ສອງທະນາຄານຊັ້ນນຳ ລາວ – ໄທ ຮ່ວມກັນໃຫ້ບໍລິການຊຳລະສະສາງຂ້າມຊາຍແດນ

415

ທະນາຄານທະນາຊາດ ( TBank ) ແລະ ທະນາຄານການຄ້າຕ່າງປະເທດລາວ ມະຫາຊົນ ( BCEL ) ໃຫ້ບໍລິການຊຳລະສະສາງຂ້າມຊາຍແດນ ໂດຍໃຊ້ເຕັກໂນໂລຊີ ລະບົບ QR Code ໃນໂທລະສັບມືຖື ຈະຊ່ວຍໃຫ້ລູກຄ້າທັງສອງປະເທດສາມາດຊື້ສິນຄ້າໄດ້ສະດວກຍິ່ງຂຶ້ນ.

ຫຼ້າສຸດທັງສອງທະນາຄານ ໄດ້ຮ່ວມນຳສະເໜີບໍລິການດັ່ງກ່າວເປັນຄັ້ງທຳອິດ ໃນງານ ASEAN Payment Connectivity Exhibition ທີ່ຈັດຂຶ້ນທີ່ຈັງຫວັດຊຽງລາຍ ປະເທດໄທ ໃນວັນທີ 4 ເມສາ 2019.

ບໍລິການດັ່ງກ່າວສ້າງຂຶ້ນຈາກຄວາມສຳເລັດຂອງບໍລິການຊຳລະສະສາງຂ້າມຊາຍແດນຜ່ານລະບົບ QR Code ເມື່ອປີ 2018 ຜ່ານມາ ເຊິ່ງໄດ້ຮັບການພັດທະນາຮ່ວມກັນລະຫວ່າງ ທະນາຄານທະນາຊາດ ( TBANK ) ແລະ ທະນາຄານການຄ້າຕ່າງປະເທດລາວ ມະຫາຊົນ ( BCEL ) ທີ່ເປັນທະນາຄານຊັ້ນນຳດ້ານເຕັກໂນໂລຊີ e – Banking ທີ່ມີສ່ວນແບ່ງການຕະຫຼາດສູງສຸດໃນ ສປປ ລາວ.

ການບໍລິການຊໍາລະສະສາງຂ້າມຊາຍແດນເບື້ອງຂາເຂົ້າ ຜ່ານ QR Code ຈະຊ່ວຍໃຫ້ລູກຄ້າ BCEL ຊຳລະຄ່າສິນຄ້າໃນປະເທດໄທ ໄດ້ແບບ Real Time ພຽງແຕ່ສະແກນ QR Code ຂອງຮ້ານຄ້າຢູ່ປະເທດໄທ ດ້ວຍຟັງຊັນຊຳລະເງິນ QR Scan “ BCEL OnePay ” ໃນ ແອັບພລິເຄຊັນ ມືຖື BCEL One. ເມື່ອລະບົບຊຳລະສະສາງມີການກວດສອບລະຫວ່າງທະນາຄານສຳເລັດສົມບູນ, ທະນາຄານທະນາຊາດ TBANK ຈະດຳເນີນການໂອນເງິນພາຍໃນປະເທດໄທ ໃນນາມຂອງ BCEL ໄປຍັງບັນຊີຂອງຮ້ານຄ້າໄທແຕ່ລະຮ້ານ ເພື່ອໃຫ້ໝັ້ນໃຈເຖິງ ຄວາມປອດໄພໃນການຊໍາລະເງິນຈາກຜູ້ຊື້ຫາຜູ້ຂາຍ ເພື່ອມອບປະສົບການການຊໍາລະສະສາງຂ້າມຊາຍແດນຜ່ານມືຖືໄປສູ່ອີກລະດັບໜຶ່ງ.

ປີ 2019 TBANK ຮ່ວມມືກັບ BCEL ແລະ ໄດ້ເພີ່ມບໍລິການຊໍາລະເງິນ QR Code ຂ້າມຊາຍແດນເບື້ອງຂາອອກ ເຊິ່ງຈະຊ່ວຍໃຫ້ລູກຄ້າຂອງ TBANK ຫຼື ລູກຄ້າຄົນໄທ ທີ່ເດີນທາງມາປະເທດລາວ ສາມາດຊຳລະຄ່າສິນຄ້າທີ່ຮ້ານຄ້າ ທີ່ມີ OnePay ໄດ້ທັນທີ ຜ່ານ PromptPay ການຊໍາລະເງິນທາງມືຖືທີ່ເປັນຂອງທະນາຄານໄທ ໄດ້ຄືກັບນຳໃຊ້ “ ທະນາຊາດ Connect ” ໂດຍ Application ຂອງທະນາຄານໄທ ຈະອ່ານລະຫັດ QR ຂອງຮ້ານຄ້າໃນປະເທດລາວ ແລະ ຈະສະແດງລາຍລະອຽດຂໍ້ມູນການຊຳລະເງິນໂດຍອັດຕະໂນມັດ ເຊັ່ນ: ລາຍລະອຽດຂອງລາຍການທີ່ຊື້, ລາຄາທັງໝົດເປັນເງິນກີບ ແລະ ເງິນບາດ.

ການເພີ່ມຜະລິດຕະພັນໃໝ່ຄັ້ງນີ້ຈະອຳນວຍຄວາມສະດວກໃຫ້ການຊຳລະເງິນຂ້າມຊາຍແດນ ທັງຍັງຈະເພີ່ມຄວາມໄວໃນການເຮັດທຸລະກໍາ, ຫຼຸດຜ່ອນຕົ້ນທຶນການໃຊ້ເງິນສົດ, ເພີ່ມຄວາມສະດວກສະບາຍ ແລະ ຄວາມປອດໄພ.