ຄິວລົດສາຍເໜືອກຽມພ້ອມທຸກດ້ານ ຮອງຮັບຜູ້ໂດຍສານໄລຍະປີໃໝ່ລາວ

442

ໄລຍະສະເຫຼີມສະຫຼອງບຸນປີໃໝ່ລາວທີ່ຈະມາເຖິງນີ້,ສະຖານີຂົນສົ່ງໂດຍສານສາຍເໜືອ ພາຍໃນ – ຕ່າງປະເທດນະຄອນຫຼວງວຽງຈັນ ໄດ້ກຽມພ້ອມທຸກດ້ານ ເປັນຕົ້ນການເພີ່ມຖ້ຽວໂດຍສານຫຼາຍຂຶ້ນເທົ່າຕົວ, ມີການກວດກາດ້ານເຕັກນິກລົດ ແລະ ໂຊເຟີທີ່ຊຳນານທາງເພື່ອຮັບປະກັນການສະໜອງລົດພຽງພໍບໍ່ໃຫ້ມີຄົນໂດຍສານຕົກຄ້າງ.

ທ່ານ ນາງ ຈິດປະສົງ ຫຼວງເດດມີໄຊ ຜູ້ອຳນວຍການ  ສະຖານີຂົນສົ່ງໂດຍສານສາຍເໜືອ ພາຍໃນ – ຕ່າງປະເທດ ໄດ້ກ່າວໃນມື້ວານນີ້ ວ່າ: ເພື່ອເປັນການອຳນວຍຄວາມສະດວກໃຫ້ແກ່ຜູ້ໂດຍສານທັງພາຍໃນ ແລະ ຕ່າງປະເທດ ທີ່ຈະເດີນທາງກັບບ້ານກັບເຮືອນ ຫຼື ໄປທ່ອງທ່ຽວຢູ່ແຂວງພາກເໜືອຢ່າງພຽງພໍ ແລະ ທັນກັບຄວາມຮຽກຮ້ອງຕ້ອງການໃນໄລຍະປີໃໝ່ລາວນີ້, ສະຖານີຂົນສົ່ງໂດຍສານສາຍເໜືອ ພາຍໃນ ແລະ ຕ່າງປະເທດ ໄດ້ຮ່ວມກັບບັນດາບໍລິສັດທີ່ມານຳໃຊ້ສະຖານີສາຍເໜືອ ແມ່ນໄດ້ກຽມພ້ອມຂົນສົ່ງຄົນໂດຍສານດ້ວຍການເພີ່ມຈຳນວນຖ້ຽວລົດທຸກສາຍທາງເທົ່າຕົວ, ສ່ວນລາຄາແມ່ນປົກກະຕິ ໂດຍຈະບໍ່ໄດ້ມີການຂຶ້ນລາຄາ.

ລົດທຸກຄັນທີ່ຈະໃຊ້ແລ່ນແມ່ນຕ້ອງໄດ້ມີການກວດເຊັກລົດໂດຍສານລະອຽດ ແລະ ມີໂຊເຟີລົດທີ່ຊຳນານທາງເປັນຢ່າງດີ. ພ້ອມນີ້, ທ່ານຍັງຮຽກຮ້ອງໃຫ້ບັນດາຜູ້ໂດຍສານມາຊື້ປີ້ ແລະ ຂຶ້ນລົດຢູ່ສະຖານີ ເພື່ອຮັບປະກັນການຂຶ້ນລົດຜິດ, ໄດ້ນັ່ງຕັ່ງເສີມ ແລະ ອື່ນໆ.

ໂອກາດດຽວກັນນີ້, ພະແນກໂຍທາທິການ ແລະ ຂົນສົ່ງ ນະຄອນຫຼວງວຽງຈັນໄດ້ຮ່ວມກັບສະຖານີຂົນສົ່ງໂດຍສານສາຍເໜືອ ພາຍໃນ ແລະ ຕ່າງປະເທດໄດ້ຈັດຕັ້ງການເຜີຍແຜ່ກົດລະບຽບຈະລາຈອນ ແລະ ຫຼັກການຂັບຂີ່ປອດໄພໃນໄລຍະປີໃໝ່ລາວໃຫ້ແກ່ບັນດາຜູ້ປະກອບການຂົນສົ່ງໂດຍສານ ແລະ ໂຊເຟີລົດຢູ່ສະຖານີຂົນສົ່ງດັ່ງກ່າວເພື່ອເຮັດໃຫ້ການຈະລາຈອນຕາມທາງຫຼວງໃນຂອບເຂດທົ່ວປະເທດມີຄວາມເປັນລະບຽບຮຽບຮ້ອຍ, ມີຄວາມປອດໄພ ແລະ ຫຼຸດຜ່ອນການເກີດອຸບັດເຫດທີ່ອາດຈະເກີດຂຶ້ນ.