ກະຊວງການຕ່າງປະເທດ ສະຫຼອງປີໃໝ່ລາວ

426

ກະຊວງການຕ່າງປະເທດ ຮ່ວມກັບບັນດາທູຕານຸທູດ ແລະ ອົງການຈັດຕັ້ງສາກົນ ປະຈໍາ ສປປ ລາວໄດ້ຈັດພິທີບາສີສູ່ຂວັນສະເຫຼີມສະຫຼອງບຸນປີໃໝ່ລາວ ພ.ສ 2562.

ພິທີດັ່ງກ່າວຈັດຂຶ້ນໃນວັນທີ 6 ເມສາ 2019 ທີ່ສວນພຶກສາ ບ້ານໃໝ່ດ່ານຊີ ເມືອງນາຊາຍທອງ ນະຄອນຫຼວງວຽງຈັນ ເປັນກຽດເຂົ້າຮ່ວມໂດຍ ທ່ານ ສະເຫຼີມໄຊ ກົມມະສິດ ລັດຖະມົນຕີກະຊວງການຕ່າງປະເທດ, ມີບັນດາທູຕານຸທູດ, ກົງສຸນ – ກົງສຸນກິດຕິມະສັກ, ຜູ້ຕາງໜ້າອົງການຈັດຕັ້ງສາກົນ ປະຈໍາ ສປປ ລາວ ແລະ ພະນັກງານພາຍໃນກະຊວງເຂົ້າຮ່ວມ.

ພາຍໃນງານ ທ່ານ ສະເຫຼີມໄຊ ກົມມະສິດ ໄດ້ສະແດງຄວາມຍິນດີຕ້ອນຮັບ ແລະ ອວຍພອນປີໃໝ່ລາວຕໍ່ບັນດາພະນັກງານ, ທູຕານຸທູດ ແລະ ແຂກທີ່ເຂົ້າຮ່ວມດ້ວຍຄວາມອົບອຸ່ນ ແລະ ສະໜິດສະໜົມ. ພ້ອມນີ້, ທ່ານລັດຖະມົນຕີ ຍັງໄດ້ຍົກໃຫ້ເຫັນເຖິງຄວາມໝາຍຄວາມສໍາຄັນຂອງບຸນປີໃໝ່ລາວ ເຊິ່ງເປັນບຸນປະເພນີທີ່ສໍາຄັນຂອງລາວ, ເປັນຮີດຄອງປະເພນີອັນດີງາມຂອງຊາດທີ່ໄດ້ສືບສານກັນມາຕັ້ງແຕ່ບູຮານນະການ. ພ້ອມດຽວກັນນັ້ນ, ໃນໂອກາດສະເຫຼີມສະຫຼອງປີໃໝ່ລາວໃນຄັ້ງນີ້ ຍັງເປັນໂອກາດທີ່ສໍາຄັນໃນການເຜີຍແຜ່ວັດທະນະທໍາ ແລະ ຮີດຄອງປະເພນີອັນດີງາມຂອງລາວໃຫ້ແກ່ບັນດາທູຕານຸທູດ ແລະ ອົງການຈັດຕັ້ງສາກົນ ປະຈໍາ ສປປ ລາວ ກໍຄືຊາວຕ່າງຊາດໃຫ້ໄດ້ຮັບຮູ້, ໄດ້ສໍາຜັດ ແລະ ເຂົ້າໃຈຢ່າງເລິກເຊິ່ງກ່ຽວກັບບຸນປະເພນີປີໃໝ່ຂອງລາວເຮົາ, ເປັນການສົ່ງເສີມຄວາມເຂົ້າອົກເຂົ້າໃຈ ແລະ ຮັດແໜ້ນການພົວພັນຮ່ວມມືອັນດີງາມ ລະຫວ່າງພະນັກງານກະຊວງການຕ່າງປະເທດ ກໍຄືນັກການທູດລາວກັບບັນດາທູຕານຸທູດ ແລະ ອົງການຈັດຕັ້ງສາກົນ ປະຈໍາ ສປປ ລາວ ກໍຄືບັນດາປະເທດເພື່ອນມິດໃນພາກພື້ນ ແລະ ສາກົນ. ຫຼັງຈາກນັ້ນ, ກໍໄດ້ມີພິທີບາສີສູ່ຂວັນອວຍພອນປີໃໝ່ ເຊິ່ງກັນ ແລະ ກັນ ພ້ອມຮ່ວມຮັບປະທານອາຫານທ່ຽງ, ຊົມການສະແດງສິລະປະ ແລະ ປະກອບສ່ວນມ່ວນຊື່ນຮ່ວມກັນຢ່າງຄຶກຄື້ນ ດ້ວຍໄມຕີຈິດມິດຕະພາບອັນດີ ແລະ ມີຄວາມໝາຍສໍາຄັນ, ເຊິ່ງເຮັດໃຫ້ພິທີສະເຫຼີມສະຫຼອງປີໃໝ່ລາວ ພ.ສ 2562 ຄັ້ງນີ້ ມີບັນຍາກາດຟົດຟື້ນມ່ວນຊື່ນ ລະຫວ່າງ ພະນັກງານກະຊວງການຕ່າງປະເທດ, ບັນດາທູຕານຸທູດ, ອົງການຈັດຕັ້ງສາກົນ ປະຈໍາ ສປປ ລາວ ແລະ ແຂກຖືກເຊີນເຂົ້າຮ່ວມ.