ບໍລິໄຊເປັນແຂວງທີ 7 ພົບໝູຕິດເຊື້ອອະຫິວາ

401

ການມາຂອງພະຍາດອະຫິວາໝູອາຟຣິກາເວົ້າໄດ້ວ່າຮຸນແຮງ ແລະ ໄວວາເກີນຄາດຄິດ ເຖິງແມ່ນຫຼາຍແຂວງຈະມີການສັ່ງຫ້າມການເຄື່ອນຍ້າຍແລະຊື້-ຂາຍໝູ-ຜະລິດຕະພັນໝູແຕ່ມາຮອດມື້ນີ້ ອາດເວົ້າໄດ້ວ່າເກືອບທົ່ວທຸກແຂວງໃນປະເທດລາວກຳລັງປະເຊີນກັບອະຫິວາໝູລະບາດ ພາຍຫຼັງທີ່ລະບາດຄັ້ງທຳອິດຢູ່ ເມືອງຕຸ້ມລານແຂວງສາລະວັນ, ປັດຈຸບັນໄດ້ແຜ່ຂະຫຍາຍເປັນວົງກວ້າງກວມເອົາທັງໝົດ 7 ແຂວງແລ້ວ ຕາມລາຍງານຫຼ້າສຸດແມ່ນພົບຢູ່ບ້ານປາກເຫືອງ,ເມືອງ ບໍລິຄັນ ແຂວງ ບໍລິຄຳໄຊ ມີໝູຕາຍແລ້ວ 50 ກວ່າໂຕ.

ຕໍ່ສະພາບການດັ່ງກ່າວ ທາງຂະແໜງການກ່ຽວຂ້ອງ ແລະ ໜ່ວຍສະເພາະກິດປະຈຳພາກສະ  ໜາມຢູ່ບ້ານປາກເຫືອງ ໄດ້ມີການວາງມາດຕະການຫ້າມບໍລິໂພກ ແລະ ເຄື່ອນຍ້າຍໝູອອກຈາກພື້ນທີ່ແລະນຳເຂົ້າຈາກບ່ອນອື່ນ.

ຕາມຜົນການວິໄຈ 2 ຕົວຢ່າງ ຂອງໝູປະຊາຊົນບ້ານປາກເຫືອງ ເມືອງ ບໍລິຄັນ ແຂວງ ລິຄຳໄຊ ໄປທຳການວິໄຈຢູ່ສູນວິໄຈພະຍາດສັດ ກະຊວງກະສິກຳ ແລະ ປ່າໄມ້ ໄດ້ແຈ້ງໃຫ້ພະແນກກະສິກຳ ແລະ ປ່າໄມ້ ແຂວງບໍລິຄຳໄຊ ໃນຄັ້ງວັນທີ 16 ກໍລະກົດ 2019 ຊາບວ່າ: ຜ່ານການວິໄຈ 2 ຕົວຢ່າງຂອງໝູດັ່ງກ່າວ “ແມ່ນພົບກັບເຊື້ອພະຍາດອະຫິວາໝູອາຟຣິກກາແທ້ຈິງ’’ ເຊິ່ງພະຍາດດັ່ງກ່າວເປັນພະຍາດທີ່ຮ້າຍແຮງ ມັນສາມາດຕິດຕໍ່ໄດ້ທັງໝູບ້ານ ແລະ ໝູປ່າ ທຸກເກນອາຍຸ ເປັນພະຍາດທີ່ມີຄວາມທົນທານຕໍ່ສະພາບແວດລ້ອມ, ບໍ່ມີຢາວັກຊີນທີ່ຈະກັນໄດ້, ບໍ່ມີຢາປີ່ນປົວໂດຍກົງ, ສັດທີ່ຕິດພະຍາດນີ້ອາດຈະຕາຍເຖິງ 100% ແຕ່ມັນບໍ່ສາມາດຕິດໃສ່ຄົນ.

 ດັ່ງນັ້ນ, ເຈົ້າເມືອງບໍລິຄັນຈຶ່ງໄດ້ແຕ່ງຕັ້ງຄະນະກຳມະການສະເພາະກິດເພື່ອເຝົ້າລະວັງຕໍ່ພະຍາດລະບາດອະຫິວາໝູອາຟຣິກກາຂຶ້ນໂດຍດ່ວນ ແລະ ແຕ່ງຕັ້ງວິຊາການລົງພາກສະໜາມເພື່ອສະກັດກັ້ນການແຜ່ລະບາດ ພ້ອມທັງທຳລາຍສັດທີ່ຕິດເຊື້ອພະຍາດນີ້ຖີ້ມ ຫຼີກເວັ້ນການແຜ່ລາມໄປສູ່ຂົງເຂດອື່ນ.

ທ່ານ ແສງສະໄໝ ພະໄຊວໍລະວົງຮອງຫົວໜ້າຫ້ອງການກະສິກຳ ແລະ ປ່າໄມ້ ເມືອງບໍລິຄັນທັງເປັນຫົວໜ້າຄະນະວິຊາການປະຈຳພາກສະໜາມ ບ້ານປາກເຫືອງ ໄດ້ລາຍງານໃຫ້ຮູ້ວ່າ:ພາຍຫຼັງໄດ້ຮັບຜົນການວິໄຈ ຈາກສູນວິໄຈພະຍາດສັດ, ໃນວັນທີ 18 ກໍລະກົດ 2019 ທາງທີມງານພວກເຮົາກໍ່ໄດ້ລົງສົມທົບກັບອຳນາດການປົກຄອງບ້ານເພື່ອຈັດຕັ້ງປະຕິບັດຂ້າທຳລາຍໝູທີ່ຕິດເຊື້ອພະຍາດ ແລະ ປິດການຈໍລະຈອນບຸກຄົນທີ່ມີການເຄື່ອນຍ້າຍໝູເຂດດັ່ງກ່າວອອກໄປສູ່ເຂດອື່ນ.

ຕາມສະຖິຕິຕົວຈິງຢູ່ບ້ານປາກເຫືອງເມືອງບໍລິຄັນ ມີໝູທັງໝົດ 201 ໂຕ, ມີໝູທີ່ຕິດເຊື້ອແລ້ວຕາຍ55 ໂຕ, ໃນໄລຍະວັນທີ 22 -23ກໍລະກົດນີ້ທາງທີມງານປະຈຳພາກສະໜາມໄດ້ຂ້າທຳລາຍໝູທີ່ຕິດເຊື້ອຕື່ມອີກ 99 ໂຕແລະ ຍັງມີ 10 ໂຕ ທີ່ມີການເຝົ້າລະວັງສ່ວນບ້ານອື່ນໆຍັງບໍ່ທັນມີພະຍາດນີ້ແຜ່ລະບາດ.