ກຸ່ມບໍລິສັດ ໂຄລາວ ມອບເສື້ອ 500 ຜືນ ປະກອບສ່ວນປຸກລະດົມຫຼຸດຜ່ອນອຸບັດເຫດ

402

ໃນວັນທີ 5 ເມສາ 2019 ທີ່ກົມຂົນສົ່ງ ກຸ່ມບໍລິສັດ ໂຄລາວ ໄດ້ໄປມອບເສື້ອປະກອບສ່ວນໃນກິດຈະກຳຍ່າງເພື່ອສະເຫຼີມສະຫຼອງສັບປະດາຄວາມປອດໄພທາງຖະໜົນ ຕາງໜ້າມອບໂດຍ ທ່ານ ສິດເອກະລັກ ວົງໄກສອນ ຜູ້ອຳນວຍການຝ່າຍຂາຍ ແລະ ການຕະຫຼາດ ກຸ່ມບໍລິສັດ ໂຄລາວ ແລະ ຕາງໜ້າຮັບໂດຍ ທ່ານ ວິໄລພັນ ໄຊຍະວົງ ຫົວໜ້າກົມຂົນສົ່ງ ກະຊວງ ຍທຂ ພ້ອມດ້ວຍຄະນະທັງສອງຝ່າຍເຂົ້າຮ່ວມ.

ທ່ານ ສິດເອກະລັກ ໄດ້ກ່າວວ່າ: ກຸ່ມບໍລິສັດ ໂຄລາວ ເປັນບໍລິສັດທີ່ດຳເນີນທຸລະກິດຫຼາກຫຼາຍ ແຕ່ທຸລະກິດຫຼັກໆແມ່ນຍານພາຫະນະແລະ ຍາມໃດບໍລິສັດພວກເຮົາກໍໃຫ້ຄວາມສຳຄັນໃນການປຸກລະດົມເພື່ອຫຼຸດຜ່ອນອຸບັດເຫດ ແລະໃຫ້ການສະໜັນສະໜູນຕະຫຼອດ ແລະ ໃນປີນີ້ກໍເຊັ່ນກັນ ທາງບໍລິສັດກໍໄດ້ໃຫ້ການສະໜັບສະໜູນຈຸດປະສົງກໍເພື່ອເປັນການປະກອບສ່ວນເຂົ້າໃນການສ້າງກິດຈະກຳຂອງກົມຂົນສົ່ງເຂົ້າໃນວຽກງານເຜີຍແຜ່ສັບປະດາຄວາມປອດໄພທາງທ້ອງຖະໜົນ.ພ້ອມດຽວກັນນີ້, ຍັງເປັນການປູກຈິດສຳນຶກໃຫ້ເຍົາວະຊົນ ຫຼືຜູ້ຂັບຂີ່ຍານພາຫະນະໄດ້ຮັບຮູ້ ແລະ ເຂົ້າເຖິງກົດຈະລາຈອນ, ວິທີປ້ອງກັນ ແລະ ຜົນຮ້າຍຂອງການເກີດອຸບັດເຫດເຊິ່ງມັນໄດ້ສ້າງຜົນເສຍຫາຍອັນໃຫຍ່ຫຼວງໃຫ້ແກ່ຊັບສິນ ແລະ ຊີວິດຂອງປະຊາຊົນ. ນອກຈາກນີ້, ຍັງສົ່ງຜົນກະທົບຕໍ່ການພັດທະນາເສດຖະກິດ – ສັງຄົມຂອງປະເທດຊາດນຳອີກ ເຊິ່ງຈຳນວນເສື້ອທີ່ມອບໃນຄັ້ງນີ້ 500 ຜືນ ມູນຄ່າ 14.500.000 ກີບ.