ເປີດນຳໃຊ້ຄູປ້ອງກັນນໍ້າຖ້ວມ

656

ຄູປ້ອງກັນນ້ຳຖ້ວມ ລະຫວ່າງ ທ່ານາແລ້ງ – ຫ້ວຍໝາກຮຽວ ທີ່ລົງມືກໍ່ສ້າງມາແຕ່ປີ 2016 ມາເຖິງປັດຈຸບັນແມ່ນສຳເລັດຕາມແຜນການ ແລະ ເຕັກນິກ ພ້ອມເປີດໃຫ້ນຳໃຊ້ຢ່າງເປັນທາງການ ນອກຈາກຈະຊ່ວຍປ້ອງກັນນ້ຳຖ້ວມແລ້ວຍັງອຳນວຍຄວາມສະດວກແກ່ການສັນຈອນທີ່ມີຜົນຕໍ່ຊີວິດການເປັນຢູ່ຂອງປະຊາຊົນໃນພື້ນທີ່ 4 ຕົວເມືອງເຊື່ອມຈອດກັບນະຄອນຫຼວງຢ່າງສະດວກສະບາຍຂຶ້ນ.

ພິທີມອບ – ຮັບຄູປ້ອງກັນນໍ້າຖ້ວມ ໜຶ່ງໃນໂຄງການຄຸ້ມຄອງ ແລະ ຫຼຸດຜ່ອນຄວາມສ່ຽງຈາກໄພນ້ຳຖ້ວມ ແລະ ແຫ້ງແລ້ງ ( ຄຖລ ) ຈັດຂຶ້ນໃນວັນທີ 5 ເມສາຜ່ານມາ ທີ່ບ້ານຄວາຍແດງ ເມືອງຫາດຊາຍຟອງ ນະຄອນຫຼວງວຽງຈັນ ໂດຍເປັນກຽດເຂົ້າຮ່ວມຂອງ ທ່ານ ລຽນ ທິແກ້ວ ລັດຖະມົນຕີ ກະຊວງກະສິກຳ ແລະ ປ່າໄມ້, ທ່ານ ອານຸພາບ ຕຸນາລົມ ປະທານສະພາປະຊາຊົນ ນະຄອນຫຼວງວຽງຈັນ, ປະທານຄະນະຊີ້ນຳໂຄງການ, ເຈົ້າເມືອງໆຫາດຊາຍຟອງ ພ້ອມດ້ວຍພາກສ່ວນທີ່ກ່ຽວຂ້ອງເຂົ້າຮ່ວມ.

ທ່ານ ຄຳພະຈັນ ວົງຊະນະ ຫົວໜ້າປະສານງານ ໂຄງການ ຄຖລ ກ່າວວ່າ: ໂຄງການ ຄຖລ ໄດ້ເລີ່ມລົງມືກໍ່ສ້າງໃນຕົ້ນປີ 2016 ໂດຍໄດ້ຮັບທຶນສະໜັບສະໜູນຈາກທະນາຄານພັດທະນາອາຊີ ( ADB ) ຈຳນວນ 36,5 ລ້ານໂດລາສະຫະລັດ ເປັນເງິນກູ້ຢືມ 24 ລ້ານໂດລາສະຫະລັດ, ເງິນຊ່ວຍເຫຼືອລ້າ 12,5 ລ້ານໂດລາສະຫະລັດ ແລະ ທຶນສົມທົບຂອງລັດຖະບານລາວ 0,59 ລ້ານໂດລາສະຫະລັດ ເຊິ່ງໂຄງການດັ່ງກ່າວປະກອບມີຫຼາຍໜ້າວຽກ ເຊັ່ນ: ເພີ່ມຂີດຄວາມສາມາດທາງດ້ານຂໍ້ມູນ – ຂ່າວສານ ແລະ ຄວາມຮູ້ກ່ຽວກັບການຄຸ້ມຄອງ ຄວາມສ່ຽງຈາກໄພນ້ຳຖ້ວມ ແລະ ແຫ້ງແລ້ງ; ຍົກລະດັບການພັດທະນາໂຄງລ່າງພື້ນຖານໃນການຄຸ້ມຄອງນ້ຳ ໂດຍການກໍ່ສ້າງຄູປ້ອງກັນນ້ຳຖ້ວມ, ປະຕູລະບາຍນ້ຳ ແລະ ກໍ່ສ້າງລະບົບຊົນລະປະທານ; ສ້າງຄວາມເຂັ້ມແຂງໃຫ້ແກ່ຊຸມຊົນໃນການຄຸ້ມຄອງໄພພິບັດທີ່ອາດຈະເກີດຂຶ້ນ ແລະ ການຄຸ້ມຄອງໂຄງການຢ່າງມີປະສິດທິພາບ ໂດຍໂຄງການຮັບປະກັນສາມາດຕ້ານແລ້ງ – ຕ້ານຖ້ວມ ທີ່ອາດຈະເກີດຂຶ້ນໃນເນື້ອທີ່ຫຼາຍກວ່າ 20 ພັນເຮັກຕາ, ຂະຫຍາຍເນື້ອທີ່ສະໜອງນ້ຳຊົນລະປະທານ 1.542 ເຮັກຕາ ແລະ ຫຼຸດຜ່ອນຜົນເສຍຫາຍໃຫ້ແກ່ປະຊາຊົນຫຼາຍກວ່າ 61.500 ຄອບຄົວ ໃນເຂດພັດທະນາວຽງຈັນຕອນໃຕ້ທີ່ໂຄງການ ຄຖລ ກວມເອົາ 4 ຕົວເມືອງ ຄື: ຫາດຊາຍຟອງ, ປາກງື່ມ, ໄຊທານີ ແລະ ໄຊເສດຖາ.

ໂຄງການ ຄຖລ ໂດຍແມ່ນ ບໍລິສັດ ເອກະຊົນ ເປັນຜູ້ຮັບເໝົາກໍ່ສ້າງ ມາແຕ່ຕົ້ນປີ 2016 ແລະ ຕົ້ນປີ 2019 ແມ່ນສໍາເລັດຕາມແຜນ ສັງຄົມໃຫ້ ຄວາມສົນໃຈຫຼາຍທີ່ສຸດຂອງໂຄງການກໍຄືວຽກງານຄູປ້ອງກັນນ້ຳຖ້ວມມີ ຄວາມຍາວ ເກືອບ 30 ກິໂລແມັດ ປູດ້ວຍຢາງອັດສະຟານ ນັບແຕ່ບ້ານທ່ານາແລ້ງ – ບ້ານຫ້ວຍໝາກຮຽວ ທີ່ສໍາເລັດແລ້ວ 100% ຮອງລົງມາແມ່ນໂຄງການຊົນລະປະທານເຂດດົງ ຄວາຍ 1, ດົງຄວາຍ 2 ແລະ ນາລ້ອງ ທີ່ໃກ້ຈະສໍາເລັດ 100% ແລະ ຈະອໍານວຍຄວາມສະດວກແກ່ປະຊາຊົນໃນການປະກອບອາຊີບເຮັດກະສິກຳ ແລະ ຄ້າຂາຍສ້າງເງື່ອນໄຂໃຫ້ປະຊາຊົນມີລາຍຮັບກ້າວໄປສູ່ມີລາຍຮັບທີ່ໝັ້ນຄົງ.

ທ່ານ ອານຸພາບ ຕຸນາລົມປະທານຄະນະຊີ້ນຳໂຄງການ ກ່າວວ່າ: ໃນຫຼາຍທົດສະວັດຜ່ານມາໃນເຂດເນື້ອທີ່ໂຄງການດັ່ງກ່າວໄດ້ຮັບຜົນກະທົບຈາກໄພນ້ຳຖ້ວມ ແລະ ມີຄວາມຫຍຸ້ງຍາກໃນການສັນຈອນໄປ – ມາຫາສູ່ກັນໂດຍສະເພາະໃນໄລຍະລະດູຝົນເຮັດໃຫ້ການພັດທະນາເສດຖະກິດ – ສັງຄົມ ມີຄວາມຫຍຸ້ງຍາກ,ພັກ – ລັດຖະບານເຫັນຄວາມຈຳເປັນຈະຕ້ອງໄດ້ແກ້ໄຂໂດຍການສ້າງຕັ້ງໂຄງການຄຸ້ມຄອງ ແລະ ຫຼຸດຜ່ອນຄວາມສ່ຽງຈາກໄພນ້ຳຖ້ວມ ແລະ ແຫ້ງແລ້ງ ຄຖລຂຶ້ນມາ.

ໂຄງການກໍ່ສ້າງຄູປ້ອງກັນນ້ຳຖ້ວມນະຄອນຫຼວງວຽງຈັນ ກໍເປັນອົງປະກອບຍ່ອຍໜຶ່ງຂອງໂຄງການ ຄຖລທີ່ຢູ່ພາຍໃຕ້ການຮ່ວມມືອະນຸພາກພື້ນແມ່ນ້ຳຂອງຜ່ານການກວດກາເຫັນວ່າຜູ້ຮັບເໝົາກໍ່ສ້າງປະຕິບັດຖືກຕ້ອງຕາມມາດຖານເຕັກນິກການອອກແບບ ແລະ ສຳເລັດຕາມກຳນົດເວລາ 32 ເດືອນ ໂດຍໂຄງການຈະນຳຜົນປະໂຫຍດມາສູ່ພໍ່ແມ່ປະຊາຊົນທີ່ຢູ່ໃນເຂດພື້ນທີ່ດັ່ງກ່າວສາມາດນໍາໃຊ້ເສັ້ນທາງຄູປ້ອງກັນນ້ຳຖ້ວມເຂົ້າສູ່ການພັດທະນາເສດຖະກິດຄອບຄົວ,ອົງກອນ, ປະເທດຊາດໃຫ້ມີຄວາມກ້າວໜ້າ ແລະ ຮຸ່ງເຮືອງ.