ສຳມະນາການນໍາໃຊ້ພາສາໃຫ້ຖືກຕ້ອງມີຄວາມເອກະພາບ

433

ຫ້ອງວ່າການສໍານັກງານນາຍົກລັດຖະມົນຕີ( ຫສນຍ ) ເປີດຊຸດສຳມະນາການນຳໃຊ້ພາສາລາວ ແລະ ການຄຸ້ມຄອງ ນຳໃຊ້ສື່ສັງຄົມອອນລາຍຄັ້ງທີ II ເພື່ອເຮັດໃຫ້ການໃຊ້ສັບພາສາລາວຖືກຕ້ອງມີຄວາມເປັນເອກະພາບສູງໃນສື່ມວນຊົນລາວ,ການນຳໃຊ້ຄຸ້ມຄອງສື່ສັງຄົມອອນລາຍໃນທາງທີ່ຖືກຕ້ອງ,ເໝະສົມ ເກີດຜົນປະໂຫຍດແກ່ຕົນເອງ ແລະຂອງສ່ວນລວມ.

ຊຸດສໍາມະນາໄດ້ຈັດຂຶ້ນ ວັນທີ 29 – 30 ເມສາ 2019 ທີ່ຫໍປະຊຸມແຫ່ງຊາດ ໂດຍການເປັນປະທານຂອງ ທ່ານ ຈະເລີນ ເຢຍປາວເຮີ ລັດຖະມົນຕີປະຈຳ ສຳນັກງານນາຍົກລັດຖະມົນຕີ, ໂຄສົກລັດຖະບານ; ທ່ານ ສະຫວັນຄອນ ຣາຊມຸນຕຣີ ຮອງລັດຖະມົນຕີກະຊວງຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ ( ຖວທ ), ພ້ອມດ້ວຍບັນດາອາຈານ, ສື່ມວນຊົນທຸກຂະແໜງການເຂົ້າຮ່ວມ.

ທ່ານ ຈະເລີນ ເຢຍປາວເຮີໄດ້ກ່າວວ່າ: ພາສາລາວ ເປັນພາສາທີ່ມີຕົ້ນກຳເນີດຕິດພັນກັບຄົນລາວມາແຕ່ດົນນານ ແລະເປັນພາສາກາງຂອງຊາດລາວເຮົາ, ເປັນພາຫະນະສື່ສານຂອງປະຊາຊົນບັນດາເຜົ່າຕ່າງໆໃນສປປ ລາວ ມີບົດບາດດ້ານການເມືອງ, ສັງຄົມ, ການສຶກສາ, ວິທະຍາສາດ, ວັດທະນະທຳ, ການພົວພັນຕ່າງປະເທດແລະ ອື່ນໆ.

ໄລຍະຜ່ານມາການໃຊ້ພາສາລາວໄດ້ຮັບການພັດທະນາ ແລະ ຂະຫຍາຍຕົວຢ່າງຕໍ່ເນື່ອງ; ໄດ້ຮັບການພັດທະນາໃຫ້ມີລັກສະນະຊາດ, ວິທະຍາສາດ ແລະ ມະຫາຊົນ ດ້ວຍແນວທາງທີ່ຖືກຕ້ອງຂອງພັກເຮົາ ແລະ ພາສາລາວ ໄດ້ຮັບການຄົ້ນຄວ້າທີ່ເລິກເຊິ່ງຂຶ້ນ ເຮັດໃຫ້ພາສາລາວມີຄວາມຫຼາກຫຼາຍ.

ເຖິງຢ່າງໃດກໍຕາມ, ໃນໄລຍະຜ່ານມາ ເຫັນວ່າການໃຊ້ພາສາລາວຍັງຂາດ ຄວາມເປັນເອກະພາບ, ມີການໃຊ້ຜິດ, ຂຽນຜິດ ແລະ ນໍາເອົາຄໍາອື່ນທີ່ໃກ້ຄຽງມາປົນເປກັບພາສາລາວຢ່າງບໍ່ເໝາະສົມ. ນອກນັ້ນ, ຍັງມີການນຳພາສາຕ່າງປະເທດມາໃຊ້ ແລະ ຂຽນບໍ່ຄືກັນ ເປັນຕົ້ນແມ່ນເຫັນຕາມປ້າຍ, ສິ່ງພິມ, ຜ່ານສື່ຕ່າງໆ, ຈາກໜັງສືທາງລັດຖະການຕ່າງໆ ແລະ ໃນຖ້ອຍຄຳຂອງພິທີກອນຕ່າງໆ ເຊິ່ງເຮັດໃຫ້ມີຜົນບໍ່ດີຕໍ່ພາສາລາວ, ຕໍ່ເອກະລັກ ແລະ ຕໍ່ ຄວາມເປັນເອກະພາບດ້ານການໃຊ້ພາສາ, ບໍ່ສາມາດບັນລຸບົດບາດຂອງສື່ກາງອັນແທ້ຈິງຂອງຊາດໄດ້ເທື່ອ.

ເຊິ່ງບັນຫາດັ່ງກ່າວແມ່ນເກີດມາຈາກຫຼາຍສາເຫດ ເປັນຕົ້ນແມ່ນຫຼັກອັກຂະຫຼະວິທີບາງປະການທີ່ຍັງບໍ່ໄດ້ກຳນົດຢ່າງລະອຽດ; ສາເຫດທີ່ເກີດຈາກການໃຊ້ອັກຂະຫຼະວິທີທີ່ເຄີຍໃຊ້ໃນສະໄໝກ່ອນ; ຈາກພາສາທ້ອງຖິ່ນ ແລະ ເຜົ່າຕ່າງໆ; ຈາກຜົນສະທ້ອນຂອງສື່, ສິ່ງພິມຕ່າງໆ ລວມເຖິງອິດທິພົນຈາກເສດຖະກິດການຄ້າພາຍນອກ ເປັນຕົ້ນເຕັກໂນໂລຊີທັນສະໄໝ; ຈາກການພັດທະນາເສດຖະກິດ – ສັງຄົມລາວ ຍັງບໍ່ທັນສູງ ມີຜົນຕໍ່ການຮຽນພາສາລາວ ແລະ ການຄົ້ນຄວ້າພາສາຍັງບໍ່ໄດ້ຢ່າງຕັ້ງໜ້າ. ສະນັ້ນ, ກອງປະຊຸມສຳມະນາໃນຄັ້ງນີ້ ແມ່ນເພື່ອພົບປະກັນລະຫວ່າງໂຄສົກລັດຖະບານ ກັບບັນດາທ່ານ, ບັນດາພາກສ່ວນທີ່ກ່ຽວຂ້ອງໃນການນຳໃຊ້ພາສາລາວ, ການຄຸ້ມຄອງ ແລະ ນໍາໃຊ້ສື່ອອນລາຍໃຫ້ມີຄວາມເປັນເອກະພາບໃນການເວົ້າ, ການຂຽນ, ການໃຊ້ຄຳສັບ, ຖ້ອຍຄຳ ແລະ ປະໂຫຍກຕ່າງໆໃຫ້ຖືກຕ້ອງຕາມໄວຍາກອນຊັດເຈນ ແລະ ຈະແຈ້ງຂຶ້ນ.

ທ່ານກ່າວຕື່ມອີກວ່າ: ສຳລັບການຄຸ້ມຄອງ, ນຳໃຊ້ສື່ສັງຄົມອອນລາຍໃນໄລຍະຜ່ານມາເຫັນວ່າ ສື່ມວນຊົນໄດ້ໂຄສະນາອອກຂ່າວໄດ້ດີ ຊ່ວຍໃຫ້ສັງຄົມມີຄວາມເຂົ້າໃຈຢ່າງຈະແຈ້ງ – ເລິກເຊິ່ງ. ແຕ່ພ້ອມກັນນັ້ນ, ຍັງມີຈຸດອ່ອນບາງປະການ ເຊັ່ນ: ອອກຂ່າວບໍ່ຄົບຖ້ວນຕາມລັດຖະທຳມະນູນ ແລະ ກົດໝາຍກຳນົດ. ນອກນັ້ນ, ຍັງມີສື່ອອນລາຍຈຳນວນໜຶ່ງທີ່ອອກຂ່າວໃຫ້ຂໍ້ມູນຕ່າງໆນາໆທີ່ບໍ່ຖືກຕາມຄວາມຈິງ ຫຼື ບິດເບືອນຄວາມຈິງ. ດັ່ງນັ້ນ, ຄຽງຄູ່ກັບການກຳແໜ້ນຫຼັກການໃຊ້ພາສາລາວແລ້ວ ພວກເຮົາຕ້ອງກຳແໜ້ນຫຼັກການຄຸ້ມຄອງ ແລະ ນໍາໃຊ້ສື່ອອນລາຍໃຫ້ຖືກຕ້ອງຕາມກົດໝາຍ ແລະ ລະບຽບການ, ຖືກກັບຄວາມຈິງ, ຮັບປະກັນລັກສະນະວິທະຍາສາດ, ສ້າງຄວາມຮັບຮູ້ເຂົ້າໃຈເປັນເອກະພາບ, ເປັນປະໂຫຍດແກ່ການພັດທະນາປະເທດຊາດ.

ທ່ານ ສະຫວັນຄອນ ຣາຊມຸນຕຣີ ຮອງລັດຖະມົນຕີ ກະຊວງຖວທ ກ່າວວ່າ: ການນຳໃຊ້ພາສາລາວ ແລະ ການຄຸ້ມຄອງ ນຳໃຊ້ສື່ອອນລາຍ ເປັນວຽກທີ່ມີຄວາມສຳຄັນ ແລະ ຈຳເປັນ ເພາະເປັນສິ່ງທີ່ກ່ຽວພັນການໃຊ້ຄຳສັບ ຖ້ອຍຄຳພາສາລາວໃນການສື່ສານແລະ ເຫັນວ່າເປັນສິ່ງທ້າທາຍຫຼາຍໃນຍຸກດິຈິຕອລ ໃນການປັບປຸງ, ແກ້ໄຂໃຫ້ສັງຄົມມີຄວາມເຂົ້າໃຈຈະແຈ້ງຊັດເຈນເປັນເອກະພາບໃຫ້ສື່ມວນຊົນລາວສາມາດເປັນອາວຸດໃນການໂຄສະນາ ສາມາດນຳພາແນະແນວສ້າງຄວາມຮັບຮູ້ເຂົ້າໃຈກ່ຽວກັບ ຄວາມຈິງ ເຫດການໄປສູ່ສັງຄົມເພື່ອປະກອບສ່ວນເຂົ້າໃນພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ.