ການຜະລິດເຂົ້າຢູ່ ນວ ສະໜອງໃຫ້ສັງຄົມໄດ້ພຽງ 20%

457

ຫົກເດືອນຕົ້ນປີ 2019 ນະຄອນຫຼວງວຽງຈັນ ສະໜອງເຂົ້າໃຫ້ສັງຄົມໄດ້ພຽງ 66.705 ໂຕນ ເທົ່າກັບ 20,8% ຂອງແຜນການ; ສ່ວນການສົ່ງອອກຜະລິດຕະພັນກະສິກໍາໄປຕ່າງປະເທດໄດ້ 11 ລ້ານກວ່າໂດລາສະຫະລັດ.

ກອງປະຊຸມເປີດກວ້າງຄົບຄະນະຮາກຖານ ພະແນກກະສິກໍາ ແລະ ປ່າໄມ້ ປະຈໍານະຄອນຫຼວງວຽງຈັນ ຄັ້ງທີ 7 ສະໄໝທີ VI ຈັດຂຶ້ນໃນວັນທີ 2 ສິງຫາ 2019 ທີີ່ພະແນກກະສິກໍາ ແລະ ປ່າໄມ້ ນວ ໂດຍການເຂົ້າຮ່ວມຂອງ ທ່ານ ບຸນທອງ    ພົມມະຈັນ ຄະນະປະຈໍາພັກ ຫົວໜ້າຄະນະຈັດຕັ້ງ ນະຄອນຫຼວງວຽງຈັນ, ທ່ານ ຫຼ້າສາຍ ນວນທາສິງ ຫົວໜ້າພະແນກກະສິກໍາ ແລະ ປ່າໄມ້ ນວ ພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມ.

ທ່ານ ຫຼ້າສາຍ ນວນທາສິງ ກ່າວວ່າ: ຈຸດປະສົງຂອງການຈັດກອງປະຊຸມໃນຄັ້ງນີ້ກໍເພື່ອທວນຄືນຜົນສໍາເລັດດ້ານດີ, ດ້ານອ່ອນ, ຂໍ້ຄົງຄ້າງ ແລະ ບົດຮຽນທີ່ຖອດຖອນໄດ້ໃນການຈັດຕັ້ງປະຕິບັດວຽກງານໃນໄລຍະຜ່ານມາ ໂດຍສະເພາະກໍແມ່ນໂຄງການໃຫຍ່ລະດັບຊາດ ແຜນງານຄໍ້າປະກັນສະບຽງອາຫານ, ການຜະລິດກະສິກໍາເປັນສິນຄ້າ. ທັງນີ້, ກໍເພື່ອຮັບປະກັນ ຄວາມໝັ້ນຄົງ, ຄວາມປອດໄພດ້ານສະບຽງອາຫານຢ່າງໜັກແໜ້ນ, ເປີດກວ້າງສ້າງລະບົບຕ່ອງໂສ້ການຜະລິດກະສິກໍາເປັນສິນຄ້າຢ່າງແຂງແຮງ ໃຫ້ສາມາດແຂ່ງຂັນໃນຕະຫຼາດພາຍໃນ ແລະ ການສົ່ງອອກ, ສ້າງລາຍຮັບເພີ່ມໃຫ້ກະສິກໍາ, ປ່າໄມ້ ເຕີບໂຕໃນອັດຕາ 4,5% ຕໍ່ປີ.

ໂອກາດດຽວກັນ ທ່ານ ສີສະຫວັດ ສິນທະວີ ຮອງຫົວໜ້າພະແນກກະສິກໍາ ແລະ ປ່າໄມ້ ນະຄອນຫຼວງວຽງຈັນ ໃຫ້ຮູ້ວ່າ: ໃນ 6 ເດືອນຕົ້ນປີ 2019 ນວ ສາມາດສະໜອງສະບຽງອາຫານໃຫ້ສັງຄົມ ເປັນຕົ້ນແມ່ນເຂົ້າ ສະໜອງໄດ້ 66.705 ໂຕນ ເທົ່າກັບ 20,8% ຂອງແຜນການ 319.400 ໂຕນຕໍ່ປີ, ສະເລ່ຍໃສ່ຫົວຄົນໃຫ້ໄດ້ 71 ກິໂລຕໍ່ຄົນຕໍ່ 6 ເດືອນ ເຊິ່ງບໍ່ສາມາດປະຕິບັດໄດ້ຕາມແຜນໂດຍມາຈາກຫຼາຍສາເຫດ ຄື: ການຜະລິດນາແຊງບໍ່ສາມາດປັກດໍາ ແລະ ເກັບກ່ຽວໄດ້ຕາມແຜນ ເນື່ອງຈາກການສະໜອງນໍ້າບໍ່ໄດ້ຕາມຄາດໝາຍ ເພາະວ່າງົບປະມານຊັກຊ້າ ແລະ ບໍ່ພຽງພໍຕໍ່ການນໍາໃຊ້ເຂົ້າໃນວຽກງານດັ່ງກ່າວ, ດ້ານການປັກດໍາເຂົ້ານາປີ ປະຕິບັດໄດ້ແລ້ວ 44.800 ເຮັກຕາ ເທົ່າກັບ 85,5% ຂອງແຜນການ 52.373 ເຮັກຕາ ເຊິ່ງຈະສືບຕໍ່ຊຸກຍູ້ການປັກດໍາຕາມແຜນການໃຫ້ໄດ້ທັນເວລາ. ສ່ວນການຜະລິດພືດຜັກ ປະຕິບັດໄດ້ 77.373 ໂຕນ ເທົ່າກັບ 68,29% ຂອງແຜນການ 133.699 ໂຕນຕໍ່ປີ, ການຜະລິດໝາກໄມ້ສົດ ປະຕິບັດໄດ້ 11.048 ໂຕນ ເທົ່າກັບ 88,7% ຂອງແຜນການ 12.455 ໂຕນຕໍ່ປີ, ການປູກພືດອຸດສາຫະກໍາ ປະຕິບັດໄດ້ 22.166 ໂຕນ ໃນເນື້ອທີ່ 1.717 ເຮັກຕາ ສາມາດປະຕິບັດໄດ້ລື່ນແຜນການ 5,02% ຂອງເນື້ອທີ່ແຜນການ 1.635 ເຮັກຕາຕໍ່ປີ, ດ້ານການສະໜອງທາດຊີ້ນໂດຍສະເພາະແມ່ນປາໄດ້ 30.394 ໂຕນ ເທົ່າກັບ 46,7% ຂອງແຜນການ.

ດ້ານການຜະລິດເປັນສິນຄ້າ ໂດຍປະຕິບັດຕາມ 8 ໂຄງການ ຄື: ໂຄງການຜະລິດງົວຊີ້ນເປັນສິນຄ້າ, ປູກເຂົ້າອິນຊີ, ປູກພືດຜັກອິນຊີ, ປູກສາລີເປັນສິນຄ້າ, ປູກມັນຕົ້ນເປັນສິນຄ້າ, ລ້ຽງໝູເປັນສິນຄ້າ, ລ້ຽງສັດປີກເປັນສິນຄ້າ, ລ້ຽງປາ ແລະ ສັດນໍ້າເປັນສິນຄ້າ. ໃນນັ້ນ, ອັນພົ້ນເດັ່ນທີ່ສະໜອງໃນ ນວ ພຽງພໍ ແລະ ສົ່ງອອກໄປຕ່າງແຂວງໄດ້ມີການປູກພືດຜັກອິນຊີ ສາມາດຜະລິດໄດ້ 3.000 ໂຕນ ເຊິ່ງສະໜອງເຂົ້າຕະຫຼາດອິນຊີໃນນະຄອນຫຼວງວຽງຈັນໄດ້ 5.000 ໂຕນ, ດ້ານການລ້ຽງໝູເປັນສິນຄ້າ ສາມາດສົ່ງໝູຊີ້ນໄປຕ່າງແຂວງໄດ້ 7.801 ໂຕ, ການລ້ຽງໄກ່ພັນໄຂ່ ສາມາດສົ່ງອອກໄປຕ່າງແຂວງໄດ້ 689 ໂຕນ ມູນຄ່າ 8,2 ຕື້ກີບ, ສະໜອງປານິນໄປຕ່າງແຂວງໄດ້ 10 ໂຕນຕໍ່ມື້ ເທົ່າກັບ 1.820 ໂຕນ ມູນຄ່າ 32,7 ຕື້ກີບ. ນອກຈາກນີ້, ຜະລິດຕະພັນກະສິກໍາສົ່ງອອກຕ່າງປະເທດສາມາດປະຕິບັດໄດ້ 11.311.466 ໂດລາສະຫະລັດ. ໃນນັ້ນ, ຜະລິດຕະພັນດ້ານປູກຝັງ 60.105,6 ໂຕນ ມູນຄ່າ 7.899.169 ໂດລາສະຫະລັດ; ດ້ານການລ້ຽງສັດ ຊີ້ນ ຄວາຍອົບແຫ້ງ 10 ໂຕນ ມູນຄ່າ 937.500 ໂດລາສະຫະລັດ, ດ້ານປ່າໄມ້ ສາມາດສົ່ງອອກຜະລິດຕະພັນໄມ້ ມູນຄ່າ 2.474.797 ໂດລາສະຫະລັດ. ເຖິງຢ່າງໃດກໍຕາມ, ຈະສືບຕໍ່ຕັ້ງໜ້າປະຕິບັດຕາມແຜນງານຄໍ້າປະກັນສະບຽງອາຫານ ໂດຍສູ້ຊົນປະຕິບັດບັນດາຄາດໝາຍຂອງການປູກເຂົ້າ, ພືດຜັກ, ໝາກໄມ້, ພືດອຸດສາຫະກໍາ ແລະ ການສະໜອງທາດຊີ້ນ ແກ່ສັງຄົມໃຫ້ໄດ້ຕາມແຜນການທີ່ວາງໄວ້, ທ່ານ ສີສະຫວັດ ສິນທະວີ ກ່າວ.