ສະຫວັນນະເຂດ ຢືດໄດ້ພ້ອມທຳລາຍສິ້ນສ່ວນເຄື່ອງໃນສັດ ທີ່ນຳເຂົ້າຈາກຕ່າງປະເທດ

445

ຫຼາຍໆທ່ານອາດຈະຮູ້ນຳກັນແລ້ວວ່າອາຫານທີ່ມີສານປົນເປື້ອນຂອງຟໍມາລີນ ເປັນສານອັນຕະລາຍເຊິ່ງສານດັ່ງກ່າວແມ່ນໃຊ້ໄວ້ສຳລັບດອງຊາກສົບຄົນຕາຍບໍ່ໃຫ້ເນົ່າເປື່ອຍ ແຕ່ສິ່ງທີ່ໜ້າຄິດແມ່ນພໍ່ຄ້າຊາວຂາຍຈຳນວນໜຶ່ງເຫັນປະໂຫຍດສ່ວນຕົວ ໃຊ້ສານປະເພດນີ້ແຊ່ດອງອາຫານໄວ້ເພື່ອບໍ່ໃຫ້ເນົ່າເປື່ອຍໂດຍສະເພາະແມ່ນສິ້ນສ່ວນເຄື່ອງໃນສັດທີ່ນຳເຂົ້າຈາກຕ່າງປະເທດທີ່ຜິດກົດໝາຍ ເລື່ອງລາວທີ່ເກີດຂຶ້ນຢູ່ແຂວງ ສະຫວັນນະເຂດນີ້.

ໂດຍອີງຕາມ ຄໍາສັ່ງຂອງທ່ານລັດຖະມົນຕີ ກະຊວງກະສິກໍາ ແລະ ປ່າໄມ້ ສະບັບເລກທີ 2950/ປມ, ລົງວັນທີ 25 ມິຖຸນາ 2019; ອີງຕາມ ຄໍາສັ່ງຂອງທ່ານເຈົ້າແຂວງໆ ສະຫວັນນະເຂດ ສະບັບເລກທີ 1071/ຈຂ.ສຂ, ລົງວັນທີ 08 ກໍລະກົດ 2019

ໃນວັນທີ 20 ກໍລະກົດ 2019 ຜ່ານມາພະແນກຕຳຫຼວດສິ່ງແວດລ້ອມໄດ້ຈັດພິທີທຳລາຍເຄື່ອງໃນສັດ ທີ່ບໍ່ມີເອກະສານອະນຸຍາດນຳເຂົ້າແລະ ກວດພົບສານຟໍມາລີນໃນຜະລິດຕະພັນສັດ ເຂົ້າຮ່ວມມີພະແນກຕໍາຫຼວດສິ່ງແວດລ້ອມ, ຕໍາຫຼວດປກສ ແຂວງ, ຂະແໜງລ້ຽງສັດ ແລະ ການປະມົງພະແນກກະສິກຳປ່າໄມ້ແຂວງແລະ ອຳນາດການປົກຄອງ ບ້ານ ອະລວຍ ເມືອງພີນ ເຂົ້າຮ່ວມ

ພະແນກຕໍາຫຼວດສິ່ງແວດລ້ອມໂດຍປະສານສົມທົບກັບຈຸດກວດກາສາລາກາຍ ໄດ້ທໍາການກວດຄົ້ນລົດເມໂດຍສານ ແລະ ໄດ້ພົບເຫັນແກັດທີ່ບັນຈຸສິ້ນສ່ວນເຄື່ອງໃນສັດທີ່ຊຸກເຊື່ອງໄວ້ຢູ່ເທິງຫຼັງຄາລົດຄັນດັ່ງກ່າວ ຈໍານວນ 42 ແກັດ, ນໍ້າໜັກ 3.150 ກິໂລກຣາມ, ເຄື່ອງໃນສັດຈໍານວນດັ່ງກ່າວແມ່ນເປັນຂອງນາງ ງາ (ຄົນຫວຽດນາມ) ໄດ້ນໍາມາຈາກປະເທດຫວຽດນາມ ເຂົ້າໄປສົ່ງຢູ່ນະຄອນຫຼວງວຽງຈັນສ່ວນເອກະສານ ນໍາເຂົ້າ-ສົ່ງອອກ ຈາກພາກສ່ວນທີ່ກ່ຽວຂ້ອງແມ່ນບໍ່ມີ.

 ສະນັ້ນ, ທາງເຈົ້າໜ້າທີ່ວິຊາສະເພາະ ຈຶ່ງໄດ້ທໍາການກັກເຄື່ອງໃນສັດ ແລະ ຮັກສາໄວ້ ຢູ່ຈຸດກວດກາ ສາລາກາຍບ່າງ, ເມືອງພີນ, ແຂວງສະຫວັນນະເຂດ ເພື່ອດໍາເນີນການສືບສວນ-ສອບສວນ ສົມທົບກັບສັດຕະວະແພດ ແລະ ພາກສ່ວນທີ່ກ່ຽວຂ້ອງ.

ຜ່ານການກວດສອບສິ້ນສ່ວນເຄື່ອງໃນສັດຈຳນວນດັ່ງກ່າວແມ່ນບໍ່ມີເອກະສານນຳເຂົ້າຈາກພາກສ່ວນທີ່ກ່ຽວຂ້ອງ, ເຊິ່ງຜິດຕໍ່ກົດໝາຍວ່າດ້ວຍ ການລ້ຽງສັດ ແລະ ການສັດຕະວະແພດ (ສະບັບປັບປຸງ) ເລກທີ 08/ສພຊ ລົງວັນທີ 11 ພະຈິກ 2016, ໝວດທີ 03, ການເຄື່ອນຍ້າຍຜະລິດຕະພັນສິນຄ້າກ່ຽວກັບສັດ; ມາດຕາ 42, 43, 44 ແລະ ຜົນການວິໄຈພົບສານຕົກຄ້າງໃນຜະລິດຕະພັນສັດ(ສານຟໍມະລີນ).

 ດັ່ງນັ້ນ, ທາງເຈົ້າໜ້າທີ່ຕຳຫຼວດ ແລະພາກສ່ວນທີ່ກ່ຽວຂອງ ຈຶ່ງໄດ້ທຳລາຍເຄື່ອງໃນສັດດັ່ງກ່າວ ທີ່ບ້ານອະລວຍ, ເມືອງພີນ, ແຂວງສະຫວັນນະເຂດ

ພາບ-ຂ່າວ: ປກສ ແຂວງສະຫວັນນະເຂດ