ມະຫະກຳຊັບສິນທາງປັນຍາ ປີນີ້ຈະຈັດຂຶ້ນຢູ່ນະຄອນປາກເຊ

306

ມະຫະກໍາຊັບສິນທາງປັນຍາ ເມື່ອ 4ຄັ້ງຜ່ານມາ ຈັດຂຶ້ນຢູ່ນະຄອນຫຼວງວຽງຈັນ ແຕ່ຄັ້ງທີ 5 ກຽມຈັດຂຶ້ນຢູ່ນະຄອນປາກເຊແຂວງຈໍາປາສັກ ໃນລະຫວ່າງວັນທີ 24 – 28 ເມສາ 2019 ຢູ່ທີ່ຕະຫຼາດສູນການຄ້າ ( ຊັ້ນ 3 )ຄາດວ່າຈະມີມວນຊົນເຂົ້າຮ່ວມຢ່າງຫຼວງຫຼາຍ ແລະ ເຫດຜົນທີ່ເລືອກເອົາແຂວງຈໍາປາສັກ ເນື່ອງຈາກເປັນແຂວງທີ່ມີເສດຖະກິດຂະຫຍາຍຕົວດີທັງເປັນເສັ້ນທາງຜ່ານຈາກໄທ ສູ່ບັນດາແຂວງພາກໃຕ້ຂອງລາວ ແລ້ວອອກສູ່ກໍາປູເຈຍ ຫຼື ສສ ຫວຽດນາມ. ດ້ານຮອງເຈົ້າແຂວງໆຈໍາປາສັກ ລະບຸວ່າ:ງານດັ່ງກ່າວຈະເປັນເວທີໃນການສົ່ງເສີມວຽກງານຊັບສິນທາງປັນຍາຂອງແຂວງກໍຄືປະເທດໃນຕໍ່ໜ້າ.

ທ່ານ ຫຸມພັນ ອິນທິຣາດຮອງລັດຖະມົນຕີກະຊວງວິທະຍາສາດ ແລະ ເຕັກໂນໂລຊີ ໄດ້ຖະແຫຼງຂ່າວການກະກຽມງານມະຫະກຳຊັບສິນທາງປັນຍາ2019 ແລະ ສະເຫຼີມສະຫຼອງວັນຊັບສິນທາງປັນຍາໂລກ 26 ເມສາ ໃນທ້າຍອາທິດຜ່ານມາ ວ່າ: ກະຊວງວິທະຍາສາດ ແລະ ເຕັກໂນໂລຊີ ຮ່ວມກັບອຳນາດການປົກຄອງແຂວງຈຳປາສັກຈະໄດ້ເປັນເຈົ້າພາບຈັດມະຫະກຳຊັບສິນທາງປັນຍາ ຄັ້ງທີ 5 ເລີ່ມແຕ່ວັນທີ 24 – 28 ເມສາ 2019 ທີ່ຕະຫຼາດສູນການຄ້າ ( ຊັ້ນ 3 ) ນະຄອນປາກເຊ ແຂວງຈຳປາສັກ ພາຍໃຕ້ຄຳຂວັນ “ເສີມສ້າງຊັບສິນທາງປັນຍາ ເພື່ອພັດທະນາເສດຖະກິດ – ສັງຄົມ ແລະ ວັດທະນະທຳແບບຍືນຍົງ ” ແລະ ຈະຈັດພິທີສະເຫຼີມສະຫຼອງວັນຊັບສິນທາງປັນຍາໂລກ ຄົບຮອບ 19 ປີ ຂຶ້ນໃນວັນທີ 26 ເມສາ 2019 ພາຍໃຕ້ຄຳຂວັນວ່າ “ ຊັບສິນທາງປັນຍາ ແລະ ກີລາ ກ້າວຂຶ້ນສູ່ຫຼຽນຄຳ ( Reach for Gold: IP and Sports ) ” ໃນງານດັ່ງກ່າວຈະໄດ້ເຊື້ອເຊີນບັນດາຜູ້ປະກອບການທັງພາກລັດ ແລະ ເອກະຊົນ, ສະຖານທູດ, ອົງການຈັດຕັ້ງສາກົນ, ປະເທດສະມາຊິກອາຊຽນ ແລະ ປະເທດອື່ນໆມີ 162 ຫ້ອງ ຈາກ ລາວ, ໄທ, ຫວຽດນາມ, ອິນໂດເນເຊຍ ແລະ ອື່ນໆ.

ເຫດຜົນທີ່ຈັດຂຶ້ນຢູ່ແຂວງຈໍາປາສັກ ເນື່ອງຈາກແຂວງດັ່ງກ່າວເປັນແຂວງໜຶ່ງທີ່ຢູ່ໃນເປົ້າໝາຍທີ່ອີງຕາມແຜນແມ່ບົດຂອງລັດຖະບານໃນການສ້າງຄວາມເຂັ້ມແຂງທາງດ້ານວຽກງານຊັບສິນທາງປັນຍາ
ເພື່ອປົກປ້ອງພູມປັນຍາໃນການປະດິດສ້າງ, ປະດິດຄິດແຕ່ງ ແລະ ເພື່ອປົກປ້ອງຜົນປະໂຫຍດໃນການສ້າງມູນຄ່າເພີ່ມຂອງສິນຄ້າ ແລະ ສາມາດແຂ່ງຂັນໃນຕະຫຼາດ. ຄຽງຄູ່ກັນນັ້ນ, ແຂວງດັ່ງກ່າວກໍມີຄວາມພ້ອມໃນການຍື່ນຂໍຈົດທະບຽນຖິ່ນກຳເກີດທີ່ເປັນຜະລິດຕະພັນຂອງທ້ອງຖິ່ນ ຄື: ກາເຟບໍລິເວນ, ຊາປາກຊ່ອງ ແລະ ຍັງມີການຮັບຄຳຮ້ອງຂໍຈົດທະບຽນຖິ່ນກຳເນີດເຫຼົ້າແຊັມເປນ ເຊິ່ງເປັນຜະລິດຕະພັນທີ່ຈະຍື່ນຂໍຕໍ່ຈາກຖິ່ນກຳເນີດເຂົ້າໄກ່ນ້ອຍຂອງແຂວງຫົວພັນ ແລະ ຊຽງຂວາງ ທີ່ໄດ້ຮັບການຈົດທະບຽນມາແລ້ວໃນປີ 2018.

ໂອກາດດຽວກັນ, ທ່ານ ບົວສອນ ວົງສອງຄອນ ຮອງເຈົ້າແຂວງໆຈໍາປາສັກ ກ່າວຕື່ມວ່າ: ແຂວງຈໍາປາສັກ ຍັງຕິດຈອດ ແລະ ພົວພັນຮ່ວມມືກັບບັນດາແຂວງພາກກາງ, ພາກໃຕ້, ສສ ຫວຽດນາມ, ຣາຊະອານາຈັກໄທ ແລະ ກໍາປູເຈຍ ຈຶ່ງເປັນເງື່ອນໄຂສະດວກອັນໜຶ່ງໃນການພັດທະນາເສດຖະກິດ – ສັງຄົມຂອງແຂວງຕໍ່ການພັດທະນາວຽກງານວິທະຍາສາດ ແລະ ເຕັກໂນໂລຊີໃນຕໍ່ໜ້າ.

ພິເສດ, ກົມຊັບສິນທາງປັນຍາ ກະຊວງວິທະຍາສາດ ແລະ ເຕັກໂນໂລຊີ ພ້ອມດ້ວຍພະແນກວິທະຍາສາດ ແລະ ເຕັກໂນໂລຊີແຂວງ ແລະ ສະຖາບັນການສຶກສາຈະໄດ້ຈັດກອງປະຊຸມສໍາມະນາ ແລະ ໃຫ້ຄໍາປຶກສາ, ສົນທະນາແລກປ່ຽນກ່ຽວກັບວຽກງານຊັບສິນທາງປັນຍາ ເຊິ່ງຈະໄດ້ແນະນໍາ ແລະ ບໍລິການກ່ຽວກັບການຈົດທະບຽນຊັບສິນອຸດສາຫະກໍາ, ພັນພືດໃໝ່ ແລະ ການແຈ້ງຂໍ້ມູນລິຂະສິດ
ແລະ ສິດກ່ຽວຂ້ອງກັບລິຂະສິດ. ໃນງານກົມຊັບສິນທາງປັນຍາຍັງຈະໄດ້ໃຫ້ບໍລິການຮັບຄໍາຮ້ອງຂໍຈົດທະບຽນຊັບສິນອຸດສາຫະກໍາ ແລະ ຄໍາຮ້ອງຂໍແຈ້ງຂໍ້ມູນລິຂະສິດ ແລະ ສິດກ່ຽວຂ້ອງກັບລິຂະສິດໃນທຸກໆວັນຕະຫຼອດການຈັດງານ.

ນອກຈາກນັ້ນ, ເຈົ້າຂອງຜົນງານ ແລະ ຜູ້ປະກອບການ ຍັງນຳເອົາຜະລິດຕະພັນຜົນງານທາງດ້ານຊັບສິນທາງປັນຍາ ແລະ ພູມປັນຍາພື້ນບ້ານອັນເປັນມູນເຊື້ອຂອງຕົນເຂົ້າຮ່ວມວາງສະແດງໃນງານແລ້ວ
ຍັງຈະໄດ້ມີໂອກາດພົບປະ, ແລກປ່ຽນບົດຮຽນປະສົບປະການເຊິ່ງກັນ ແລະ ກັນ ຈົນສາມາດຈັບຄູ່ຮ່ວມທຸລະກິດນຳກັນຕື່ມອີກ.