ຝົນຕົກແຮງເມືອງແບ່ງກະທົບ 100 ກວ່າຄອບຄົວ ສ່ວນລະດັບນ້ຳຢູ່ຂົວເຊບັ້ງໄຟກາຍເຂດລະວັງໄພ

352

ວັນທີ 17 ສິງຫາຜ່ານມາ ຝົນຕົກໜັກຢູ່ຫຼາຍແຂວງສົ່ງຜົນໃຫ້ມີນໍ້າໄຫຼນອງຖ້ວມເນື້ອທີ່ການຜະລິດ, ເຮືອນຊານບ້ານຊ່ອງ ລວມເຖິງພື້ນຖານໂຄງລ່າງ ໂດຍສະເພາະເມືອງແບ່ງ ແຂວງອຸດົມໄຊ ປະຊາຊົນໄດ້ຮັບຜົນກະທົບ 100 ກວ່າຄອບຄົວ. ຂະນະທີ່ລະດັບນ້ຳຢູ່ຂົວເຊບັ້ງໄຟ ແຂວງຄຳມ່ວນ ໃນວັນທີ 19 ສິງຫາ  ກາຍເຂດລະວັງໄພແລ້ວ.

ອີງຕາມການລາຍງານຂອງນັກຂ່າວທ້ອງຖິ່ນ ໃຫ້ຮູ້ວ່າ: ບັນດາບ້ານ, ສຳນັກງານອົງການ ທີ່ໄດ້ຮັບຜົນກະທົບໜັກມີ: ໂຮງໝໍເມືອງ ຖືກນໍ້າຖ້ວມອຸປະກອນການແພດໄດ້ຮັບຄວາມເສຍຫາຍ, ມີບ້ານຫ້ວຍລາ ນໍ້າຖ້ວມເຮືອນ. ໃນນັ້ນ, ນໍ້າເຊາະເຈື່ອນເຮືອນ ຈຳນວນ 1 ຫຼັງ; ບ້ານນາຫ້ວຍ ເຮືອນຖືກນໍ້າເຊາະເຈື່ອນເສຍຫາຍ 5 ຫຼັງ. ໃນນີ້, ເຊາະເຈື່ອນຫາຍໄປກັບນໍ້າ 2 ຫຼັງ; ບ້ານທ່າກາດ ນໍ້າຖ້ວມເຮືອນປະຊາຊົນ ແລະ ຫຼາຍບ້ານເຂດລຽບທາງຫຼວງແຫ່ງຊາດ, ເນື້ອທີ່ນາເຂດລ່ອງນໍ້າແບ່ງ, ນໍ້າຫາວ, ເຂດນາໂຮມ ຫຼາຍບ້ານຖືກນໍ້າຖ້ວມ, ເຊາະເຈື່ອນເສັ້ນທາງເຂດນາໂຮມ ຂາດ 3 ຈຸດ, ຂົວນໍ້າຫາວທາງເລກ 2 w ຖືກເຊາະເຈື່ອນ, ນໍ້າປະປາໃນເທສະບານເມືອງຖືກຕັດຂາດ, ໜອງປາ, ສັດລ້ຽງຂອງປະຊາຊົນຈຳນວນໜຶ່ງຖືກເສຍຫາຍ ສ່ວນປະຊາຊົນແມ່ນປອດໄພບໍ່ມີຜູ້ໄດ້ຮັບບາດເຈັບ ຫຼື ເສຍຊີວິດ ຈາກເຫດການດັ່ງກ່າວ ທາງເມືອງກໍໄດ້ຈັດສົ່ງກຳລັງທະຫານ, ຕຳຫຼວດ, ພະນັກງານ – ລັດຖະກອນ ລົງຊ່ວຍເຫຼືອປະຊາຊົນທີ່ໄດ້ຮັບຜົນກະທົບ ແລະ ສ່ວນລາຍລະອຽດຜົນເສຍຫາຍຈະລາຍງານໃຫ້ທ່ານຮັບຊາບຕາມພາຍຫຼັງ.

ມາຮອດຕອນແລງຂອງວັນທີ 18 ສິງຫາ 2019 ຕາງໜ້າການນຳຂັ້ນແຂວງ ກໍຄືຫ້ອງວ່າການແຂວງ ແລະ ພະແນກແຮງງານ ແລະ ສະຫວັດດີການສັງຄົມແຂວງ ໄດ້ລົງມອບເຄື່ອງຊ່ວຍເຫຼືອສຸກເສີນໃຫ້ແກ່ຜູ້ປະສົບເຄາະຮ້າຍຈາກໄພນ້ຳຖ້ວມຢູ່ເມືອງແບ່ງ ແຂວງອຸດົມໄຊ ໄດ້ມອບເງິນສົດ 50 ລ້ານກີບ ເພື່ອນຳໃຊ້ເຂົ້າໃນການຟື້ນຟູບັນຫາໄພນ້ຳຖ້ວມໃນຄັ້ງນີ້, ມອບເງິນສົດໃຫ້ຄອບຄົວເຮືອນໄຫຼນ້ຳ ຈຳນວນ 2 ຄອບຄົວ, ຄອບຄົວລະ 5 ລ້ານກີບ. ຈາກນັ້ນ, ພະແນກແຮງງານ ແລະ ສະຫວັດດີການສັງຄົມແຂວງ ກໍໄດ້ມອບສັງກະສີ ຈຳນວນ 240 ແຜ່ນ, ເຫຼັກຕອກສັງກະສີ 24 ກັບ, ເຄື່ອງນຸ່ງຫົ່ມ ຈຳນວນ 1.440 ຜືນ ແລະ ເຄື່ອງໃຊ້ຄົວເຮືອນທີ່ຈຳເປັນຈຳນວນໜຶ່ງ.

ສ່ວນເມືອງນານ ແຂວງຫຼວງພະບາງ ໃນຕອນກາງຄືນຂອງວັນທີ 17 ສິງຫາ 2019 ເວລາປະມານ 1:00 ໂມງ ນ້ຳນານໄດ້ມີປະລິມານສູງໄຫຼເຂົ້າຖ້ວມເຮືອນຂອງປະຊາຊົນທີ່ຢູ່ແຄມນ້ຳນານ ເມືອງນານ ສ້າງຄວາມເສຍຫາຍເລັກໜ້ອຍ ເພາະປະຊາຊົນໄດ້ມີສະຕິພ້ອມກັນຂົນເຄື່ອງຂຶ້ນໄວ້ບ່ອນສູງ ເພາະເຫດການຄັ້ງນີ້ເປັນຄັ້ງທີ 2 ປັດຈຸບັນລະດັບນໍ້າເກືອບເຂົ້າສູ່ສະພາບປົກກະຕິ, ສ່ວນປະຊາຊົນແຕ່ລະຄອບຄົວໄດ້ເຂົ້າອະນາໄມບ້ານເຮືອນ ແລະ ແຕ່ງຕັ້ງກັນເຝົ້າລະວັງສະພາບນໍ້າຢ່າງຕໍ່ເນື່ອງ ເພາະຝົນຍັງສືບຕໍ່ຕົກ.

ດ້ານພະຍາກອນອາກາດເວລາ 7:00 ໂມງ ຂອງວັນທີ 19 ສິງຫາ 2019 ຈາກກົມອຸຕຸນິຍົມ ແລະ ອຸທົກກະສາດ ໃຫ້ຮູ້ວ່າ: ລົມມໍລະສຸມຕາເວັນຕົກສ່ຽງໃຕ້ໄດ້ມີກຳລັງແຮງເພີ່ມຂຶ້ນພັດປົກຄຸມຢູ່ທົ່ວທຸກພາກຂອງປະເທດລາວ ເຊິ່ງຈະເຮັດໃຫ້ມີຝົນຕົກໃນລະດັບຄ່ອຍຢູ່ບາງທ້ອງຖິ່ນເຂດພາກເໜືອ, ສ່ວນພາກກາງ ແລະ ພາກໃຕ້ ຈະມີຝົນຕົກໃນລະດັບຄ່ອຍ ຫາ ປານກາງຢູ່ບາງທ້ອງຖິ່ນ ພ້ອມມີລົມພັດແຮງເປັນບາງໂອກາດ. ສຳລັບລະດັບນ້ຳຢູ່ຂົວເຊບັ້ງໄຟ ແຂວງຄຳມ່ວນ ໃນເວລາ 7:00 ໂມງ ຂອງວັນທີ 19 ສິງຫາ 2019 ແທກໄດ້ 17,89 ແມັດ ເຊິ່ງໄດ້ຂຶ້ນກາຍເຂດລະວັງໄພແລ້ວ ( ເຂດລະວັງໄພ 17,50 ແມັດ ) ແລະ ທ່າອ່ຽງລະດັບນໍ້າເຊບັ້ງໄຟຍັງຈະສືບຕໍ່ສູງຂຶ້ນຕື່ມອີກ. ດັ່ງນັ້ນ, ຈຶ່ງຂໍແຈ້ງເຕືອນເຖິງພໍ່ແມ່ປະຊາຊົນ ແລະ ອຳນາດການປົກຄອງທີ່ອາໄສຢູ່ຕາມລຽບນ້ຳເຊບັ້ງໄຟ ແລະ ເຂດນ້ຳເຊຈຳພອນ ໃຫ້ມີສະຕິລະມັດລະວັງສະພາບລະດັບນ້ຳ ແລະ ໃຫ້ເກັບວັດຖຸສິ່ງຂອງ ພ້ອມສັດລ້ຽງໄປໄວ້ບ່ອນທີ່ປອດໄພ.

ທ່ານ ເຂັມເພັດ ເທບພະກັນ ວິຊາການຂະແໜງຊັບພະຍາກອນນ້ຳ ແລະ ອຸຕຸນິຍົມ, ພະແນກຊັບພະຍາກອນທຳມະຊາດ ແລະ ສິ່ງແວດລ້ອມ ແຂວງຄຳມ່ວນ ໃຫ້ຮູ້ວ່າ: ລະດັບນ້ຳເຊບັ້ງໄຟ ທີ່ແຂວງຄຳມ່ວນ ເພີ່ມຂຶ້ນສູງຍ້ອນວ່າປະລິມນ້ຳຝົນທີ່ຕົກໃນ 10 ເມືອງ ພາຍໃນແຂວງ 2 ວັນຜ່ານມາ ຢູ່ໃນລະດັບ 100 ກວ່າ ມິນລີແມັດ ເຮັດໃຫ້ລະດັບນ້ຳເຊບັ້ງໄຟ ເຖິງເຂດເຕືອນໄພແຕ່ວັນທີ 18 ສິງຫາ ຜ່ານມາ ແຕ່ໃນມື້ນີ້ ວັນທີ 19 ສິງຫາ ເຫັນວ່າໝົດມື້ຝົນບໍ່ຕົກ ແລະ ມີແດດອອກ ຄາດວ່າລະດັບນໍ້າຈະມີທ່າອ່ຽງຫຼຸດລົງ.