ກໍາມາທິການງົບປະມານ ສະພາແຫ່ງຊາດ 4 ປະເທດຮ່ວມສຳມະນາທີ່ຫຼວງພະບາງ

456

ລະຫວ່າງວັນທີ 9 – 10 ເມສາ 21019 ທີ່ໂຮງແຮມຫຼວງພະບາງວິວ ນະຄອນຫຼວງພະບາງ ແຂວງຫຼວງພະບາງ ໄດ້ມີກອງປະຊຸມສໍາມະນາຮ່ວມ 4 ກໍາມາທິການງົບປະມານ ສະພາແຫ່ງຊາດ ລາວ, ກໍາປູເຈຍ, ມຽນມາ ແລະ ຫວຽດນາມ ຄັ້ງທີ 8 ໃນຫົວຂໍ້: ການສ້າງຄວາມເຂັ້ມແຂງໃຫ້ແກ່ກຳມາທິການງົບປະມານ ໃນການຕິດຕາມກວດກາ ການຈັດຕັ້ງປະຕິບັດງົບປະມານແຫ່ງລັດ ໂດຍການເປັນປະທານຂອງ ທ່ານ ນາງປານີ ຢາທໍ່ຕູ້ ປະທານສະພາແຫ່ງຊາດລາວ, ມີບັນດາປະທານກໍາມາທິການ, ຫົວໜ້າຄະນະຜູ້ແທນ ຈາກສະພາແຫ່ງຊາດ ແຫ່ງຣາຊະອານາຈັກກໍາປູເຈຍ, ສະຫະພາບມຽນມາ, ສສ ຫວຽດນາມ ແລະ ລາວ ພ້ອມດ້ວຍຮອງລັດຖະມົນຕີ, ສະມາຊິກສະພາແຫ່ງຊາດ ແລະຜູ້ແທນສັງເກດການຈາກອົງການຈັດຕັ້ງສາກົນຕ່າງໆເຂົ້າຮ່ວມ.

ກອງປະຊຸມຄັ້ງນີ້ເປັນການທົບທວນຄືນການຈັດຕັ້ງປະຕິບັດ ແລະ ເສີມຂະຫຍາຍຜົນສຳເລັດຂອງກອງປະຊຸມ ຄັ້ງທີ 7 ທີ່ຈັດຂຶ້ນຢູ່ນະຄອນພະນົມເປັນ ແຫ່ງຣາຊະອານາຈັກກຳປູເຈຍ ໃນປີ 2017 ຜ່ານມາ
ພາຍໃຕ້ຫົວຂໍ້: ການສ້າງຄວາມເຂັ້ມແຂງໃຫ້ແກ່ກຳມາທິການງົບປະມານ ໃນການຕິດຕາມກວດກາ ການຈັດຕັ້ງປະຕິບັດງົບປະມານແຫ່ງລັດ. ກອງປະຊຸມສຳມະນາ 4 ກຳມາທິການ ສະພາແຫ່ງຊາດຊາດກຳປູເຈຍ, ລາວ, ມຽນມາ ແລະ ຫວຽດນາມ ຄັ້ງນີ້ ຈຸດປະສົງຕົ້ນຕໍແມ່ນຈະໄດ້ພ້ອມກັນປຶກສາຫາລື, ແລກປ່ຽນຄຳຄິດຄຳເຫັນ ແລະ ຖອດຖອນບົດຮຽນນຳກັນ ເຊັ່ນ: ສິ່ງທ້າທາຍໃໝ່ຂອງກຳມາທິການແຜນການ – ການເງິນ, ງົບປະມານແຫ່ງຊາດ ແລະ ການກວດສອບຕໍ່ກັບການປະເຊີນ ແລະ ການປ່ຽນແປງໃໝ່ຂອງໂລກ, ບົດຮຽນທີ່ດີຂອງອົງການກວດສອບແຫ່ງລັດ ໃນການສະໜັບສະໜູນກຳມາທິການ, ບົດຮຽນທີ່ດີຂອງກະຊວງການເງິນ ໃນການສະໜັບສະໜູນກຳມາທິການ. ພ້ອມນີ້, ຍັງເປັນການທົບທວນຄືນຜົນສຳເລັດການຈັດຕັ້ງປະຕິບັດເນື້ອໃນກອງປະຊຸມ ຄັ້ງທີ 7 ທີ່ຈັດຂຶ້ນຢູ່ນະຄອນພະນົມເປັນ ແຫ່ງຣາຊະອານາຈັກກຳປູເຈຍ ແລະຈະໄດ້ກຳນົດທິດທາງແຜນການຮ່ວມມືຮອດປີ 2021.

ທ່ານ ນາງ ປານີ ຢາທໍ່ຕູ້ປະທານສະພາແຫ່ງຊາດລາວ ໄດ້ກ່າວເປີດກອງປະຊຸມວ່າ: ກອງປະຊຸມຄັ້ງນີ້ເປັນການປະກອບສ່ວນທີ່ສຳຄັນເຂົ້າໃນການຮັດແໜ້ນ ຄວາມສາມັກຄີ, ມິດຕະພາບ ແລະ ການຮ່ວມມືລະ ຫວ່າງ 4 ປະເທດ. ພ້ອມນັ້ນ, ກໍຖືເປັນໂອກາດທົບທວນຄືນການຈັດຕັ້ງປະຕິບັດ ແລະ ເສີມຂະຫຍາຍຜົນສໍາເລັດຂອງກອງປະຊຸມ ຄັ້ງທີ 7 ຈັດຂຶ້ນທີ່ນະຄອນຫຼວງພະນົມເປັນ
ແຫ່ງຣາຊະອານາຈັກກໍາປູເຈຍ ໃນປີ 2017 ຜ່ານມາ. ຖືໄດ້ວ່າເປັນອີກຂີດໝາຍສໍາຄັນອັນໜຶ່ງຕໍ່ຂະບວນການເຊື່ອມໂຍງປະຊາຄົມເສດຖະກິດອາຊຽນ ( AEC) ໂດຍລວມແລ້ວ ການຮ່ວມມືເພື່ອສັນຕິພາບ, ສະຖຽນລະພາບ ແລະການພັດທະນາຍັງເປັນທ່າອ່ຽງລວມທີ່ສືບຕໍ່ໄດ້ຮັບການສົ່ງເສີມ ແລະ ຂະຫຍາຍຕົວຢ່າງຕໍ່ເນື່ອງ ໂດຍຜ່ານກອບການຮ່ວມມືແບບສອງຝ່າຍ ແລະ ຫຼາຍຝ່າຍ, ຢູ່ພາກພື້ນອາຊີຕາເວັນອອກສ່ຽງໃຕ້, ສະພາບການດ້ານຕ່າງໆ ໃນຫຼາຍປະເທດໄດ້ມີການພັດທະນາໄປໃນທາງສ້າງສັນ ແລະ ມີທ່ວງທ່າດີຂຶ້ນ ເຊິ່ງເປັນພື້ນຖານໃຫ້ແກ່ການພັດທະນາເສດຖະກິດ – ສັງຄົມຂອງ 4 ປະເທດ, ພ້ອມທັງເປັນການປະກອບສ່ວນເຂົ້າໃນຂະບວນການສ້າງປະຊາຄົມເສດຖະກິດອາຊຽນ ( AEC ) ໃຫ້ໝັ້ນທ່ຽງ ໂດຍເນັ້ນໃສ່ການຜັນຂະຫຍາຍດ້ານນິຕິກຳ ກໍຄືການສ້າງ ຄວາມຮູ້, ຄວາມເຂົ້າໃຈ ກ່ຽວກັບປະຊາຄົມເສດຖະກິດອາຊຽນ ໃນໝູ່ພົນລະເມືອງຢ່າງເປັນລະບົບ.

ທ່ານຍັງກ່າວຕື່ມວ່າ: ເພື່ອເຮັດໃຫ້ກອງປະຊຸມສໍາມະນາຮ່ວມໃນຄັ້ງນີ້ປະສົບຜົນສໍາເລັດຕາມຈຸດປະສົງ ແລະ ລະດັບຄາດໝາຍທີ່ວາງໄວ້, ຂໍສະເໜີມາຍັງບັນດາທ່ານຜູ້ແທນ ຈົ່ງໄດ້ເອົາໃຈໃສ່ປຶກສາຫາລື ແລະ ພິຈາລະນາວິທີການ ແລະ ມາດຕະການໃນການສ້າງຄວາມເຂັ້ມແຂງໃຫ້ແກ່ວຽກງານຕິດຕາມກວດກາງົບປະມານແຫ່ງຊາດຂອງລັດຖະບານ ແລະ ບັນຫາຕ່າງໆ ດ້ວຍຄວາມຮັບຜິດຊອບ, ສ້າງສັນ ແລະ ຄວາມເປັນອາຊຽນ ເພື່ອເຮັດໃຫ້ກອງປະຊຸມສໍາມະນາຮ່ວມໃນຄັ້ງນີ້ບັນລຸໄດ້ຜົນສໍາເລັດຕາມຈຸດປະສົງ ແລະ ຄາດໝາຍທີ່ວາງໄວ້.

( ຂ່າວ: ເພັດສາຄອນ ສິມມະວົງ )