ທາງການສັ່ງ! ເພຈ “Support Prime Minister Thongloun Sisoulith” ໃຫ້ຢຸດຕິການເຄື່ອນໄຫວ

455

ຫຼາຍຄົນທີ່ໃຊ້ເຟສບຸກກໍ່ຄົງຈະເຫັນ ເພຈ “Support Prime MinisterThongloun Sisoulith” ທີ່ປະກົດອອກໃນໜ້າຂ່າວອອນລາຍໃນເຟສບຸກ (Facebook). ປັດຈຸບັນຖືກທາງການແຈ້ງໃຫ້ຢຸດຕິການເຄື່ອນໄຫວແລ້ວອີງຕາມການລາຍງານຂອງສຳນັກຂ່າວສານປະເທດລາວ (KPL).

ໃນ 26 ມິຖຸນາ 2019 ຜ່ານມາ, ສຳນັກຂ່າວສານປະເທດລາວ ເຊິ່ງເປັນສື່ທາງການຂອງລັດຖະບານ ໄດ້ລາຍງານວ່າ ​ເຈົ້າໜ້າທີ່​ ກົມ​ປະຊາສຳພັນ ປະຈຳຫ້ອງການ​ສຳນັກງານ​ນາຍົກ​ລັດຖະມົນຕີ​ແຈ້ງ​ໃຫ້​ຊາບ​ວ່າ ໜ້າຂ່າວ​ອອນ​ລາຍ​ ໃນ​ເຟສບຸກ (Facebook) ທີ່​ໃສ່​ນາມ​ ຕົນ​ເອງ​ວ່າ: “Support Prime Minister Thongloun Sisoulith” ​ແມ່ນ​ບໍ່​ມີ​ສ່ວນ​ກ່ຽວ ຂ້ອງ​ກັບ​ ທ່ານ ທອງ​ລຸນ ສີ​ສຸ​ລິດ  ນາຍົກ​ລັດຖະມົນຕີ  ​ແຫ່ງ​ ສປປ ລາວ ​ແຕ່​ປະການ​ໃດ.

ຂ່າວຍັງລະບຸວ່າ ເຈົ້າໜ້າທີ່ກົມປະຊາສຳພັນໃຫ້ຮູ້ຕື່ມວ່າ ຂ່າວ ​ແລະ ຮູບ​ພາບ​ທີ່​ໄດ້ປ່ອຍ ​ອອກ​ຜ່ານໜ້າຂ່າວ​ອອນລາຍ​ດັ່ງກ່າວ​ໃນ​ໄລຍະຜ່ານ​ມາ​ແມ່ນ​ບໍ່​ຖືກຕ້ອງ, ​ຈຶ່ງ​ໃຫ້​ເຈົ້າຂອງໜ້າຂ່າວ​ນີ້ຢຸດ​ຕິ​ການ​ເຄື່ອນ​ໄຫວ​ດັ່ງກ່າວ ​ແລະ ປະຕິບັດ​ກົດໝາຍວ່າ​ດ້ວຍ​ສື່​ມວນ​ຊົນ (ສະບັບ​ປັບປຸງ), ກົດໝາຍວ່າ​ດ້ວຍ​ການ​ຕ້ານ ​ແລະ ສະກັດ​ກັ້ນອາຊະ​ຍາ​ກຳ​ທາງລະບົບ​ຄອມ​ພິວເຕີ, ດຳລັດ​ນາຍົກລັດຖະມົນຕີວ່າດ້ວຍ​ການ​ຄຸ້ມ​ຄອງຂໍ້​ມູນ​ຂ່າວສານ​ຜ່ານ​ອິນ​ເຕີ​ເນັດ​ເລກທີ 327/ນຍ ​ແລະ ລະບຽບການ​ທີ່​ກ່ຽວຂ້ອງ.

ເພຈ “Support Prime Minister Thongloun Sisoulith” ໜ້າຂ່າວອອນລາຍ ໄດ້ສ້າງຂຶ້ນເມື່ອວັນທີ 4 ເດືອນ ພຶດສະພາ ປີ 2016ເປັນຕົ້ນມາ. ປັດຈຸບັນມີຍອດຜູ້ຕິດຕາມຫຼາຍກວ່າສອງແສນຄົນ, ເພຈດັ່ງກ່າວໄດ້ໃຊ້ຮູບປະຈໍາຕົວເປັນຮູບຂອງທ່ານ ທອງລຸນ ສີສຸລິດ ນາຍົກລັດຖະມົນຕີ ແລະມີການລາຍງານກ່ຽວກັບການເຄື່ອນໄຫວຂອງນາຍົກລັດຖະມົນຕີ ທອງລຸນ ສີສຸລິດ ມາໂດຍຕະຫຼອດແຕ່ບໍ່ແມ່ນເຟສບຸກທາງການຂອງນາຍົກລັດຖະມົນຕີ ເປັນພຽງໜ້າເຟສບຸກທີ່ສ້າງຂຶ້ນໂດຍບຸກຄົນທີ່ຜູ້ຕິດຕາມໂດຍລະບຸວ່າ ເພື່ອສະໜັບສະໜູນນາຍົກລັດຖະມົນຕີ ທອງລຸນ ສີສຸລິດ  ນາຍົກລັດຖະມົນຕີ  ແຫ່ງ ສປປ ລາວ.

ແນວໃດກໍ່ຕາມຈາກການຊີ້ແຈງຂອງເພຈດັ່ງກ່າວໃນເຊົ້າມື້ນີ້ລະບຸວ່າ ເພຈຂ່າວໄດ້ລະບຸໄວ້ຊັດເຈນແລ້ວເປັນເພຈສະໜັບສະໜູນຄະນະລັດຖະບານຊຸດປະຈຸບັນ ໃນນາມພາກປະຊາຊົນທີ່ຮັກແລະສັດທາໃນແນວທາງຂອງເພິ່ນເທົ່ານັ້ນ!!!!