຈຳ. ຂະນະທີ່ພາກສ່ວນທີ່ກ່ຽວຂ້ອງກໍໄດ້ລົງແກ້ໄຂຢ່າງຕໍ່ເນື່ອງແຕ່ກໍຍັງບໍ່ໄດ້ຮັບຜົນເທົ່າທີ່ຄວນ.

ສະເພາະໃນປີ 2018 ຍທຂ ນະຄອນຫຼວງວຽງຈັນ ໄດ້ໃຊ້ງົບປະມານ 5 – 6 ຕື້ກີບ ເຂົ້າໃນການແກ້ໄຂເສັ້ນທາງໃນລະດູຝົນ ເຊິ່ງເຫັນວ່າຕົວເລກດັ່ງກ່າວຍັງມີໜ້ອຍຫາກທຽບກັບຄວາມເປັນຈິງທີ່ຕ້ອງການ. ທັງນີ້, ຫາກຈະແກ້ໄຂບັນຫານ້ຳອັ່ງອໍໃນນະຄອນຫຼວງຢ່າງຖາວອນນະຄອນຫຼວງ ຕ້ອງໄດ້ໃຊ້ງົບປະມານຢ່າງມະຫາສານເຊັ່ນ: ການຂະຫຍາຍທໍ່ລະບາຍນ້ຳໃຫ້ກວ້າງອອກ, ເພີ່ມແລວທໍ່ລະບາຍນ້ຳລົງສູ່ບຶງທາດຫຼວງ ແລະ ອື່ນໆ. ສະນັ້ນ, ໃນເວລານີ້ກໍຕ້ອງໄດ້ອົດທົນນຳກັນ ລໍຖ້າຈົນກວ່ານະຄອນຫຼວງ ຈະຍົກບັນຫານີ້ຂຶ້ນມາແກ້ໄຂຢ່າງຈິງຈັງ.