ຜູ້ຖືກຜົນກະທົບໄພພິບັດຢູ່ ສະໜາມໄຊ ໄດ້ຮັບເງິນຊົດເຊີຍເສດຖະກິດຄົວເຮືອນແລ້ວ 50%

429

ອັດຕະປື ຈ່າຍເງິນຊົດເຊີຍ 50% ໃຫ້ຜູ້ທີ່ໄດ້ຮັບຜົນກະທົບດ້ານເສດຖະກິດຄົວເຮືອນຈາກອຸທົກກະໄພເຫດເຂື່ອນໄຟຟ້າເຊປຽນ-ເຊນ້ຳນ້ອຍແຕກຢູ່ ເມືອງສະໜາມໄຊ ມີຈຳນວນ 587 ຄົວເຮືອນ ລວມມີ 4 ບ້ານເປົ້າໝາຍ. ໃນນັ້ນ ບ້ານ ສະໝອງ 75 ຄົວເຮືອນ ມູນຄ່າ 4 ຕື້ກວ່າກີບ, ບ້ານ ທ່າຫີນ 184 ຄົວເຮືອນ ມູນຄ່າ 8 ຕື້ກວ່າກີບ, ບ້ານໂຄກກ່ອງ 225 ຄົວເຮືອນ ມູນຄ່າ 8 ຕື້ກວ່າກີບ ແລະ ບ້ານ ທ່າແສງຈັນ 103 ຄົວເຮືອນ, ມູນຄ່າ 5 ຕື້ກວ່າກີບ ລວມມູນຄ່າທັງໝົດ 26 ຕື້ກວ່າກີບ.

ສຳລັບເງິນຊົດເຊີຍ 50% ທີ່ຈ່າຍໃຫ້ຜູ້ທີ່ຖືກຜົນກະທົບດ້ານເສດຖະກິດຄົວເຮືອນຄັ້ງນີ້ລວມມີດ້ານພາຫະນະ, ເຄື່ອງໃຊ້ຄົວເຮືອນ, ວິສາຫະກິດຄົວເຮືອນ, ສັດລ້ຽງ, ສະບຽງອາຫານ ແລະ ເຄື່ອງໃຊ້ກະສິກຳ,ສ່ວນດ້ານສິ່ງປຸກສ້າງ,ຜົນລະປູກ,ທາດບັນຈຸອັດທິຂອງບັນພະບູລຸດນັ້ນແມ່ນຍັງບໍ່ທັນໄດ້ຄິດໄລ່ມູນຄ່າການຊົດເຊີຍ. ປັດຈຸບັນທາງບໍລິສັດພັດທະນາໂຄງການເຂື່ອນໄຟຟ້າເຊປຽນ-ເຊນ້ຳນ້ອຍ ກຳລັງຄິດໄລ່ມູນຄ່າຄາມເສຍຫາຍ ແລະ ຄາດມີການຊົດເຊີຍໃນຄັ້ງຕໍ່ໄປ.

ພິທີມອບ-ຮັບ ເງິນຊົດເຊີຍດັ່ງກ່າວໄດ້ຈັດຂຶ້ນໃນວັນທີ 23 ກໍລະກົດ 2019 ທີ່ສູນພັກຊົ່ວຄາວ ຈຸດດົງບາກ,ໂດຍໃຫ້ກຽດມອບຂອງ ທ່ານ ເລັດໄຊຍະພອນ ເຈົ້າແຂວງ ອັດຕະປື ທັງເປັນ ຮອງຫົວໜ້າຄະນະສະເພາະກິດແກ້ໄຂໄພພິບັດລະດັບຊາດຕ່າງໜ້າຮັບໂດຍແມ່ນນາຍບ້ານທັງ 4 ບ້ານ, ມີການນຳຂອງແຂວງ, ເມືອງ ແລະ ພາກສ່ວນທີ່ກ່ຽວຂ້ອງ ຕະຫຼອດຮອດປະຊາຊົນຜູ້ປະສົບໄພເຂົ້າຮ່ວມ.

ຕະຫຼອດໜຶ່ງປີທີ່ຜ່ານມາເຫັນໄດ້ວ່າ ສູນກາງພັກ-ລັດຖະບານ, ອົງການປົກຄອງທ້ອງຖິ່ນ ແລະ ບໍລິສັດ ຜູ້ພັດທະນາໂຄງການເຂື່ອນໄຟຟ້າເຊປຽນ-ເຊນ້ຳນ້ອຍ ຍັງໄດ້ໃຫ້ການຊ່ວຍເຫຼືອເບິ່ງແຍງ ດ້ານຊີວິດການເປັນຢູ່ຂອງປະຊາຊົນຜູ້ປະສົບໄພໃຫ້ມີຊີວິດການເປັນຢູ່ຢ່າງຕໍ່ເນື່ອງຢູ່.

ສະນັ້ນນ, ການຊົດເຊີຍເງິນໃນຄັ້ງນີ້ຖືວ່າເປັນໂອກາດອັນສຳຄັນໜຶ່ງເຊິ່ງເປັນວັນຄົບຮອບ 1 ປີ ຂອງເຫດການເຂື່ອນແຕກເພື່ອມອບເປັນຂອງຂວັນໃນການປຸກລະດົມຈິດໃຈພໍ່ເເມ່ປະຊາຊົນໃຫ້ມີຄວາມເຂັ້ມແຂງ,ໃຫ້ເປັນທຶນຮອນສືບຕໍ່ພັດທະນາເສດຖະກິດຄອບຄົວແລະ ສາມາດຜ່ານຜ່າວິກິດການຕ່າງໆນີ້ໂດຍໄວ ໃນຂະນະດຽວກັນ ການນຳຂອງແຂວງຍັງໄດ້ລົງເຄື່ອນໄຫວມອບເຄື່ອງຊ່ວຍເຫຼືອອຸປະໂພກ,ບໍລິໂພກ ຢູ່ແຕ່ລະສູນພັກຊົ່ວຄາວແລະ ບາງບ້ານທີ່ໄດ້ຮັບຜົນກະທົບນຳອີກ.