ລາວ ສະເໜີແຂວງຢູນນານ ເພີ່ມຕົວເລກສິນຄ້າພືດປູກທົດແທນການປູກຝິ່ນ

425

ລັດຖະມົນຕີ ກະຊວງອຸດສາຫະກຳ ແລະ ການຄ້າສະເໜີແຂວງຢູນນານ ສປ ຈີນເພີ່ມຕົວເລກສິນຄ້າທີ່ນອນຢູ່ໃນພືດປູກທົດແທນການປູກຝິ່ນຢູ່ລາວໃຫ້ຫຼາຍຂຶ້ນ ລວມທັງໃຫ້ສປປ ລາວ ມີສ່ວນຮ່ວມໃນຂອດການຄຸ້ມຄອງຫຼາຍຂຶ້ນດ້ານມູນຄ່າການຄ້າຂອງ ສປປ ລາວກັບແຂວງຢູນນານ ບັນລຸ 1,6 ຕື້ໂດລາ ໃນປີຜ່ານມາ.

ວັນທີ 3 ເມສາ ຜ່ານມາ ທ່ານ ນາງ ເຂັມມະນີ ພົນເສນາ ລັດຖະມົນຕີກະຊວງອຸດສາຫະກຳ ແລະ ການຄ້າ ໄດ້ຕ້ອນຮັບ ທ່ານ ຈົ່ງ ກົວຢິງ ຮອງເຈົ້າແຂວງຜູ້ປະຈໍາການ ແຂວງຢູນນານ ສປ ຈີນ ພ້ອມດ້ວຍຄະນະ ເນື່ອງໃນໂອກາດເດີນທາງມາຢ້ຽມຢາມ ແລະ ເຮັດວຽກຢູ່ ສປປ ລາວ ໂດຍມີບັນດາແຂກພາກສ່ວນທີ່ກ່ຽວຂ້ອງພາຍໃນກະຊວງເຂົ້າຮ່ວມ.

ການພົບປະກັນໃນຄັ້ງນີ້ຈຸດປະສົງເພື່ອຮັດແໜ້ນສາຍພົວພັນການຮ່ວມມື ແລະ ການຢ້ຽມຢາມໄປ -ມາຫາສູ່ກັນລະຫວ່າງການນໍາຂັ້ນຕ່າງໆຂອງ ລາວ ກັບ ຈີນ ກໍຄືກັບແຂວງຢູນນານແມ່ນນັບມື້ກ້າວເຂົ້າສູ່ລວງເລິກ,ການຮ່ວມມືໃນດ້ານເສດຖະກິດ, ການຄ້າ ແລະ ການລົງທຶນລະຫວ່າງສອງປະເທດ ໄດ້ຂະຫຍາຍຕົວຢ່າງຕໍ່ເນື່ອງ ແລະ ນັບມື້ເພີ່ມຂຶ້ນ ເຊິ່ງໄດ້ປະກອບສ່ວນອັນສໍາຄັນຢ່າງຫຼວງຫຼາຍໃຫ້ແກ່ການພັດທະນາເສດຖະກິດ – ສັງຄົມຂອງລາວ ໃນໄລຍະຜ່ານມາ ໂດຍສະເພາະແມ່ນບັນດາ 3 ແຂວງພາກເໜືອ ທີ່ມີຊາຍແດນຕິດຈອດກັບແຂວງຢູນນານ ຄື: ແຂວງຜົ້ງສາລີ, ອຸດົມໄຊ ແລະ ຫຼວງນ້ຳທາ. ນອກນັ້ນ, ສປ ຈີນ ກໍໄດ້ຖືເອົາແຂວງຢູນນານ ເປັນປ້ອມດ່ານໜ້າຂອງການພົວພັນ ແລະ ຮ່ວມມືໃນຫຼາຍໆດ້ານ ໂດຍສະເພາະແມ່ນໃນຂົງເຂດເສດຖະກິດ, ການຄ້າ, ການລົງທຶນກັບລາວກັບບັນດາປະເທດໃນພາກພື້ນ ທັງເປັນປະຕູເຂົ້າ – ອອກຂອງການເດີນທາງໄປ – ມາຫາສູ່ຢ້ຽມຢາມກັນທຸກລະດັບທັງສູນກາງ ແລະ ທ້ອງຖິ່ນ.

ສະເພາະມູນຄ່າການຄ້າ ລະຫວ່າງ ລາວ ກັບ ແຂວງຢູນນານປີຜ່ານມາ ສາມາດບັນລຸໄດ້ 1,6 ຕື້ໂດລາ ເພີ່ມຂຶ້ນ 5,8%. ໃນນີ້, ສປປ ລາວ ນໍາເຂົ້າສິນຄ້າຈາກແຂວງຢູນນານ ຈໍານວນ 288 ລ້ານໂດລາ ເພີ່ມຂຶ້ນ 21,5% ແລະ ສົ່ງອອກໄປແຂວງຢູນນານ 770 ລ້ານໂດລາ ເພີ່ມຂຶ້ນ 0,9%. ທີ່ສໍາຄັນແມ່ນການປູກພືດທົດແທນການປູກຝິ່ນ ກໍໄດ້ຮັບການຈັດຕັ້ງປະຕິບັດໄດ້ດີ ຍ້ອນການປັບປຸງໄລຍະການອະນຸມັດໂກຕາປະກາດຕັ້ງແຕ່ຫົວທີ ແລະ ຂະຫຍາຍເວລາຂອງການສົ່ງອອກໃຫ້ມີເວລາຫຼາຍຂຶ້ນກວ່າເກົ່າ.

ທັງນີ້, ທ່ານລັດຖະມົນຕີ ອຄ ກໍໄດ້ສະເໜີໃຫ້ຝ່າຍຈີນ ສືບຕໍ່ ແລະ ພິຈາລະນາເພີ່ມຕົວເລກສິນຄ້າຢູ່ໃນໂຄງການປູກພືດທົດແທນການປູກຝິ່ນຢູ່ລາວໃຫ້ຫຼາຍຂຶ້ນ ເພື່ອຊ່ວຍປະຊາຊົນຢູ່ເຂດຊົນນະບົດ
ໂດຍສະເພາະປະຊາຊົນໃນເຂດພາກເໜືອຂອງລາວໃຫ້ມີລາຍໄດ້ ແລະ ຍົກສູງລະດັບຊີວິດການເປັນຢູ່ໃຫ້ດີຂຶ້ນ ທັງຂະຫຍາຍເວລາຂອງການໃຫ້ນະໂຍບາຍຍາວຂຶ້ນຕື່ມອີກ ແລະ ເຮັດເປັນຫຼາຍໄລຍະ. ພ້ອມກັນນັ້ນ, ທາງດ້ານກົນໄກຄຸ້ມຄອງ ກໍສະເໜີໃຫ້ຝ່າຍລາວມີສ່ວນຮ່ວມຫຼາຍຂຶ້ນ ແລະ ມີການແລກປ່ຽນບົດຮຽນກັນເປັນປະຈໍາ ເພື່ອປັບປຸງກົນໄກການຄຸ້ມຄອງໃຫ້ດີຂຶ້ນກວ່າເກົ່າ ແລະ ເອົາໃຈໃສ່ຊຸກຍູ້ກົນໄກຮ່ວມມືພາກເໜືອລາວກັບແຂວງຢູນນານ ໃຫ້ນັບມື້ດີຂຶ້ນ, ຜັນຂະຫຍາຍການຕົກລົງຂອງສອງຝ່າຍໃຫ້ໄດ້ຮັບໝາກຜົນດີ, ແຕ່ສໍາຄັນຕໍ່ໜ້າສະເໜີຢາກໃຫ້ແຂວງຢູນນານ ພິຈາລະນາສ້າງໃຫ້ມີໂຄງການຊ່ວຍເຫຼືອລ້າຕໍ່ບັນດາແຂວງພາກເໜືອເປັນໂຄງການສະເພາະຫຼາຍຂຶ້ນ ເພື່ອຍົກບົດບາດຂອງແຂວງຢູນນານ ຕໍ່ບັນດາແຂວງພາກເໜືອຂອງລາວໃຫ້ຫຼາຍຂຶ້ນຕື່ມ.