ທ່ານສີສະຫວາດ ແກ້ວບຸນພັນ ຢ້ຽມຢາມໄຊຍະບູລີ ເນັ້ນໜັກພິເສດວຽກ ປກສ-ປກຊ

505

ໃນລະຫວ່າງວັນທີ 22-23 ເມສາ 2019 ນີ້, ທ່ານ ສີສະຫວາດ ແກ້ວບຸນພັນ ອາດີດປະທານສູນກາງແນວລາວສ້າງຊາດ ພ້ອມດ້ວຍຄະນະ ໄດ້ຢ້ຽມຢາມ ແລະ ເຮັດວຽກຢູ່ແຂວງ ໄຊຍະບູລີ, ໃຫ້ການຕ້ອນຮັບໂດຍ ທ່ານ ພົງສະຫວັນ ສິດທະວົງ ເຈົ້າແຂວງ ໄຊຍະບູລີ ພ້ອມດ້ວຍການນໍາທຸກພາກສ່ວນຂອງແຂວງໃຫ້ການຕ້ອນຮັບຢ່າງອົບອຸ່ນ.

ໂອກາດດັ່ງກ່າວ ທ່ານ ພົງສະຫວັນ ສິດທະວົງ ເຈົ້າແຂວງ ໄຊຍະບູລີ ໄດ້ລາຍງານສະພາບພົ້ນເດັ່ນ ໃນການຈັດຕັ້ງປະຕິບັດ ແຜນພັດທະນາເສດຖະກິດ-ສັງຄົມ ໃນໄລຍະ 1 ປີ ຜ່ານມາ ແລະ ວຽກຈຸດສຸມສໍາຫຼັບ ປີ 2019, ປີ 2018 ຜ່ານມານີ້, ເສດຖະກິດຂອງແຂວງສືບຕໍ່ຂະຫຍາຍຕົວໃນລະດັບ 8,7%, ລວມຍອດຜະລິດຕະພັນພາຍໃນບັນລຸ 9.555 ຕື້ກີບ, ສະເລ່ຍຕໍ່ຫົວຄົນເທົ່າກັບ 24.096 ລ້ານກີບ, ເທົ່າກັບ 3.012 ໂດລາສະຫະລັດ, ໂຄງປະກອບເສດຖະກິດໄດ້ຫັນປ່ຽນໄປຕາມທິດທີ່ຕັ້ງໜ້າ, ຂະແໜງກະສິກຳ ແລະປ່າໄມ້ ເພີ່ມຂຶ້ນ 3,3%ກວມ 30,4% ຂອງ (GDP); ຂະແໜງອຸດສາຫະກຳເພີ່ມຂຶ້ນ 11,6% ກວມເອົາ 30%; ການບໍລິການ ເພີ່ມຂຶ້ນ 6,7% ກວມ 39,6% ຂອງ(GDP), ດ້ານລາຍຮັບເຂົ້າງົບປະມານ ລວມທັງພູດສູນກາງ ແລະ ທ້ອງຖິ່ນປະຕິບັດໄດ້ 863,30 ຕື້ກີບ, ເທົ່າກັບ 99,84%, ໃນນີ້ພູດທ້ອງຖິ່ນປະຕິບັດໄດ້ 236,74 ຕື້ກີບ ເທົ່າກັບ 88,92% (ບໍ່ສາມາດບັນລຸແຜນການ).

ເຖິງຢ່າງໃດກໍຕາມ ຄະນະພັກ, ອົງການປົກຄອງແຕ່ລະຂັ້ນ, ຂະແໜງການກ່ຽວຂ້ອງ ກໍໄດ້ມີຄວາມພະຍາຍາມເອົາໃຈໃສ່ທຽບໃສ່ ຕົວເລກປະຕິບັດຜ່ານມາ ສາມາດປະຕິບັດໄດ້ລື່ນ 6,02%; ສໍາຫຼັບລາຍຮັບປີ 2019 ຮອດປະຈຸບັນ ປະຕິບັດໄດ້ 235,48 ຕື້ກີບ, ເທົ່າກັບ 24,49%,ໃນນີ້ ພູດສູນກາງປະຕິບັດໄດ້ 185,60 ຕື້ກິບ ເທົ່າກັບ 26,19%, ພູດທ້ອງຖິ່ນປະຕິບັດໄດ້ 49,88 ຕື້ກີບເທົ່າກັບ 19,70%, ປະຕິບັດລາຍຈ່າຍໄດ້ 51,93 ຕື້ກີບ, ເທົ່າກັບ 9,47% ຂອງແຜນການປີ.

ຈາກນັ້ນ ທ່ານ ສີສະຫວາດ ແກ້ວບຸນພັນ ອາດີດປະທານສູນກາງແນວລາວສ້າງຊາດ ກໍ່ໄດ້ຍ້ອງຍໍຊົມເຊີຍຕໍ່ຜົນງານທີ່ແຂວງ ໄຊຍະບູລີ ຍາດມາໄດ້ ແລະ ໄດ້ເນັ້ນໜັກໃຫ້ການນໍາຂອງແຂວງທຸກພາກສ່ວນຈົ່ງເອົາໃຈໃສ່ຕໍ່ວຽກງານປກຊ-ປກສ ລົງສູ່ຮາກຖານ, ເຜີຍແພ່ວຽກງານດັ່ງກ່າວສູ່ປະຊາຊົນໃຫ້ເຂົ້າໃຈ ແລະ ເຫັນໄດ້ຄວາມສໍາຄັນ, ເພື່ອພ້ອມກັນເປັນຫູເປັນຕາປ້ອງກັນບໍ່ໃຫ້ກຸ່ມຄົນບໍ່ດີເຂົ້າມາປັ່ນປ່ວນໄດ້, ເອົາໃຈໃສ່ຮັກສາຄວາມສາມັກຄີໃຫ້ເປັນນໍ້າໜຶ່ງໃຈດຽວ, ເອົາໃຈໃສ່ປັບປຸງກໍ່ສ້າງພັກໃຫ້ມີຄວາມເຂັ້ມແຂງ ແລະ ໜັກແໜ້ນ, ພ້ອມທັງຂະຫຍາຍພັກໃຫ້ກວ້າງຂວາງ, ເອົາໃຈໃສ່ຕໍ່ວຽກງານເສດຖະກິດ-ສັງຄົມໃຫ້ເຂັ້ມແຂງ ດ້ວຍການສົ່ງເສີມປະຊາຊົນບັນດາເຜົ່າເຮັດການຜະລິດເປັນສິນຄ້າສົ່ງອອກຕ່າງປະເທດໃຫ້ຫຼາຍ, ແນໃສ່ເຮັດໃຫ້ຊີວິດການເປັນຢູ່ຂອງປະຊາຊົນໃຫ້ຮັ່ງມີຂຶ້ນເລື້ອຍໆ.

ທ່ານຍັງເນັ້ນອີກວ່າ ໃຫ້ແຂວງ ໄຊຍະບູລີເອົາໃຈໃສ່ໃນການກະກຽມດໍາເນີນກອງປະຊຸມ 3 ຂັ້ນໃຫ້ໄດ້ຮັບຜົນສໍາເລັດ, ເລືອກໃຫ້ໄດ້ບຸກຄະລາກອນທີ່ດີ,ມີຄວາມຮູ້ ແລະ ປະສົບການເພື່ອປະກອບເຂົ້າໃນແຕ່ລະຂົງເຂດວຽກງານ, ໂອກາດດຽວກັນ ການນໍາຂອງແຂວງກໍ່ໄດ້ນໍາພາທີມງານຂອງ ທ່ານ ສີສະຫວາດ ແກ້ວບຸນພັນ ອາດີດປະທານສູນກາງແນວລາວສ້າງຊາດ ເຂົ້າຢ້ຽມຊົມໂຄງການກໍ່ສ້າງເຂື່ອນໄຟຟ້າພະລັງງານນໍ້າ-ນໍ້າຂອງ ແລະ ຈັດພິທີກູລາບາສີຕື່ມອີກ.

ຂ່າວໂດຍ: ອຸ່ນເຮືອນ ໂພທິລັກ