ກົມອາຫານ ແລະ ຢາ ຫາລືແກ້ໂຄສະນາ ຢາ, ອາຫານເສີມ ເກີນຈິງ

555

ກົມອາຫານ ແລະ ຢາ ກະຊວງສາທາລະນະສຸກ ຈັດກອງປະຊຸມປະສານງານກ່ຽວກັບຂະແໜງການກ່ຽວຂ້ອງ ດ້ານວຽກງານຄຸ້ມຄອງໂຄສະນາອາຫານ, ຢາ ແລະ ຜະລິດຕະພັນການແພດ ຂຶ້ນໃນວັນທີ 25 ເມສາຜ່ານມາ ທີ່ຫ້ອງປະຊຸມກະຊວງດັ່ງກ່າວ ໂດຍການເປັນປະທານຂອງ ທ່ານ ດຣ. ບຸນຊູ ແກ້ວຫາວົງ ຮອງຫົວໜ້າກົມອາຫານ ແລະ ຢາ, ທ່ານ ອິນປອນ ນະຄອນສີ ຮອງຫົວໜ້າກົມສື່ມວນຊົນ, ບັນດາແຂກຈາກກົມອະນາໄມ ແລະ ສົ່ງເສີມສຸຂະພາບ, ກົມສິ່ງແວດລ້ອມ, ກະຊວງ ປກສ, ກົມການຄ້າພາຍໃນ, ກົມພິມຈໍາໜ່າຍ, ສື່ມວນຊົນ ແລະ ພາກສ່ວນກ່ຽວຂ້ອງເຂົ້າຮ່ວມ.

ທ່ານ ພຸປຣະສິດ ອຸດົມສິນ ຮອງພະແນກຄຸ້ມຄອງຂ່າວສານ, ກົມອາຫານ ແລະ ຢາ ກ່າວວ່າ: ຈຸດປະສົງການຈັດກອງປະຊຸມນີ້ ເພື່ອໃຫ້ຫຼາຍພາກສ່ວນທີ່ກ່ຽວຂ້ອງໄດ້ມາຮ່ວມກັນປຶກສາຫາລື, ແລກປ່ຽນຄໍາຄິດຄໍາເຫັນ ກ່ຽວກັບວຽກງານການຄຸ້ມຄອງເນື້ອໃນການໂຄສະນາອາຫານ, ຢາ ແລະ ຜະລິດຕະພັນການແພດ ເພື່ອໃຫ້ຜູ້ປະກອບການທີ່ດໍາເນີນທຸລະກິດດ້ານອາຫານ, ຢາ ແລະ ຜະລິດຕະພັນການແພດ ທີ່ຈະໂຄສະນາໃຫ້ປະຕິບັດຕາມລະບຽບກົດໝາຍ ແລະ ຂໍ້າກໍານົດກ່ຽວກັບການໂຄສະນາອາຫານ, ຢາ ແລະ ຜະລິດຕະພັນການແພດ, ໃຫ້ຮູ້ຈັກປົກປ້ອງຜູ້ບໍລິໂພກ, ໃຫ້ເຜີຍແຜ່ຂໍ້ມູນ – ຂ່າວສານທີ່ຖືກຕ້ອງ ບໍ່ໃຫ້ໂຄສະນາເກີນຄວາມເປັນຈິງ.

ທ່ານ ດຣ. ບຸນຊູ ແກ້ວຫາວົງ ກ່າວວ່າ: ກອງປະຊຸມຄັ້ງນີ້ແມ່ນມີຄວາມໝາຍຄວາມສຳຄັນຫຼາຍກ່ຽວກັບວຽກງານໂຄສະນາຂ່າວສານ ເຊິ່ງຍາມໃດກະຊວງສາທາລະນະສຸກ ແລະ ພາກສ່ວນກ່ຽວຂ້ອງ ກໍເປັນຫ່ວງເປັນໄຍສຸຂະພາບຂອງທຸກໆທ່ານ. ຢູ່ໃນສັງຄົມທຸກມື້ນີ້ສາມາດສັງເກດເຫັນໄດ້ຢ່າງຊັດເຈນໃນການໂຄສະນາສັບພະຄຸນຂອງສິນຄ້າເກີນຄວາມເປັນຈິງ ຜະລິດຕະພັນຊະນິດດຽວສາມາດຮັກສາພະຍາດໄດ້ນາໆຊະນິດ, ຮັບປະທານແລ້ວດີທັງພະຍາດ ແລະ ຜິວພັນກໍສົດໃສ ໂຄສະນາເພື່ອໃຫ້ຜູ້ບໍລິໂພກເຊື່ອຖືວ່າມັນມີສັບພະຄຸນດີແທ້ ຖ້າຫາກສິນຄ້າ ຫຼື ຜະລິດຕະພັນຊະນິດໃດບໍ່ໄດ້ຜ່ານອົງການອາຫານ ແລະ ຢາ ແມ່ນຖືວ່າການໂຄສະນານັ້ນບໍ່ເປັນຕາເຊື່ອຖື ເວລານໍາໄປບໍລິໂພກ ນອກຈາກຈະເຮັດໃຫ້ເສຍເງິນລ້າໆແລ້ວ ຮ້າຍແຮງໄປກວ່ານັ້ນສິນຄ້າບາງຊະນິດອາດເປັນອັນຕະລາຍເຖິງຊີວິດໄດ້ ໂດຍສະເພາະແມ່ນຜະລິດຕະພັນຈໍາພວກອາຫານເສີມ, ຖ້າສິນຄ້າຊະນິດໃດຫາກໄດ້ຜ່ານອົງການອາຫານ ແລະ ຢາແລ້ວ ນໍາມາບໍລິໂພກແລ້ວດີແທ້ ກໍຊ່ວຍກັນສົ່ງເສີມ ແຕ່ຖ້າຫາກໂຄສະນາວ່າມີສັບພະຄຸນຫຼາກຫຼາຍ ແລະ ບໍ່ໄດ້ຜ່ານອົງການອາຫານ ແລະ ຢາ ກໍໃຫ້ຊ່ວຍກັນສະກັດກັ້ນ.

ທ່ານ ດຣ. ບຸນຊູ ຍັງຮຽກຮ້ອງໃຫ້ທຸກຄົນຊ່ວຍເປັນຫູເປັນຕານໍາກັນ ເນື່ອງຈາກວ່າຜະລິດຕະພັນດຽວນີ້ມີການແຜ່ຂະຫຍາຍຫຼາຍ ໂດຍສະເພາະແມ່ນທາງອອນລາຍ. ຄືດັ່ງທີ່ຜ່ານມາ ຜະລິດຕະພັນຊະນິດໃດຫາກໂຄສະນາຫຼາຍເກີນຄວາມເປັນຈິງ ແຕ່ສິນຄ້າບໍ່ໄດ້ມາດຕະຖານ, ບໍ່ໄດ້ຜ່ານອົງການອາຫານ ແລະ ຢາ ທາງພາກສ່ວນກ່ຽວຂ້ອງກໍໄດ້ສັ່ງປິດບໍ່ໃຫ້ດໍາເນີນການຕໍ່.