ມອບ – ຮັບສະຖານີວັດແທກລະດັບນ້ຳ ແລະ ຕິດຕາມສະພາບອາກາດ

466

ວັນທີ 19 ເມສາ 2019 ທີ່ກະຊວງວິທະຍາສາດ ແລະ ເຕັກໂນໂລຊີ ໄດ້ຈັດພິທີ ມອບ – ຮັບ ສະຖານີວັດແທກລະດັບນໍ້າ ແລະ ຕິດຕາມສະພາບອາກາດ ( ເຄື່ອງໂທລະມາດ ) ລະຫວ່າງ ທ່ານ ສຸມານະ ຈຸນລາມະນີ ຫົວໜ້າກົມເຕັກໂນໂລຊີ ແລະ ນະວັດຕະກຳ ກະຊວງວິທະຍາສາດ ແລະ ເຕັກ ໂນໂລຊີ ເປັນຜູ້ມອບ ແລະ ຮັບໂດຍ ທ່ານ     ຂັນມະນີ ຂຸນພົນ ຫົວໜ້າກົມອຸຕຸນິຍົມ ແລະ ອຸທົກກະສາດ ກະຊວງຊັບພະຍາກອນທຳມະຊາດ ແລະ ສິ່ງແວດລ້ອມ ເປັນກຽດເຂົ້າຮ່ວມເປັນສັກຂີພິຍານຂອງ ທ່ານ ໄຊນະຄອນ ອິນທະວົງ ຮອງລັດຖະມົນຕີ ກະຊວງຊັບພະຍາກອນທຳມະຊາດ ແລະ ສິ່ງແວດລ້ອມ ພ້ອມດ້ວຍພາກສ່ວນ.

ທ່ານ ສຸມານະ ຈຸນລາມະນີ ຫົວໜ້າກົມເຕັກໂນໂລຊີ ແລະ ນະວັດຕະກຳ ກ່າວວ່າ: ສະຖານີວັດແທກລະດັບນ້ຳ ແລະ ຕິດຕາມສະພາບອາກາດ ( ເຄື່ອງໂທລະມາດ ) ແມ່ນການຮ່ວມມືໂຄງການຄົ້ນຄວ້າ – ທົດລອງນຳໃຊ້ ວິທະຍາສາດ ແລະ ເຕັກໂນໂລຊີ ເຂົ້າໃນການຄຸ້ມຄອງຊັບພະຍາກອນນ້ຳ ເຊິ່ງໄດ້ຮັບການຊ່ວຍເຫຼືອຈາກສະຖາບັນຂໍ້ມູນ – ຂ່າວສານ ຊັບພະຍາກອນນ້ຳ ແລະ ກະສິກຳ ( HAII ) ກະຊວງວິທະຍາສາດ ແລະ ເຕັກໂນໂລຊີ ຣາຊະອານາຈັກໄທ, ກົມເຕັກໂນໂລຊີ ແລະ ນະວັດຕະກຳ ໃນນາມຄູ່ຮ່ວມມືຈຶ່ງໄດ້ຄົ້ນຄວ້າ – ທົດລອງນຳໃຊ້ ເຫັນວ່າເປັນເຕັກໂນໂລຊີທີ່ທັນສະໄໝ ແລະ ເໝາະສົມນຳໃຊ້ເຂົ້າໃນການຕິດຕາມສະພາບອາກາດ, ລະດັບນ້ຳ, ປະລິມານນ້ຳຝົນ ເພື່ອເປັນການຫຼຸດຜ່ອນໄພທຳມະຊາດ ເປັນຕົ້ນ: ໄພແຫ້ງແລ້ງ ແລະ ໄພນ້ຳຖ້ວມ, ຮັບປະກັນໃຫ້ມີນ້ຳໃຊ້ເຂົ້າໃນການຜະລິດກະສິກຳໃນລະດູແລ້ງ ແລະ ມີນ້ຳໃຊ້ຕະຫຼອດລະດູ ໂດຍສະເພາະການຜະລິດກະສິກຳຂອງຊາວກະສິກອນ ເພື່ອບັນລຸເປົ້າໝາຍການພັດທະນາ ແລະ ການແກ້ໄຂຄວາມທຸກຍາກຂອງປະຊາຊົນ.

ລັດຖະບານໃຫ້ຄວາມສຳຄັນກ່ຽວກັບການປ້ອງກັນ ແລະ ຕ້ານໄພແຫ້ງແລ້ງ ແລະ ນ້ຳຖ້ວມ ໂດຍອີງຕາມສະພາບ ຄວາມເອົາແນ່ເອົານອນຂອງສະພາບດິນຟ້າອາກາດບໍ່ໄດ້ ອີງຕາມການລາຍງານຂອງກະຊວງພະຍາກອນທຳມະຊາດ ແລະ ສິ່ງແວດລ້ອມ ປັດຈຸບັນລັດຖະບານໄດ້ສຳເລັດໂຄງການກ່ຽວກັບການສ້າງສະຖານີວັດແທກລະດັບນ້ຳ ແລະ ຕິດຕາມສະພາບອາກາດຢູ່ຫຼາຍແຫ່ງ ໂດຍສະເພາະແມ່ນຈຸດທີ່ມີຄວາມສ່ຽງ ເຊິ່ງໃນນະຄອນຫຼວງສຳເລັດແລ້ວ ປະມານ 4 ສະຖານີ. ຈາກນັ້ນ, ກໍມີແຂວງບໍລິຄຳໄຊ, ຄຳມ່ວນ ແລະ ແຂວງສະຫວັນນະເຂດ.