ລາວ-ຈີນ ຮ່ວມມືເປີດສາຍການບິນ ວຽງຈັນ-ຫາງໂຈ

531

ສາຍການບິນ ຫາງໂຈ-ວຽງຈັນ-ຫາງໂຈ ເປັນຖ້ຽວບິນເໝົາລຳຂອງສາຍການບິນລາວ QV852 ເຊິ່ງແມ່ນບໍລິສັດ ບໍລິການສາຍການບິນເປົາເຊິນເຈີ້ຈຽງຈໍາກັດ ເປັນຜູ້ຮັບເໝົາ ໂດຍຈະໃຫ້ບໍລິການທຸກໆວັນພຸດຈຳນວນ 1 ຖ້ຽວຕໍ່ອາທິດ ເຊື່ອວ່າເສັ້ນບິນດັ່ງກ່າວຈະຊ່ວຍສົ່ງເສີມການຄ້າ, ການລົງທຶນ ແລະ ການທ່ອງທ່ຽວຂອງສອງປະເທດ ລາວ-ຈີນໃຫ້ດີຂຶ້ນຫຼັງເປີດບໍລິການ.

ໃນວັນທີ 31 ກໍລະກົດ 2019 ຜ່ານມາ ໄດ້ມີພິທີເປີດສາຍການບິນຮອບປະຖົມມະເລີກ ຫາງໂຈ່-ວຽງຈັນ-ຫາງໂຈ ຂຶ້ນຢ່າງເປັນທາງການ ທີ່ນະຄອນຫາງໂຈ, ແຂວງເຈີ້ຈຽງ, ສປ ຈີນ. ໃຫ້ກຽດເຂົ້າຮ່ວມ ຝ່າຍລາວນຳໂດຍ ທ່ານ ອຸ່ນທວງ ຂາວພັນ, ຮອງລັດຖະມົນຕີ ກະຊວງຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ (ຖວທ); ທ່ານນາງ ຄໍາຈັນ ວົງແສນບູນ, ຮອງລັດຖະມົນຕີກະຊວງແຜນການ ແລະ ການລົງທຶນ ແລະ ທ່ານ ບຸນສະເຫຼີມໄຊ ເຄນນະວົງ, ຮອງລັດຖະມົນຕີກະຊວງໄປສະນີ, ຄົມມະນາຄົມ ແລະ ການສື່ສານ.

ຝ່າຍ ສປ ຈີນ ນຳໂດຍທ່ານ ຈາງ ຈ້ຽນຕິງ, ຮອງປະທານສະພາປະຊາຊົນນະຄອນຫາງໂຈ, ທ່ານ ນາງ ເຫີ ຢັນຢັນ, ຫົວໜ້າຫ້ອງການຜູ້ຕາງໜ້າສະພາສົ່ງເສີມການຄ້າສາກົນ ສປ ຈີນ, ຂະແໜງອຸດສາຫະກຳການກໍ່ສ້າງປະຈຳ ສປປ ລາວ ພ້ອມດ້ວຍບັນດາທ່ານຈາກບັນດາຂະແໜງການທີ່ກ່ຽວຂ້ອງພາກລັດ, ພາກທຸລະກິດ ລາວ-ຈີນ ພ້ອມດ້ວຍພາກສ່ວນທີ່ກ່ຽວຂ້ອງເຂົ້າຮ່ວມ.

ການເປີດສາຍການບິນ ວຽງຈັນ-ຫາງໂຈ-ວຽງຈັນ ໃນຄັ້ງນີ້ ເປັນຖ້ຽວບິນເໝົາລຳຂອງສາຍການບິນລາວ QV852 ໂດຍແມ່ນບໍລິສັດບໍລິການສາຍການບິນເປົາເຊິນເຈີ້ຈຽງຈໍາກັດ ເປັນຜູ້ຮັບເໝົາ ເຊິ່ງຈະໃຫ້ບໍລິການທຸກໆວັນພຸດຈຳນວນ 1 ຖ້ຽວຕໍ່ອາທິດ. ການເປີດສາຍການບິນນີ້ຖືວ່າເປັນກິດຈະກໍາໜຶ່ງທີ່ສໍາຄັນ ທີ່ປະກອບສ່ວນໃຫ້ແກ່ການໂຄສະນາ ແລະ ສົ່ງເສີມການທ່ອງທ່ຽວຂອງທັງສອງປະເທດ, ເຊິ່ງຜູ້ນຳສອງປະເທດລາວ-ຈີນ ເຫັນດີເປັນເອກະພາບຈັດຕັ້ງປີທ່ຽວທ່ຽວລາວ-ຈີນ 2019 ຂຶ້ນ.

ພ້ອມນີ້, ຍັງເປັນການປະກອບສ່ວນອັນສໍາຄັນໃຫ້ແກ່ການພົວພັນຮ່ວມມື, ການພັດທະນາເສດຖະກິດ-ສັງຄົມ, ການສົ່ງເສີມການຄ້າແລະ ການສົ່ງເສີມການລົງທຶນ, ທັງຊ່ວຍເພີ່ມທະວີການເດີນທາງທ່ອງທ່ຽວໄປມາຫາສູ່ກັນຂອງປະຊາຊົນລາວ-ຈີນກໍ່ຄືຊາວນະຄອນຫາງໂຈ່ວ ແລະ ນະຄອນຫຼວງວຽງຈັນ ໃຫ້ນັບມື້ນັບສະດວກຂຶ້ນເທື່ອລະກ້າວ.

ໃນໂອກາດນີ້, ຄະນະຜູ້ແທນລາວ ໃຫ້ຮູ້ຕື່ມອີກວ່າ:  ຕະຫຼາດນັກທ່ອງທ່ຽວຈີນ ເປັນຕະຫຼາດໃຫຍ່ ແລະສຳຄັນຂອງການທ່ອງທ່ຽວລາວ; ໃນປີ 2018 ມີນັກທ່ອງທ່ຽວຈີນມາທ່ຽວລາວ ຈຳນວນ 799.929 ເທື່ອຄົນ, ເພີ່ມຂຶ້ນ 25% ຖ້າທຽບໃສ່ປີ 2017 ແລະ ໃນ 6 ເດືອນທຳອິດຂອງປີ 2019 ໄດ້ເພີ່ມຂຶ້ນ 13% ທຽບໃສ່ໄລຍະເວລາດຽວກັນຂອງປີຜ່ານມາ ເຊິ່ງຄາດວ່າຈໍານວນນັກທ່ອງທ່ຽວຈີນທີ່ເຂົ້າມາທ່ຽວລາວ ຈະບັນລຸຕົວເລກຄາດໝາຍ 1 ລ້ານເທື່ອຄົນ ເຊິ່ງເປັນຕົວເລກທີ່ລັດຖະບານລາວໄດ້ກໍານົດໄວ້ສຳລັບປີທ່ອງທ່ຽວລາວ-ຈີນ2019.