ປີໃໝ່ລາວນີ້ ເຈົ້າໜ້າທີ່ຈະລາຈອນຈະເຂັ້ມງວດຕໍ່ຜູ້ຂັບຂີ່

372

ເຈົ້າໜ້າທີ່ຈະລາຈອນກຽມຄວາມພ້ອມ 100%ເພື່ອການກວດກາຢ່າງເຂັ້ມງວດໃນປີໃໝ່ລາວນີ້ ເພື່ອເຮັດໃຫ້ສະພາບການສັນຈອນຕາມເສັ້ນທາງບົກໃນໄລຍະສະເຫຼີມສະຫຼອງປີໃໝ່ ລາວ ພ.ສ 2562 ໃຫ້ຮັບປະກັນຄວາມເປັນລະບຽບຮຽບຮ້ອຍ, ປອດໄພໃນການສັນຈອນ ສະກັດກັ້ນຄວາມຮຸນແຮງ ແລະ ຫຼຸດຜ່ອນຜົນເສຍຫາຍຈາກການເກີດອຸບັດເຫດໃຫ້ຫຼຸດໜ້ອຍຖອຍລົງເທື່ອລະກ້າວ.

ໃນວັນທີ 6 ເມສາ 2019 ທີ່ກົມຕຳຫຼວດຈະລາຈອນ ໄດ້ມີພິທີປ່ອຍຂະບວນກຳລັງຈະລາຈອນ ເພື່ອກຽມປະຕິບັດໜ້າທີ່ກວດກາຫວັງຫຼຸດຜ່ອນອຸບັດເຫດໃນໄລຍະບຸນປີໃໝ່ລາວ ພ.ສ 2562 ເພື່ອໃຫ້ມວນຊົນເຫັນເຖິງ ຄວາມພ້ອມດ້ານບຸກຄະລາກອນ, ພາຫະນະ ແລະ ອຸປະກອນໃນການປະຕິບັດໜ້າທີ່ໃນໄລຍະບຸນປີໃໝ່ລາວນີ້ ໂດຍການເຂົ້າກວດກາຄວາມພ້ອມກຳລັງຂອງ ທ່ານ ພົນຈັດຕະວາ ທອງສະຫວັນ ວົງສະຫວັດ ຮອງຫົວໜ້າກົມໃຫຍ່ຕຳຫຼວດ ໂດຍການຕ້ອນຮັບຂອງ ທ່ານ ພັນໂທ ກົງສີ ສຸວັນນະຕຸ້ມ ຫົວໜ້າກົມຕຳຫຼວດຈະລາຈອນ ກະຊວງປ້ອງກັນຄວາມສະຫງົບພ້ອມດ້ວຍຄະນະຕ້ອນຮັບ.

ທ່ານ ພັນໂທ ກົງສີ ສຸວັນນະຕຸ້ມ ຫົວໜ້າກົມຕຳຫຼວດຈະລາຈອນ ກ່າວວ່າ: ເພື່ອເຮັດໃຫ້ການສະເຫຼີມສະຫຼອງສົ່ງທ້າຍປີເກົ່າ – ຕ້ອນຮັບປີໃໝ່ລາວ ພ.ສ 2562 ມີຄວາມສະຫງົບປອດໄພ, ມີບັນຍາກາດເບີກບານມ່ວນຊື່ນ ແລະ ຫຼີກລຽງການເກີດອຸບັດເຫດຕາມທ້ອງຖະໜົນສ້າງຜົນເສຍຫາຍທາງສຸຂະພາບ, ຊີວິດ ແລະ ຊັບສິນ ທີ່ເກີດອຸບັດເຫດຈະລາຈອນທາງບົກ ເພື່ອຊຸກຍູ້, ແນະນໍາຜູ້ໃຊ້ລົດ – ໃຊ້ຖະໜົນຍົກສູງສະຕິເຄົາລົບກົດຈະລາຈອນຢ່າງເຂັ້ມງວດ, ມີສ່ວນຮ່ວມເປັນເຈົ້າການນວຽກງານປ້ອງກັນ, ສະກັດກັ້ນ ແລະ ສະພາບການສັນຈອນຕາມເສັ້ນທາງບົກໃນໄລຍະສະເຫຼີມສະຫຼອງປີໃໝ່ລາວ ພ.ສ 2562 ຢູ່ທົ່ວປະເທດຮັບປະກັນໄດ້ຄວາມສະຫງົບ, ຄວາມເປັນລະບຽບຮຽບຮ້ອຍປອດໄພໃນການສັນຈອນ ເພື່ອປ້ອງກັນ, ສະກັດກັ້ນຄວາມຮຸນແຮງ ແລະ ຫຼຸດຜ່ອນຜົນເສຍຫາຍຈາກການເກີດອຸບັດເຫດໃນໄລຍະສະເຫຼີມສະຫຼອງປີໃໝ່ລາວໃຫ້ຫຼຸດໜ້ອຍຖອຍລົງເທື່ອລະກ້າວ ເພື່ອຊອກຮູ້ສາເຫດ, ເງື່ອນໄຂຂອງການລະເມີດກົດຈະລາຈອນທີ່ພາໃຫ້ເກີດອຸບັດເຫດ ເພື່ອນໍາໄປຄົ້ນຄວ້າ ແລະ ວາງແຜນປ້ອງກັນ, ສະກັດກັ້ນໃນປີຕໍ່ໜ້າ. ສຳລັບການວາງກຳລັງຕັ້ງດ່ານກວດກາ, ຈັບຄວາມໄວ ແລະ ກວດທາດເຫຼົ້າ ພາກເໜືອແມ່ນຈະຕັ້ງຢູ່ຈຸດລະຫວ່າງກາສີ ຫາ ວັງວຽງ; ພາກກາງ ຈຸດປາກກະດິງ ແລະ ຈຸດພາກໃຕ້ ແມ່ນລະຫວ່າງ ຄຳມ່ວນ ຫາ ສະຫວັນນະເຂດ.

ທ່ານກ່າວຕື່ມວ່າ: ສຳລັບມາດຕະການແມ່ນອອກແຈ້ງການກ່ຽວກັບການສະກັດກັ້ນອຸບັດເຫດຈະລາຈອນໃນໄລຍະຫຼິ້ນບຸນປີໃໝ່ລາວ ພ.ສ 2562 ມີດັ່ງນີ້: ການນໍາໃຊ້ລົດ – ໃຊ້ຖະໜົນທຸກຄັ້ງ ຜູ້ຂັບຂີ່ລົດຕ້ອງປະຕິບັດກົດລະບຽບຈະລາຈອນຢ່າງເຂັ້ມງວດ; ກ່ອນຈະນໍາໃຊ້ລົດເມື່ອເດີນທາງໄກຕ້ອງກວດກາສະພາບເຕັກນິກ ແລະ ຄວາມພ້ອມຂອງລົດ ໃຫ້ຮັບປະກັນຄວາມປອດໄພເປັນຢ່າງດີ, ຜູ້ຂັບຂີ່ຕ້ອງປະຕິບັດຕາມກົດ, ປ້າຍສັນຍານ ແລະ ເຄື່ອງໝາຍການສັນຈອນຢ່າງເຂັ້ມງວດ; ຫ້າມໃຊ້ລົດໂດຍສານ, ບັນທຸກສິນຄ້າ, ຜູ້ໂດຍສານເກີນກໍານົດ ແລະ ຊ່ວງຊີງເອົາຜູ້ໂດຍສານຢ່າງເດັດຂາດ; ລົດຂົນສົ່ງໂດຍສານທາງໄກຕ້ອງມີຜູ້ຂັບສໍາຮອງທຸກຄັ້ງເວລາເດີນທາງ; ຜູ້ຂັບລົດໃຫຍ່ຕ້ອງຮັດສາຍແອວນີລະໄພ ເພື່ອຮັບປະກັນຄວາມປອດໄພໃຫ້ຜູ້ຂັບຂີ່ ແລະ ຜູ້ໂດຍສານ; ຫ້າມນໍາໃຊ້ລົດກະບະບັນທຸກຜູ້ໂດຍສານໃສ່ກະບະ ຫຼື ນັ່ງຝາທ້າຍລົດຢ່າງເດັດຂາດ; ຜູ້ດື່ມສິ່ງມຶນເມົາຫ້າມຂັບລົດຢ່າງເດັດຂາດ ( ຖ້າກວດກາເຫັນ ເຈົ້າໜ້າທີ່ຕໍາຫຼວດຈະໄດ້ກັກໄວ້ຊ່ວງເມົາແລ້ວຈິຶ່ງອະນຸຍາດໃຫ້ໄປ ຫຼື ໃຫ້ຍາດພີ່ນ້ອງ, ໝູ່ຄູ່ມາຮັບເອົາເພື່ອຄວາມປອດໄພ ); ຫ້າມເອົາຖັງນໍ້າໃສ່ລົດຫົດ ຫຼື ສາດໃສ່ກັນຕາມເສັ້ນທາງຢ່າງເດັດຂາດ; ຫ້າມຫຼິ້ນນໍ້າຢູ່ເສັ້ນທາງ ຫຼື ລັດລົດຫົດນໍ້າຕາມທາງຢ່າງເດັດຂາດ; ຫ້າມຂັບຂີ່ລົດຈັກເປັນພຶງເປັນແພ ແລະ ແຂ່ງຂັນຕາມເສັ້ນທາງຢ່າງເດັດຂາດ; ຫ້າມເອົານໍ້າ ແລະ ນໍ້າກ່ອນໃສ່ຖົງຢາງແລ້ວແກວ່ງໃສ່ກັນໃນເວລາລົດສັນຈອນຢ່າງເດັດຂາດ ເພື່ອຫຼີກລຽງອຸບັດເຫດຈະລາຈອນ; ຜູ້ຂັບ ແລະ ຜູ້ຊ້ອນທ້າຍຕ້ອງສວມໃສ່່ໝວກກັນກະທົບ ເພື່ອຄວາມປອດໄພຂອງທ່ານ ( ຖ້າກວດພົບຈະໄດ້ກັກໄວ້ ); ຫ້າມຜູ້ປົກຄອງປ່ອຍເດັກທີ່ມີອາຍຸບໍ່ເຖິງກະສຽນຂັບຂີ່ລົດຈັກຢ່າງເດັດຂາດ.

ພ້ອມນີ້, ທ່ານຍັງໄດ້ຮຽກຮ້ອງເຖິງພໍ່ແມ່ປະຊາຊົນ, ຜູ້ປົກຄອງ, ອໍານາດການປົກຄອງແນະນໍາໃຫ້ ປກສ ກວດກາຄວາມເປັນລະບຽບຮຽບຮ້ອຍ, ແນະນໍາລູກຫຼານ ແລະ ພະນັກງານທີ່ຢູ່ໃນຄວາມຮັບຜິດຊອບໃຫ້ເປັນເຈົ້າການປ້ອງກັນຕົວເອງໃຫ້ຫຼຸດຈາກອຸບັດເຫດ ແລະຂໍຮຽກຮ້ອງເຖິງກໍາລັງຕໍາຫຼວດຈະລາຈອນ ເອົາໃຈໃສ່ປະຕິບັດຄໍາແນະນໍາຂອງກົດໃຫຍ່ຕໍາຫຼວດ, ໃຫ້ເປັນແບບຢ່າງນໍາພາ – ອໍານວຍຄວາມສະດວກ, ແນະນໍາຜູ້ໃຊ້ລົດ – ໃຊ້ຖະໜົນ, ເປັນເຈົ້າການສຶກສາອົບຮົມ, ຕັກເຕືອນ ແລະ ນໍາໃຊ້ມາດຕະການຕໍ່ຜູ້ຝ່າຝືນຢ່າງເຂັ້ມງວດ ແລະ ໃຫ້ເປັນເອກະພາບ, ຫ້າມປະລະໜ້າທີ່, ຫ້າມຫຼິ້ນກິນເວລາປະຕິບັດໜ້າທີ່.