ນະຄອນຫຼວງ! ກຳນົດ 8 ຂໍ້ຫ້າມ, ພ້ອມວາງ 3 ມາດຕະການຕໍ່ຜູ້ລະເມີດ ໃນບຸນປີໃໝ່

369

ເພື່ອຮັບປະກັນໃຫ້ແກ່ການສະເຫຼີມສະຫຼອງບຸນປີໃໝ່ລາວປະຈຳປີ ພສ 2562 ນັບແຕ່ວັນທີ 14-16 ເມສາ 2019 ທີ່ຈະໝູນວຽນມາເຖິງນີ້ ແລະ ຍັງເປັນໂອກາດໜຶ່ງທີ່ສໍາຄັນໃນການສືບຕໍ່ເສີມຂະຫຍາຍມູນເຊື້ອຮີດຄອງປະເພອັນດີງາມ ແລະ ຄວາມສາມັກຄີເປັນປຶກແຜ່ນທີ່ມີມາແຕ່ດົນນານແລ້ວ. ຄຽງຄູ່ກັນີ້, ຍັງເປັນງານໃຫຍ່ທີ່ສຳຄັນຂອງຊາດ ທີ່ປວງຊົນລາວເຮົາໄດ້ຖືເອົາໂອກາດນີ້ ອວຍພອນໄຊເຊິ່ງກັນ ແລະ ກັນ, ພ້ອມທັງຈັດຕັ້ງສະເຫຼີມສະຫຼອງດ້ວຍບັນຍາກາດເບີກບານມ່ວນຊື່ນ, ຕິດພັນກັບການສົ່ງເສີມການທ່ອງທ່ຽວ ບົນຈິດໃຈປະຢັດມັດທະຍັດ ທັງຮັບປະກັນຄວາມສະຫງົບ, ຄວາມເປັນລະບຽບຮຽບຮ້ອຍ ແລະ ຄວາມສະອາດຈົບງາມ.

ສະນັ້ນ, ກອງບັນຊາການ ປກສ ນະຄອນຫຼວງວຽງຈັນ, ກະກວງປ້ອງກັນຄວາມສະຫງົບ ຈຶ່ງໄດ້ແຈ້ງການ ເຖິງສຳນັກງານ-ອົງການ, ກຸ່ມບ້ານ,ຫົວໜ່ວຍທຸລະກິດ, ການຈັດຕັ້ງສາກົນ, ພະນັກງານ-ລັດຖະກອນ, ທະຫານ, ຕຳຫຼວດ, ພໍ່ແມ່ປະຊາຊົນ, ຊາວຕ່າງຊາດ ທີ່ມາເຄື່ອນໄຫວດຳລົງຊີວິດຢູ່ນະຄອນຫຼວງວຽງຈັນ ໃຫ້ເພີ່ມທະວີປ້ອງກັນຮັກສາຄວາມສະຫງົບ, ຄວາມເປັນລະບຽບຮຽບຮ້ອຍ ໃນໄລຍະຈັດງານສະເຫຼີມສະຫຼອງບຸນປີໃໝ່ລາວ ພສ 2562 ຢູ່ນະຄອນຫຼວງວຽງຈັນ.

ເຊິ່ງໃນແຈ້ງການໄດ້ອອກ 8 ຂໍ້ຫ້າມ ແລະ 3 ມາດຕະການຕໍ່ຜູ້ລະເມີດດັ່ງນີ້:

ຫ້າມບໍ່ໃຫ້ຊື້-ຂາຍສິນຄ້າແລະ ອຸປະກອນທີ່ກໍ່ໃຫ້ເກີດສຽງແຕກ, ສຽງດັງທຸກປະເພດ, ບໍ່ໃຫ້ຈູດໝາກກະໂພກ, ບັ້ງໄຟດອກທຸກຊະນິດ, ບໍ່ໃຫ້ນຳໃຊ້ທາດລະເບີດ, ທາດແຕກ, ທາດເບື່ອ-ເຄມີ, ທາດກຳມະລັງສີ ແລະ ວັດຖຸອອກລິດຕໍ່ສຸຂະພາບຈິດ ທີ່ເປັນຜົນລົບຕໍ່ຄວາມສະຫງົບ, ຄວາມເປັນລະບຽບຮຽບຮ້ອຍໃນສັງຄົມ.

ຫ້າມບໍ່ໃຫ້ໃຊ້ນ້ຳເປີເປື້ອນ, ນ້ຳສີ, ນ້ຳປົນກັບພືດທີ່ຄັນຄາຍ, ນ້ຳກ້ອນໃສ່ຖົງຢາງຫົດ ຫຼື ແກວ່ງໃສ່ກັນ, ບໍ່ໃຫ້ນຸ່ງເຄື່ອງສັ້ນ-ເຂີນ ຍົ້ວຍຸ ທີ່ບໍ່ຖືກຕ້ອງຕາມຮີດຄອງປະເພນີ, ການທ່ຽວຫຼີ້ນແບບລາມົກອານາຈານ ແລະ ຫຼີ້ນການພະນັນ ທຸກປະເພດຢ່າງເດັດຂາດ.

3 ຫ້າມໃຊ້ພາຫະນະບັນຈຸຖັງນ້ຳ, ຄຸນ້ຳ ຫຼື ທໍ່ຢາງຕໍ່ນ້ຳຈາກເຮືອນອອກມາ ເພື່ອເລາະຫົດນ້ຳ ແລະ ຫ້າມລວມຕົວກັນເປັນກຸ່ມ ເຕັ້ນຟ້ອນຕາມທ້ອງຖະໜົນ ຢ່າງເດັດຂາດ.

4  ຫ້າມບໍ່ໃຫ້ລົງຫຼີ້ນນ້ຳຢູ່ຫາດຊາຍ, ນ້ຳຂອງ ທີ່ບໍ່ໄດ້ຮັບອະນຸຍາດຈາກທາງການ ຫຼື ບ່ອນທີ່ບໍ່ມີເຈົ້າໜ້າທີ່ປ້ອງກັນຮັກສາຄວາມສະຫງົບ, ຮັກສາຄວາມປອດໄພ ເພື່ອຫຼີກລຽງຕໍ່ສິ່ງທີ່ບໍ່ເພິ່ງປາຖະໜາອາດຈະເກີດຂຶ້ນ.

5 ຫ້າມເສບຄົບງັນຕາມລົດ ຫຼື ເຮືອນຊານເນື່ອງນັນ, ເປີດສຽງດັງເກີນຂອບເຂດ, ຫ້າມຂີ່ລົດເປັນພຶງເປັນແພ, ແລ່ນລົດໄວເກີນຂອບເຂດ ເວລາຂັບຂີ່ລົດຕ່າງໆ ສັນຈອນຕາມທ້ອງຖະໜົນ ຜູ້ຂັບຂີ່ຕ້ອງປະຕິບັດຕາມກົດລະບຽບຈະລາຈອນວາງອອກຢ່າງເຂັ້ມງວດ ເຊັ່ນ: ດື່ມສິ່ງມຶນເມົາແລ້ວບໍ່ຂັບລົດ, ຂັບລົດບໍ່ດື່ມສິ່ງມຶນເມົາ ຢ່າງເດັດຂາດ.

6 ຫ້າມບໍ່ໃຫ້ຜູ້ໂດຍສານນັ່ງຫົວລົດເວລາຂັບຂີ່ພາຫະນະໄປຕາມທ້ອງຖະໜົນ, ລົດບັນທຸສິນຄ້າໜັກ, ລົດໂດຍສານໃສ່ເກີນຂອບເຂດ, ຜູ້ຂັບຂີ່ພາຫະນະທຸກປະເພດ ຕ້ອງປະຕິບັດຕາມປ້າຍສັນຍານຈະລາຈອນ ແລະ ກົດລະບຽບການສັນຈອນຢ່າງເຄັ່ງຄັດ.

7  ບັນດາຮ້ານທຸລະກິດບັນເທີງ, ຮ້ານກິນດື່ມ ບໍລິການ ຮອດເວລາ 23 ໂມງ 30 ນາທີ ຕ້ອງຢຸດເຊົາບໍລິການ ຢ່າງເດັດຂາດ.

8 ຫ້າມຫົດນ້ຳໃສ່ເຈົ້າໜ້າທີ່ ທີ່ກຳລັງປະຕິບັດໜ້າທີ່ຈັດສັນຄວາມເປັນລະບຽບຮຽບຮ້ອຍຕາມເສັ້ນທາງ ແລະ ສະຖານທີ່ຕ່າງໆ.

ສ່ວນມາດຕະການຕໍ່ຜູ້ລະເມີດ 8 ຂໍ້ຫ້າມມີດດັ່ງນີ້:

1 ທຸກການກະທຳ ທີ່ລະເມີດຂໍ້ຫ້າມໃນແຈ້ງການສະບັບນີ້ ດ້ວຍການເຈດຕະນາ ຫຼື ບໍ່ເຈດຕະນາ ລ້ວນແຕ່ໄດ້ຖືກສຶກສາອົບຮົມ, ກ່າວເຕືອນ, ປັບໃໝຕາມສະຖານະການລະເມີດ ຫຼື ດຳເນີນຄະດີ ຕໍ່ຜູ້ກະທຳຜິດສ່ວນບຸກຄົນ, ກຸ່ມຄົນ, ນິຕິບຸກຄົນ ໂດຍປະສານສົມທົບກັບ ທຸກພາກສ່ວນທີ່ກ່ຽວຂ້ອງ ເພື່ອປະຕິບັດຕາມລະບຽບກົດໝາຍ.

2 ສຳລັບການຊື້-ຂາຍ, ການມີໄວ້ໃນຄອບຄອງໝາກກະໂພກ, ບັ້ງໄຟດອກທຸກປະເພດ ຫຼື ຈູດ ໝາກກະໂພກ, ບັ້ງໄຟດອກທຸກປະເພດ ຖ້າເຈົ້າໜ້າທີ່ກ່ຽວຂ້ອງ, ອຳນາດການປົກຄອງບ້ານ, ຕຳຫຼວດກຸ່ມ, ປກສ ບ້ານ ກວດກາພົບເຫັນໃຫ້ຢຶດ ແລະ ທຳລາຍຖີ້ມ; ພ້ອມທັງນຳຕົວຜູ້ກະທຳຜິດ ມອບໃຫ້ອໍານາດການປົກຄອງບ້ານສ້າງບົດບັນທຶກ ສຶກສາອົບຮົມ, ກ່າວເຕືອນ ແລະ ປັບໃໝຕາມລະບຽບຂອງບ້ານ.

3 ການປັບໃໝແຕ່ລະກໍລະນີ ໃຫ້ອີງໃສ່ຂໍ້ຕົກລົງສະບັບເລກທີ 1323/ຈນວ, ລົງວັນທີ 21 ທັນວາ2018 ຂອງທ່ານເຈົ້າຄອງນະຄອງຫຼວງວຽງຈັນ ແລະ ດຳລັດສະບັບເລກທີ 188/ນຍ, ລົງວັນທີ 03 ກໍລະກົດ 2017 ຂອງນາຍົກລັດຖະມົນຕີ.