ຊາວສວນໝັ້ນໃຈປີໃໝ່ນີ້ ມີຜັກສະໜອງໃຫ້ຕະຫຼາດພຽງພໍ

450

ຊາວກະສິກອນປູກຜັກເຂດເມືອງຫາດຊາຍຟອງໝັ້ນໃຈປີໃໝ່ນີ້ຜະລິດພືດຜັກໃຫ້ຜູ້ບໍລິໂພກພຽງພໍແນ່ນອນ ພ້ອມຢໍ້າປູກຜັກໃນປັດຈຸບັນນີ້ກໍເພື່ອກຽມພ້ອມໃສ່ເທດສະການປີໃໝ່ລາວທີ່ຈະມາຮອດນີ້, ຂະນະທີ່ຊາວສວນຈໍານວນໜຶ່ງເຖິງວ່າການປູກ ແລະເກັບກູ້ຍັງບໍ່ທັນຫຼາຍ ແຕ່ຈະພະຍາຍາມເພື່ອສະໜອງຕະຫຼາດໃຫ້ໄດ້ຫຼາຍເທົ່າທີ່ຈະຫຼາຍໄດ້.

ປະຊາຊົນເຂດບ້ານຫ້ອມ ກ່າວວ່າ:ປັດຈຸບັນພວມຂຸ້ນຂ້ຽວບົວລະບັດຮັກສາພືດຜັກຂອງຕົນເອງຢ່າງເປັນຂະບວນຟົດຟື້ນເພື່ອກຽມພ້ອມສະໜອງຜັກໃຫ້ຕະຫຼາດໃນໄລຍະປີໃໝ່ນີ້ ເພື່ອບໍ່ໃຫ້ຜັກຂາດຕະຫຼາດ ແລະໃຫ້ໄດ້ຕາມ ຄວາມຕ້ອງການຂອງຜູ້ບໍລິໂພກ.

ນອກຈາກນີ້, ຊາວສວນບາງຄົນຍັງຫັນມາເປັນແມ່ຄ້າເອງ ເມື່ອຜັກຂອງຕົນເອງບໍ່ພໍຂາຍກໍຮັບຊື້ຈາກຄົນອື່ນເພື່ອນໍາໄປຂາຍຕໍ່ຢູ່ຕະຫຼາດ ເຊິ່ງໃນແຕ່ລະມື້ສະໜອງຜັກໃຫ້ຕະຫຼາດນັບແຕ່ຜັກຫອມປ້ອມ, ຜັກບົ້ງ, ຜັກກາດ ແລະ ອື່ນໆ ສະເລ່ຍມື້ໜຶ່ງຊະນິດລະບໍ່ຕໍ່າກວ່າ 5 ໝື່ນ, ເຮັດໃຫ້ໝັ້ນໃຈໄດ້ວ່າປີໃໝ່ນີ້ທັງຜູ້ຂາຍ ແລະ ຜູ້ຊື້ມີຄວາມສົມດູນກັນແນ່ນອນ.

ທ່ານ ນາງ ອ້ອຍ ປະຊາຊົນບ້ານດອນເກີດໃຫ້ຮູ້ວ່າ: ຕາມປົກກະຕິໄລຍະປີໃໝ່ແບບນີ້ຕົນເອງ ແລະ ຄອບຄົວກໍເຮັດວຽກລົງສວນເປັນປະຈຳເພາະວ່າມີແມ່ຄ້າມາສັ່ງສິນຄ້ານໍາຕະຫຼອດແລ້ວເຮົາກໍຕ້ອງສາມາດສະໜອງໃຫ້ໄດ້ຕາມຄວາມຕ້ອງການຂອງເຂົາເຈົ້າເພື່ອຮັກສາລູກຄ້າອີກຢ່າງໜຶ່ງໃນໄລຍະນີ້ເປັນໄລຍະເທດສະການ, ສັງຄົມມີຄວາມຕ້ອງການບໍລິໂພກສູງຈຶ່ງເປັນໂອກາດດີໃນການຜະລິດ ແລະ ສະໜອງຜັກໃຫ້ພຽງພໍກັບຄວາມຕ້ອງການ.

ຂະນະທີ່ ນາງ ຊາ ປະຊາຊົນບ້ານຫົວຫ້າເມືອງຫາດຊາຍຟອງ ບອກວ່າ:ການປູກຜັກສົ່ງໃຫ້ຕະຫຼາດມັນໄດ້ກາຍເປັນໜ້າທີ່ຄວາມຮັບຜິດຊອບຂອງຕົນເອງໄປແລ້ວແຕ່ໃນໄລຍະປີໃໝ່ແບບນີ້ບໍ່ສະເພາະແຕ່ຜູ້ປູກ, ຜູ້ຂາຍກໍເຊັ່ນດຽວກັນອາດຈະມີບາງກຸ່ມຄົນທີ່ຢາກພັກຜ່ອນຫຼັງຈາກໃຊ້ເວລາເຮັດວຽກມາດົນ ເຊິ່ງກໍເປັນການໃຫ້ລາງວັນຕົນເອງໄປໃນຕົວແຕ່ກໍຕ້ອງເບິ່ງຕາມ ຄວາມເປັນຈິງວ່າຈະສາມາດຜະລິດຜັກເຂົ້າຕະຫຼາດໄດ້ຫຼາຍໜ້ອຍພຽງໃດ.