ໄຟຟ້າ ນວ ຊີ້ແຈງບັນຫາໄຟມອດ ເກີດຈາກສາຍໄຟຂາດ ກະທົບ 2 ຕົວເມືອງ

387

ຝ່າຍປະຕິບັດການໄຟຟ້ານະຄອນຫຼວງໄດ້ຊີ້ແຈງເຖິງສາເຫດຂອງໄຟຟ້າມອດເປັນເວລາ 1 ຊົ່ວໂມງ ໃນຕອນຄ່ຳວັນທີ 08 ເມສາ 2019ຜ່ານມາ ເຊິ່ງສາເຫດຫຼັກແມ່ນເກີດມາຈາກໄຟຟ້າລັດວົງຈອນເຮັດໃຫ້ສາຍສົ່ງສະຖານີໂພນຕ້ອງ -ດົງນາໂຊກ ຂາດຈາກເສົາແລ້ວຕົກລົງໜ້າດິນ ລວມທັງກະທົບໝໍ້ແປງໃຫຍ່ອີກ 2 ໜ່ວຍຊ໊ອດເຮັດໃຫ້ປະຊາຊົນໃນເຂດເມືອງຈັນທະບູລີ ແລະ ເມືອງສີໂຄດຕະບອງ ຕ້ອງໃດ້ງົມມືດ.ຂະນະທີ່ໄຟຟ້າກໍເຕືອນໃຫ້ມີສະຕິໃນການຊົມໃຊ້ໄຟໃນລະຫວ່າງ 18:00 ຫາ 21:00 ໂມງເນື່ອງຈາກໄລຍະນີ້ອາກາດຮ້ອນອົບເອົ້າອາດມີຄວາມສ່ຽງໃນການເກີດອັກຄີໄພ.

ທ່ານ ເຄນ ເທບວົງສາຫົວໜ້າຝ່າຍປະຕິບັດການໄຟຟ້ານະຄອນຫຼວງ ແລະ ໄດ້ອະທິບາຍຕໍ່ສື່ມວນຊົນກ່ຽວກັບສາເຫດຂອງໄຟຟ້າມອດໃນຄືນວັນທີ 8 ເມສາຜ່ານມາ ວ່າ: ສໍາລັບຕົ້ນເຫດຂອງໄຟຟ້າມອດເກີດມາຈາກສາຍສົ່ງສະຖານີລະຫວ່າງ ສະຖານນີໂພນຕ້ອງ ເມືອງຈັນທະບູລີ ຫາ ສະຖານນີດົງນາໂຊກ ເມືອງສີໂຄດຕະບອງ ເກີດໄຟຟ້າລັດວົງຈອດເຮັດໃຫ້ຈຸດເຊື່ອມຕໍ່ຂອງສາຍໄຟຂາດແລ້ວຕົກລົງດິນ ເມື່ອເປັນແນວນັ້ນກະແສໄຟບໍ່ຕັດອັດຕະໂນມັດ ຈຶ່ງເຮັດໃຫ້ໝໍ້ແປງໃຫຍ່ 2 ໜ່ວຍເກີດຊ໊ອດ ຈາກທັງໝົດ 4 ໜ່ວຍ ແລະ ເກີດມີໄຟແຕກເປັນໄລຍະໆຢູ່ໜ້າດິນສົ່ງຜົນກະທົບໂດຍກົງຕໍ່ປະຊາຊົນທີ່ອາໄສຢູ່ບາງເຂດສາຍສົ່ງດັ່ງກ່າວບໍ່ມີໄຟຟ້າໃຊ້ຊົ່ວຄາວ.

ເມື່ອເປັນແນວນັ້ນທີມງານທີ່ປະຈໍາການໃນແຕ່ລະຈຸດກໍໄດ້ຮີບຮ້ອນຂຸ້ນຂ້ຽວສ້ອມແປງຈົນສາມາດເປີດນໍາໃຊ້ໄດ້ໃນຊົ່ວໂມງຕໍ່ມາ, ສິ່ງດັ່ງກ່າວໄດ້ສ້າງຜົນກະທົບໂດຍກົງຕໍ່ປະຊາຊົນເນື່ອງຈາກອາກາດຮ້ອນອົບເອົ້າເຮັດໃຫ້ບໍ່ສາມາດເປີດພັດລົມ ຫຼື ແອໄດ້.ແຕ່ເຖິງຢ່າງໃດກໍຕາມ, ຄວາມເສຍຫາຍດັ່ງກ່າວກໍກະທົບແຕ່ອຸປະກອນໄຟຟ້າເທົ່ານັ້ນແຕ່ບໍ່ໄດ້ກະທົບຕໍ່ອຸປະກອນໄຟຟ້າ ຫຼື ເຄື່ອງຊົມໃຊ້ຂອງພໍ່ແມ່ປະຊາຊົນແຕ່ຢ່າງໃດ.

ດ້ານ ທ່ານ ວົງສາ ນັນທະວົງຮອງຫົວໜ້າຝ່າຍປະຕິບັດການໄຟຟ້ານະຄອນຫຼວງ ຍັງໄດ້ອະທິບາຍຕື່ມອີກ ວ່າ:ເມື່ອສາຍສົ່ງຂາດກໍເຮັດໃຫ້ສາຍແຈກໝາຍເລກ 51 ເຂດສະຖານີໂພນຕ້ອງ, ໜອງທາ, ດົງປ່າແຫຼບ, ສະຫວ່າງ, ດອນແດງ, ທົ່ງຂັນຄໍາ, ສີດໍາດວນ, ສີສະຫວາດ ແລະ ບ້ານອື່ນໆທີ່ສາຍແຈກດັ່ງກ່າວຢັ່ງຜ່ານຖືກໄຟມອດເປັນເວລາຊົ່ວໂມງເຄິ່ງ. ນອກນັ້ນ, ສາຍແຈກໝາຍເລກ 56 ເຂດບ້ານໜອງປີງ, ໂພນຄໍາ, ໜອງດ້ວງ ແລະ ອື່ນໆກໍໄດ້ຮັບຜົນກະທົບຈາກໄຟຟ້າມອດເຊັ່ນກັນ ເນື່ອງຈາກສາຍສົ່ງຂາດແລ້ວເຮັດໃຫ້ສາຍແຈກຂາດກະແສໄຟຟ້າແລ່ນຜ່ານ.

ປັດຈຸບັນທາງພະນັກງານໄຟຟ້າກໍໄດ້ເກັບກໍາຂໍ້ມູນກ່ຽວກັບຜົນເສຍຫາຍເບື້ອງຕົ້ນແລ້ວຈະລາຍງານໃຫ້ຊາບອີກຄັ້ງ, ສ່ວນແຜນການໃນຕໍ່ໜ້າແມ່ນຈະສືບຕໍ່ກວດກາຄືນໃໝ່ລວມທັງການຕັ້ງຄ່າລະບົບປ້ອງກັນທາງດ້ານເຕັກນິກ ໂດຍສະເພາະແມ່ນເຂດຊຸມຊົນໃນ 4 ຕົວເມືອງ( ຈັນທະບູລີ, ໄຊເສດຖາ, ສີໂຄດຕະບອງ ແລະ ສີສັດຕະນາກ ).

ເຖິງຢ່າງໃດກໍຕາມ, ຝ່າຍປະຕິບັດການໄຟຟ້ານະຄອນຫຼວງຍັງພົບວ່າອັດຕາການຊົມໃຊ້ໄຟຟ້າໃນໄລຍະເດືອນມັງກອນ ຫາ ເດືອນກຸມພາ 2019 ເພີ່ມຂຶ້ນເປັນ 12% ຫາກທຽບໃສ່ໄລຍະດຽວກັນຂອງປີ 2018 ຜ່ານມາ ເຫດຜົນແມ່ນຍ້ອນການເພີ່ມຂຶ້ນຂອງປະຊາກອນ ແລະ ອາກາດຮ້ອນຂຶ້ນທຸກປີ. ຈຶ່ງຮຽກຮ້ອງມາຍັງຜູ້ຊົມໃຊ້ໄຟຟ້າໄລຍະນີ້ຈົ່ງມີສະຕິໂດຍສະເພາະແມ່ນໄລຍະ 18:00 ຫາ 21:00 ໂມງ ເຊິ່ງເປັນໄລຍະທີ່ປະຊາຊົນຊົມໃຊ້ໄຟຫຼາຍທີ່ສຸດ.