ທ່ານ ສຸລິຍົງ ໄຊໂກສີ ຂຶ້ນເປັນຜູ້ຮັກສາການອະທິການບໍດີ ມະຫາວິທະຍາໄລສະຫວັນນະເຂດຜູ້ໃໝ່

467

ໃນວັນທີ 7 ສິງຫາ 2019 ຜ່ານມາທີ່ມະຫາວິທະຍາໄລສະຫວັນນະເຂດ (ມຂ) ໄດ້ພິທີມອບ-ຮັບໜ້າທີ່ຮັກສາການອະທິການບໍດີມະຫາວິທະຍາໄລສະຫວັນນະເຂດ ລະຫວ່າງ ທ່ານ ບຸນປົງ ແກ້ວໂຣດົມ ອະທິການບໍດີມຂ (ຄົນເກົ່າ) ແລະ ທ່ານ ສຸລິຍົງ ໄຊໂກສີ (ຮອງອະທິ ການບໍດີຝ່າຍບໍລິຫານ ມຂ) ຜູ້ຮັກສາການອະທິການບໍດີ ມຂ ໄດ້ຈັດຂຶ້ນຢ່າງເປັນທາງການ ໂດຍການເປັນກຽດ ເຂົ້າຮ່ວມຂອງ ທ່ານນາງ ແສງເດືອນ ຫຼ້າຈັນທະບູນ ລັດຖະມົນຕີກະຊວງສຶກສາທິການ ແລະ ກິລາ, ທ່ານ ຄຳພູນ ຕຸໄພທູນຮອງເຈົ້າແຂວງສະຫວັນນະເຂດ, ມີພະແນກການກົມກອງອ້ອມຂ້າງແຂວງພ້ອມດ້ວຍຄູ-ອາຈານພາຍໃນມະຫາວິທະຍາໄລເຂົ້າຮ່ວມ.

 ໃນພິທີ, ໄດ້ມີການຜ່ານດຳລັດຂອງນາຍົກລັດຖະມົນຕີ ສະບັບເລກທີ 139/ນຍ, ລົງວັນທີ 28 ພຶດສະພາ 2019 ວ່າດ້ວຍການອະນຸມັດໃຫ້ພະນັກງານອອກພັກການ-ຮັບອຸດໜູນບຳນານ ໂດຍໄດ້ອະນຸມັດໃຫ້ ທ່ານ ບຸນປົງ ແກ້ວໂຣດົມ ອະທິການບໍດີມະຫາວິທະຍາໄລສະຫວັນນະເຂດ, ກະຊວງສຶກສາທິການ ແລະ ກິລາ ເກີດເມື່ອວັນທີ 8 ມີນາ 1954, ລວມອາຍຸກະສຽນ 65 ປີ, ເຂົ້າສັງກັດລັດວັນທີ 01 ຕຸລາ 1979, ລວມອາຍຸການ 40 ປີ ອອກພັກການ-ຮັບອຸດໜູນບຳນານ ນັບແຕ່ວັນທີ 1 ກໍລະກົດ2019 ເປັນຕົ້ນໄປ.

ຂໍ້ຕົກລົງຂອງນາຍົກລັດຖະມົນຕີເລກທີ 44/ນຍ, ລົງວັນທີ 30 ພະຈິກ 2019 ວ່າດ້ວຍການແຕ່ງຕັ້ງຜູ້ຮັກສາການອະທິການບໍດີມະຫາວິທະຍາໄລສະຫວັນນະເຂດໂດຍໄດ້ຕົກລົງແຕ່ງຕັ້ງ ທ່ານ ສຸລິຍົງ ໄຊໂກສີເປັນຜູ້ຮັກສາການອະທິການບໍດີມະຫາວິທະຍາໄລສະຫວັນນະເຂດ.

ໂອກາດນີ້, ທ່ານບຸນປົງ ແກ້ວໂຣດົມ ກໍ່ໄດ້ຂຶ້ນຜ່ານບົດສະຫຼຸບການນຳພາໃນການສ້າງຕັ້ງ ແລະພັດທະນາ ມຂຈົນມາຮອດປະຈຸບັນ ແລະ ໄດ້ກ່າວມອບໜ້າທີ່ການນຳພາຄຸ້ມຄອງໃຫ້ຜູ້ໃໝ່ສືບຕໍ່ຊີ້ ນຳໆພາຕໍ່ໄປຫຼັງຈາກນັ້ນ, ໃນພິທີກໍ່ໄດ້ມີການມອບ-ຮັບ ໜ້າທີ່ຮັກສາການອະທິການບໍດີ ມຂ ຢ່າງເປັນທາງການ ພ້ອມນີ້, ໃນພິທີດັ່ງກ່າວຍັງໄດ້ ຮັບຟັງການໂອ້ລົມ ແລະ ໃຫ້ທິດຊີ້ນຳຈາກທ່ານລັດຖະມົນຕີ ກະຊວງສຶກສາທິການ ແລະ ກິລາ ໂດຍທ່ານໄດ້ກ່າວສະແດງຄວາມຍ້ອງຍໍຊົມເຊີຍຜົນງານ ທີ່ທາງຄະນະນຳ ມຂ ຍາດມາໄດ້ໃນໄລຍະຜ່ານມາຈົນເຮັດໃຫ້ມະຫາວິທະຍາໄລສະຫວັນນະເຂດ ໄດ້ສືບຕໍ່ມີການ ພັດທະນາດີຂຶ້ນຢ່າງເປັນກ້າວໆຈາກເບື້ອງຕົ້ນມີພຽງແຕ່ 3 ຄະນະວິຊາ ເຊິ່ງມາຮອດ ປັດຈຸບັນໄດ້ຂະຫຍາຍມາເປັນ 8 ຄະນະ.ພ້ອມດຽວກັນນີ້, ກໍ່ຮຽກຮ້ອງໃຫ້ຜູ້ທີ່ຮັບໜ້າທີ່ເປັນຜູ້ຮັກສາອະ​ທິ​ການ​ບໍ​ດີມຂ ຈົ່ງໄດ້ ເອົາໃຈໃສ່ສືບຕໍ່ໃນການພັດທະນາ ມຂພວກເຮົາໃຫ້ເຕີບໃຫຍ່ຂະຫຍາຍຕົວດີຂຶ້ນໄປເລື້ອຍໆ.