ຜູ້ໂດຍສານອຸ່ນໃຈ ຈະບໍ່ຂຶ້ນຄ່າໂດຍສານໄລຍະປີໃໝ່

462

ສະຖານີລົດເມສາຍໃຕ້ ນະຄອນຫຼວງວຽງຈັນ ກຽມພ້ອມທຸກດ້ານ ໂດຍສະເພາະການກວດກາເຕັກນິກລົດ, ຜູ້ຂັບ ແລະ ຈະເພີ່ມຈຳນວນລົດຈາກປົກກະຕິ ເພື່ອຮອງຮັບຜູ້ໂດຍສານທີ່ຈະເດີນທາງກັບພູມລຳເນົາໄລຍະປີໃໝ່ລາວທີ່ຈະເຖິງລະຫວ່າງວັນທີ 14 – 16 ເມສານີ້ ຢືນຢັນຄ່າໂດຍສານແມ່ນຍັງປົກກະຕິ.

ທ່ານ ວັນເພັນ ສີສຸກ ອຳນວຍການສະຖານີຂົນສົ່ງໂດຍສານສາຍໃຕ້ – ສາຍຕ່າງປະເທດ ຖະແຫຼງຂ່າວຕໍ່ສື່ມວນຊົນວັນທີ 8 ເມສາຜ່ານມາ ວ່າ: ເນື່ອງໃນໂອກາດເທດສະການບຸນປີໃໝ່ລາວທີ່ຈະມາເຖິງນີ້ພວກເຮົາໄດ້ມີການກະກຽມ, ກວດກາເຕັກນິກລົດພ້ອມກັບສຶກສາອົບຮົມຜູ້ຂັບລົດໃຫ້ມີ ຄວາມເອົາໃຈໃສ່ເປັນພິເສດ ໂດຍປາສະຈາກດື່ມສິ່ງມຶນເມົາ. ແນວໃດກໍຕາມ, ເພື່ອໃຫ້ພຽງພໍກັບຜູ້ໂດຍສານທີ່ຈະເດີນທາງກັບບ້ານຜ່ານຄິວລົດດັ່ງກ່າວແມ່ນໄດ້ມີການກຽມລົດເພີ່ມ ຈຳນວນ 30 ຄັນ ຈາກປົກກະຕິ 60 ຄັນ ທີ່ແລ່ນໃນແຕ່ລະວັນ ໂດຍກຳນົດອອກລົດເວລາ 17:00 – 22:00 ໂມງ ເຊິ່ງລົດຈະອອກຈາກຄິວ 5 – 10 ນາທີ ສໍາລັບຄ່າໂດຍສານແມ່ນຍັງປົກກະຕິຄືກັບວັນທົ່ວໄປ.

ແນວໃດກໍຕາມ, ສຳລັບວັນທີ 8 ຜ່ານມາ ບັນຍາກາດຢູ່ຄິວລົດດັ່ງກ່າວເຫັນວ່າຍັງບໍ່ທັນມີຜູ້ໂດຍສານເດີນທາງກັບບ້ານຫຼາຍພໍປານໃດ ເນື່ອງຈາກຍັງບໍ່ທັນເປັນວັນພັກລັດຖະການ ເພາະໃນແຕ່ລະປີຈະມີຜູ້ໂດຍສານເດີນທາງເພື່ອຢ້ຽມຢາມພໍ່ແມ່ຍາດພີ່ນ້ອງແມ່ນເລີ່ມກ່ອນປີໃໝ່ລາວ 2 – 3 ວັນ ສະເລ່ຍມື້ລະຫຼາຍພັນຄົນກ່ອນຈະທະຍອຍກັບມາໃນວັນປີໃໝ່ມື້ສຸດທ້າຍຕາມລຳດັບ.

ຜູ້ອຳນວຍການຮຽກຮ້ອງຜູ້ໂດຍສານທີ່ມີຈຸດປະສົງຈະເດີນທາງພາກກາງ – ໃຕ້ ໃຫ້ມາຊື້ປີ້ ແລະ ຂຶ້ນລົດຢູ່ກັບຄິວເພື່ອຫຼີກເວັ້ນການເອົາລັດເອົາປຽບຄືດັ່ງທີ່ໄດ້ຍິນທຸກປີຜ່ານມາ ໂດຍລາຄາໂດຍສານ ວຽງຈັນ – ຄໍາມ່ວນ ລົດທໍາມະດາ 50 ພັນກີບ ຕຽງນອນ 70 ພັນກີບ, ວຽງຈັນ – ສະຫວັນນະເຂດ 75 ພັນກີບ ຕຽງນອນ 90 ພັນກີບ, ວຽງຈັນ – ປາກເຊ 110.000 ຕຽງນອນ 140.000 ກີບ, ວຽງຈັນ – ເຊກອງ 120.000 ກີບ ຕຽງນອນ 160.000 ກີບ, ວຽງຈັນ – ອັດຕະປື 140.000 ກີບ ຕຽງນອນ 180.000 ກີບ.