ພິຈາລະນາປັບຫຼຸດອັດຕາຄ່າບໍລິການໃນສະໜາມບິນສາກົນ

463

ປັດຈຸບັນມີສາຍການບິນຈາກຕ່າງປະເທດເຂົ້າມາສະໜາມບິນສາກົນວັດໄຕທັງໝົດ 19 ສາຍການບິນ, ສະເພາະ 2018 ມີຄົນ ເຂົ້າ -ອອກສາຍຕ່າງປະເທດ 1,6 ລ້ານກວ່າເທື່ອຄົນ ຄາດວ່າປີ 2025ຈະເພີ່ມຂຶ້ນ 2,8 ລ້ານຄົນ ຈາກແຮງຍູ້ການປັບປຸງສະໜາມບິນໃໝ່ລວມທັງນະໂຍບາຍຂອງລັດໃນການເປີດກວ້າງນ່ານຟ້າເສລີອາຊຽນຈຶ່ງເຮັດໃຫ້ລາວເຮົາເປັນທີ່ສົນໃຈຂອງທຸລະກິດການບິນຕ່າງປະເທດ.

ທ່ານ ວັນເພັງ ຈັນທະພອນຫົວໜ້າກົມການບິນພົນລະເຮືອນ ກະຊວງ ຍທຂ ໃຫ້ສໍາພາດເມື່ອວັນທີ 1 ເມສາຜ່ານມາ ວ່າ:ປັດຈຸບັນກໍາລັງພິຈາລະນາປັບຫຼຸດອັດຕາຄ່າບໍລິການໃນສະໜາມບິນສາກົນເພື່ອຫຼຸດຜ່ອນຕົ້ນທຶນຂອງຖ້ຽວບິນສາຍຕ່າງປະເທດທັງເປັນການກະຕຸ້ນໃຫ້ສາຍການບິນອື່ນໆເຂົ້າມາເປີດຖ້ຽວບິນຫຼາຍຂຶ້ນ, ເລື່ອງອັດຕາຄ່າບໍລິການຢູ່ໃນສະໜາມບິນສາກົນພວກເຮົາກໍໄດ້ມີການປຶກສາຫາລືກັນຢູ່ເພື່ອເຮັແນວໃດໃຫ້ມີລາຄາທີ່ເໝາະສົມແລະ ເຮັດໃຫ້ບັນດາສາຍການບິນຕ່າງປະເທດສົນໃຈເຂົ້າມາເປີດຖ້ຽວບິນໃນລາວເຮົາເພີ່ມຂຶ້ນ. ໃນປີ 2019 ນີ້ ໄດ້ມີສາຍການບິນສະກູ໊ດທີ່ນອນໃນເຄືອຂອງສາຍການບິນສິງກະໂປ ໄດ້ເຂົ້າມາເປີດຖ້ຽວບິນກົງ ສິງກະໂປ – ວຽງຈັນ – ຫຼວງພະບາງ 3 ຖ້ຽວຕໍ່ອາທິດ ແລະ ປັດຈຸບັນສາຍການບິນ ໄຊນາ ເອັສເພລດສ໌ ທີ່ບິນກົງມາຈາກເມືອງຈົງຈິງ ສປ ຈີນ ມາເຖິງນະຄອນຫຼວງວຽງຈັນ ກໍສົນໃຈເຂົ້າມາເປີດຖ້ຽວບິນເຊັ່ນກັນ ຄາດວ່າໝົດປີນີ້ຈະພະຍາຍາມໃຫ້ໄດ້ 20 ສາຍການບິນຂອງຕ່າງປະເທດທີ່ບິນມາລາວ ເຊິ່ງສ່ວນຫຼາຍແມ່ນຈາກ ສປ ຈີນ ແລະ ໃນອາຊຽນ.

ທ່ານກ່າວຕື່ມວ່າ: ໃນປີນີ້ຄາດວ່າຈະມີຜູ້ໂດຍສານສາຍຕ່າງປະເທດໃຊ້ບໍລິການເພີ່ມຂຶ້ນ ເປັນ 1,8 ລ້ານຄົນ ຖືວ່າເພີ່ມຂຶ້ນ 2 ແສນ ກວ່າຄົນ ຫາກທຽບໃສ່ກັບປີ 2018 ຜ່ານມາ. ໃນນັ້ນ, ນັກທ່ອງທ່ຽວຈາກ ສປ ຈີນ ກວມປະມານ 35 – 40% ຖືວ່າເປັນອັດຕາທີ່ກວມສູງສົມຄວນ ເນື່ອງຈາກເປັນປີທ່ອງທ່ຽວ ລາວ – ຈີນ. ຄຽງຄູ່ກັນນັ້ນ, ທາງພວກເຮົາກໍໄດ້ພົບປະກັບກົມການບິນພົນລະເຮືອນຂອງ ສປ ຈີນ ເພື່ອຊຸກຍູ້ໃຫ້ທຸລະກິດການບິນຂອງຈີນເຂົ້າມາເປີດຖ້ຽວບິນຢູ່ລາວຕື່ມອີກ ໂດຍສະເພາະແມ່ນບັນດາຕົວເມືອງທີ່ລັດວິສາຫະກິດການບິນລາວຍັງບໍ່ໄດ້ເປີດຖ້ຽວບິນ.

ທ່ານ ສົມບູນ ດາວສະຫວັນ ຫົວໜ້າກອງສະໜາມບິນລາວໄດ້ມີຄໍາເຫັນເມື່ອທ້າຍເດືອນມີນາຜ່ານມາ ວ່າ: ໃນໄລຍະຜ່ານມາບັນດາສາຍການບິນທີ່ມາເປີດຖ້ຽວບິນຢູ່ລາວກໍໄດ້ສະເໜີໃຫ້ພວກເຮົາພິຈາລະ
ນາໃນເລື່ອງຂອງອັດຕາຄ່າບໍລິການສະໜາມບິນ ເຊິ່ງບັນຫາດັ່ງກ່າວພວກເຮົາທຸກຄົນຕ້ອງໄດ້ຊ່ວຍກັນເພື່ອໃຫ້ຜູ້ປະກອບທຸລະກິດການບິນມີກຳໄລເພີ່ມຂຶ້ນ. ຄຽງຄູ່ກັນນັ້ນ, ບໍລິສັດ ເຄຊີ ອາເວຊັນ ເຊີວິດ ຈໍາກັດ ເປັນບໍລິສັດດຽວໃນລາວທີ່ມີຄວາມພ້ອມດ້ານການບໍາລຸງຮັກສາ, ສ້ອມແປງຍົນ ແລະ ອຸປະກອນຮັບໃຊ້ພາກພື້ນດິນກໍຖືວ່າເປັນອີກບາດກ້າວໃໝ່ ເພາະທີ່ຜ່ານມາມີພຽງບໍລິສັດຂອງສາຍການບິນເອງທີ່ໃຫ້ບໍລິການລະຫວ່າງສາຍການບິນດ້ວຍກັນ.

ກ່ອນໜ້ານັ້ນ, ທ່ານ ຄໍາສະຫວັນ        ພົມມະຈັນ ຜູ້ອໍານວຍການ ບໍລິສັດ ລາວ – ຍີ່ປຸ່ນ ບໍລິການອາຄານສະໜາມບິນ ຈໍາກັດ
( L – JATS ) ເຄີຍໃຫ້ສໍາພາດ ວ່າ: ພວກເຮົາດຳເນີນທຸລະກິດບໍລິການພາກພື້ນດິນໃຫ້ແກ່ສາຍການບິນຕ່າງປະເທດໃນສະໜາມບິນສາກົນວັດໄຕ ເປັນຕົ້ນ: ລະບົບບໍລິຫານຈັດການໃນອາຄານຜູ້ໂດຍສານ, ບໍລິການຂົນເຄື່ອງ ແລະ ຊໍາພາລະຕ່າງໆຂຶ້ນ – ລົງຍົນ, ກວດກາສິນຄ້າ, ຜູ້ໂດຍສານ ເພື່ອ ຄວາມປອດໄພ, ບໍລິການຈັດສັນບ່ອນຝາກລົດ ແລະ ອື່ນໆ ຕາມມາດຕະຖານສາກົນໄດ້ກໍານົດ ໂດຍສະເພາະວຽກງານຂົນເຄື່ອງ ແລະ ຊໍາພາລະຕ່າງໆຂອງຜູ້ໂດຍສານຂຶ້ນ – ລົງຍົນແຕ່ລະຖ້ຽວຕ້ອງຮັບປະກັນຄວາມວ່ອງໄວທັນຕາມກໍານົດເວລາ ແລະ ຮັບປະກັນຄວາມປອດໄພ. ປັດຈຸບັນໄດ້ມີ 16 ສາຍການບິນຕ່າງປະເທດ ໃຫ້ຄວາມເຊື່ອໝັ້ນໃຊ້ບໍລິການຂອງ L – JATS ຢູ່ສະໜາມບິນສາກົນແຫ່ງນີ້ ແລະ ນັບແຕ່ປີເລີ່ມຕົ້ນມາຮອດປັດຈຸບັນ.

ຂໍ້ມູນຈາກກົມການບິນພົນລະເຮືອນ ຍັງໃຫ້ຮູ້ຕື່ມອີກວ່າ: ປັດຈຸບັນມີເສັ້ນທາງບິນຈາກຕ່າງປະເທດເຂົ້າມາສະໜາມບິນສາກົນວັດໄຕ ທັງໝົດ 19 ສາຍການບິນ, ອີງໃສ່ສະຕິຖິຂົນສົ່ງໃນສະໜາມບິນສາກົນວັດໄຕ ສະເລ່ຍ 12% ຕໍ່ປີ ໂດຍປີ 2018 ມີຄົນ ເຂົ້າ – ອອກສາຍຕ່າງປະເທດ 1,6 ລ້ານ ກວ່າຄົນ ຄາດວ່າ 2025 ຈະເພີ່ມຂຶ້ນ 2,8 ລ້ານຄົນ.