ແຂວງສາລະວັນ ກວດສຸຂະພາບໃຫ້ປະຊາຊົນ ບໍ່ເສຍຄ່າ

415

ໃນວັນທີ 30 ກໍລະກົດ ປີ 2019 ນີ້ ທ່ານ ຈັນສີລອນ ສີລິສົມບູນ ເລຂາຄະນະຊາວໜຸ່ມແຂວງສາລະວັນ ພ້ອມຄະນະ ແລະ ທ່ານ ຫງວຽນ ບ໋າ ຢັວນ ຫົວໜ້າຂະແໜງໂຄສະນາສຶກສາ ຊາວໜຸ່ມນະຄອນດານັງ ສສ ຫວຽດນາມ ພ້ອມຄະນະ ໄດ້ຮ່ວມກັນຈັດກິດຈະກຳກວດສຸຂະພາບທົ່ວໄປ ແລະ ຈ່າຍຢາໃຫ້ກັບພໍ່ແມ່ປະຊາຊົນໂດຍບໍ່ເສຍຄ່າ ຢູ່ທີ່ເດີ່ນໂຮງຮຽນມັດທະຍົມຕົ້ນ ບ້ານໝາກນາວໃຫຍ່ ເມືອງສາລະວັນ ໂດຍມີຕາງໜ້າຄະນະປະຈຳພັກເມືອງ, ຕາງໜ້າໂຮງໝໍແຂວງ, ຫ້ອງການທີ່ກ່ຽວຂ້ອງອ້ອມຂ້າງເມືອງແລະ ພໍ່ແມ່ປະຊາຊົນເຂົ້າຮ່ວມຢ່າງຫຼວງຫຼາຍ.

ການເຄື່ຶອນໄຫວສ້າງກິດຈະກຳຂອງຄະນະຊາວໜຸ່ມທັງ 2 ແຂວງ ກໍຄືທັງ 2 ປະເທດຄັ້ງນີ້ແມ່ນເປັນການເສີມຂະຫຍາຍສາຍພົວພັນມິດຕະພາບທີ່ມີມາ ແລະ ທັງເປັນການປະຕິບັດຕາມບົດບັນທຶກຊ່ວຍຈຳລະຫວ່າງຊາວໜຸ່ມສອງແຂວງສາລະວັນ ແລະ ນະຄອນດານັງ ທີ່ຮ່ວມກັນລົງນາມໃນໄລຍະແຕ່ປີ 2015 – 2020 ທັງເປັນການປະກອບສ່ວນເພື່ອແນໃສ່ໃຫ້ບັນລຸລະດັບຄາດໝາຍດ້ານວຽກງານສາທາລະນະສຸກ ແລະ ແນໃສ່ເຮັດໃຫ້ພໍ່ແມ່ປະຊາຊົນມີສຸຂະພາບແຂງແຮງ, ການກວດສຸຂະພາບທົ່ວໄປ, ພ້ອມຢາຍຢາໂດຍບໍ່ເສຍຄ່າໃຫ້ກັບພໍ່ແມ່ປະຊາຊົນຄັ້ງນີ້ມີທັງໝົດ 1.500 ກວ່າຄົນ, ມີ 11 ບ້ານ.

ນອກຈາກກວດສຸຂະພາບແລ້ວຍັງໄດ້ມອບເຄື່ອງອຸປະໂພກ ແລະ ບໍລິໂພກໃຫ້ກັບຄອບຄົວທີ່ຂາດເຂີນທຸກຍາກຕື່ມອີກໃນຈໍານວນ 11 ບ້ານ ຄື: ບ້ານໝາກນາວ ມີ 20 ຄອບຄົວ ແລະ ອີກຈຳນວນ 10 ບ້ານ ແມ່ນໄດ້ຮັບເຄື່ຶອງຊ່ວຍເຫຼືອບ້ານລະ 18 ຄອບຄົວ. ພ້ອມນັ້ນ, ຍັງໄດ້ມອບລໍ້ຍູ້ສໍາລັບຄົນພິການທີ່ຍ່າງບໍ່ໄດ້ຈຳນວນ 5 ຄັນ ລວມເປັນມູນຄ່າທັງໝົດ 530 ລ້ານດົງ.

ຈາກນັ້ນ, ມາໃນຕອນແລງຂອງວັນດຽວກັນທາງຄະນະບໍລິຫານງານຊາວໜຸ່ມ ແຂວງສາລະວັນ ກໍໄດ້ຈັດພິທີມອບໃບຍ້ອງຍໍຕ່າງໆໃຫ້ກັບຄະນະທີມງານຊາວໜຸ່ມນະຄອນດານັງ ຢູ່ທີ່ໂຮງແຮມໂພນ, ໃຫ້ກຽດມອບໃບຍ້ອງຍໍຂັ້ນແຂວງໂດຍ ທ່ານ ນາງ ບຸນທະວີ ດວງລາສີ ຄະນະປະຈຳພັກແຂວງ ປະທານສະຫະພັນແມ່ຍິງແຂວງ ທັງແມ່ນຜູ້ຊີ້ນຳວຽກງານອົງການຈັດຕັ້ງມະຫາຊົນຂັ້ນແຂວງ, ເປັນກຽດຮັບໂດຍ ທ່ານ ຫງວຽນ ບ໋າ ຢັວນ ຫົວໜ້າຂະແໜງໂຄສະນາສຶກສາ ຊາວໜຸ່ມນະຄອນດານັງ ສສ ຫວຽດນາມ.

ພ້ອມນັ້ນ, ທ່ານ ທຶງ ຈອມມະນີ ຄະນະປະຈຳພັກແຂວງ ເລຂາພັກເມືອງ ເຈົ້າເມືອງສາລະວັນ ກໍໄດ້ໃຫ້ກຽດຂຶ້ນມອບໃບຍ້ອງຍໍຂັ້ນເມືອງໃຫ້ກັບຄະນະຊາວໜຸ່ມນະຄອນດານັງ ສສ ຫວຽດນາມ ຈຳນວນ 40 ກວ່າທ່ານ