ກວດສອບເສັ້ນທາງຂຶ້ນເໜືອ – ລົງໃຕ້ ກ່ອນກັບບ້ານໄລຍະປີໃໝ່ລາວ

461

ຂະແໜງໂຍທາທິການ ແລະ ຂົນສົ່ງຢູ່ຫຼາຍເຂດກຳລັງຂຸ້ນຂ້ຽວສືບຕໍ່ກໍ່ສ້າງເສັ້ນທາງໃຫ້ມີການໄປ -ມາຢ່າງສະດວກສະບາຍເປັນປົກກະຕິ ໂດຍສະເພາະເສັ້ນທາງ ເລກທີ 13 ເໜືອ ແລະ 13 ໃຕ້ ທີ່ຈະຮອງຮັບລົດໂດຍສານ ຫຼື ລົດທົ່ວໄປໃນໄລຍະປີໃໝ່ລາວ.

ໄພພິບັດທາງທຳມະຊາດໃນລະດູຝົນປີ 2018 ຜ່ານມາ ໄດ້ສົ່ງຜົນກະທົບສ້າງຄວາມເສຍຫາຍໃນວົງກວ້າງ ໂດຍສະເພາະພື້ນຖານໂຄງລ່າງ, ຖະໜົນຫົນທາງສາຍຫຼັກຕ່າງໆໃນຂອບເຂດທົ່ວປະເທດ ໂດຍສະເພາະແມ່ນເສັ້ນທາງນັບແຕ່ນະຄອນຫຼວງ – ບໍລິຄໍາໄຊ – ຄໍາມ່ວນ ເຊື່ອມຕໍ່ໃສ່ພາກໃຕ້ ແລະ ອີກຈຸດທີ່ເຫັນວ່າເປ່ເພເສຍຫາຍໃກ້ຄຽງກັນ ນະຄອນຫຼວງ – ວັງວຽງ – ກາສີ – ຫຼວງພະບາງ – ອຸດົມໄຊ ເຊື່ອມຕໍ່ໃສ່ບັນດາແຂວງພາກເໜືອ ປັດຈຸບັນແມ່ນມີການສ້ອມແປງເສັ້ນທາງດັ່ງກ່າວທີ່ເປັນສາຍຫຼັກໃກ້ຈະສຳເລັດເກືອບໝົດແລ້ວ ສາມາດທຽວໄດ້ປົກກະຕິ ແຕ່ຍັງມີບາງຍ່ານເທົ່ານັ້ນທີ່ກຳລັງຈະຍົກລະດັບໜ້າທາງຈາກ 1 ຊັ້ນມາເປັນ 2 ຊັ້ນ ໃຫ້ໄດ້ມາດຖານສູງຂຶ້ນກວ່າເກົ່າ.

ທ່ານ ທອງລິດ ຟອງສີນວນ ຮອງພະແນກ ໂຍທາທິການ ແລະ ຂົນສົ່ງ ແຂວງບໍລິຄຳໄຊ ລາຍງານວ່າ: ຍທຂ ບໍລິຄຳໄຊ ໄດ້ເລີ່ມລົງມືກໍ່ສ້າງໂດຍສະເພາະແມ່ນເສັ້ນທາງເລກທີ 13 ໃຕ້ ນັບແຕ່ເທສະບານ ແຂວງ – ນະຄອນຫຼວງ, ແຂວງ – ແຂວງຄໍາມ່ວນ ແລະ ເຂດຫຼັກ 20 – ອອກສູ່ຫວຽດນາມ ການລົງມືສ້ອມແປງຄືນແມ່ນເລີ່ມມາໄດ້ປະມານເກືອບ 2 ເດືອນແລ້ວ ດ້ວຍ ຄວາມເອົາໃຈໃສ່ຂອງບໍລິສັດທີ່ຮັບເໝົາສ້ອມແປງສາມາດປະຕິບັດໄດ້ເກືອບ 100% ເພາະຍັງມີບາງຍ່ານທາງເທົ່ານັ້ນທີ່ປູໄດ້ຊັ້ນດຽວ ແຕ່ປັດຈຸບັນລົດທີ່ທຽວກໍເຫັນວ່າໄປ – ມາສະດວກຂຶ້ນນັບແຕ່ໄດ້ຮັບໄພພິບັດໃນໄລຍະລະດູຝົນຜ່ານມາ ແນວໃດກໍຕາມສຳລັບຜູ້ທີ່ຈະເດີນທາງລົງພາກໃຕ້ໄລຍະປີໃໝ່ລາວທີ່ຍັງເຫຼືອບໍ່ພໍເທົ່າໃດວັນນີ້ແມ່ນໃຫ້ສະບາຍໃຈໄດ້.

ສຳລັບທ່ານໃດທີ່ເຄີຍໄດ້ຜ່ານເສັ້ນທາງຈາກນະຄອນຫຼວງວຽງຈັນ – ບັນດາແຂວງພາກໃຕ້ ໂດຍມີເສັ້ນທາງເລກທີ 13 ໃຕ້ເປັນຫຼັກ ນັບແຕ່ຕົ້ນເດືອນສິງຫາ 2018 – ທ້າຍເດືອນກຸມພາ 2019 ຈະສັງເກດເຫັນວ່າເສັ້ນທາງມີຄວາມຊຸດໂຊມຈາກອາຍຸການຊົມໃຊ້ມາຫຼາຍປີລວມທັງເປ່ເພຈາກສະພາບນ້ຳຖ້ວມ, ຈາກການເຊາະເຈື່ອນຂອງນ້ຳໃນລະດູຝົນເຮັດໃຫ້ທາງເປັນຂຸມ ແລະ ເປ່ເພເປັນບາງບ່ອນໂດຍສະເພາະຈາກ ນະຄອນຫຼວງ – ບໍລິຄໍາໄຊ – ແຂວງຄໍາມ່ວນແມ່ນມີຄວາມຫຍຸ້ງຍາກລົດທີ່ຜ່ານຕ້ອງໄດ້ຄ່ອຍໄປ – ມາແບບມີສະຕິກິນເວລາອອກໄປ ສ່ວນຄໍາມ່ວນ – ສະຫວັນນະເຂດ – ຈໍາປາສັກ ຖືວ່າບໍ່ໄດ້ຮັບຄວາມເສຍຫາຍຫຼາຍປານໃດ.

ທ່ານ ສຸມົນທາ ສົມຈັນນະວົງ ຫົວໜ້າພະແນກ ໂຍທາທິການ ແລະ ຂົນສົ່ງ ແຂວງວຽງຈັນ ໃຫ້ສຳພາດວ່າ: ນັບແຕ່ໄດ້ຮັບງົບປະມານໄລຍະແຕ່ຕົ້ນປີ 2019 ຍທຂ ແຂວງ ວຽງຈັນ ກໍໄດ້ເລີ່ມລົງມືສ້ອມແປງເສັ້ນທາງໂດຍສະເພາະແມ່ນເສັ້ນທາງເລກທີ 13 ເໜືອທີ່ຜ່ານ ແຂວງວຽງຈັນ ທີ່ເຫັນວ່າມີຈຸດຊຸດໂຊມຫຼາຍຈຸດ ປັດຈຸບັນການສ້ອມແປງແມ່ນໃກ້ຈະສຳເລັດທຸກຈຸດແລ້ວຄາດວ່າຈະເລັ່ງລົງມືສ່ວນທີ່ຍັງເຫຼືອໃຫ້ສຳເລັດກ່ອນປີໃໝ່ລາວທີ່ຈະເຖິງ ສຳລັບຜູ້ທີ່ຈະເດີນທາງຈາກນະຄອນຫຼວງວຽງຈັນ – ວັງວຽງ ແມ່ນໃຫ້ຄ່ອຍໄປຄ່ອຍມາໄລຍະນີ້ເພາະກຳລັງມີການສ້ອມແປງເສັ້ນທາງຄືນ ໂດຍສະເພາະແມ່ນຈຸດຫ້ວຍໝໍ້ຫາວັງວຽງ, ສ່ວນ ວັງວຽງ – ກາສີ, ກາສີ – ຫຼວງພະບາງ ແມ່ນສ້ອມແປງໃກ້ຈະສໍາເລັດເຊັ່ນກັນ, ກາສີ – ໄຊຍະບູລີ ຖ້າບໍ່ຈໍາເປັນໃຫ້ຫຼີກເວັ້ນທາງເສັ້ນດັ່ງກ່າວເພາະມີບາງຈຸດທີ່ເຫັນວ່າດິນມັກທັບຖົມເສັ້ນທາງເຊິ່ງໜ່ວຍງານກ່ຽວຂ້ອງຕ້ອງໄດ້ຕິດຕາມ ແລະ ເຝົ້າລະວັງເປັນປະຈຳ.

ແນວໃດກໍຕາມສະພາບການເສື່ອມໂຊມຂອງເສັ້ນທາງເລກທີ 13 ເໜືອ ທີ່ຜ່ານແຂວງວຽງຈັນ ເຫັນວ່າມີຫຼາຍຈຸດສາເຫດໜຶ່ງແມ່ນມາຈາກການເຊາະເຈື່ອນຂອງດິນໄລຍະລະດູຝົນຜ່ານມາ ແລະ ອີກສາເຫດແມ່ນມາຈາກການບັນທຸກນ້ຳໜັກເກີນຂອງລົດບັນທຸກທີ່ແກ້ໄຂໄດ້ຍາກຍ້ອນເຈົ້າຂອງລົດບໍ່ໃຫ້ຄວາມຮ່ວມມື ແລະ ມີການລັກເຮັດໃນຍາມລັບຕາຂອງໜ່ວຍງານກ່ຽວຂ້ອງກາຍເປັນບັນຫາທີ່ແກ້ໄຂໄດ້ຍາກ ທ່ານ ຫົວໜ້າ ພະແນກ ຍທຂ ແຂວງວຽງຈັນກ່າວ.

ທ່ານ ນາງ ຈັນແດງ ບຸຜາພີ ຜູ້ອຳນວຍການ ບໍລິສັດ ສົມປະສົງ ກໍ່ສ້າງ ເຄຫາ, ຂົວທາງ – ຊົນລະປະທານ ຜູ້ຮັບເໝົາກໍ່ສ້າງເສັ້ນທາງເລກທີ 13 ແຂວງອຸດົມໄຊ ກ່າວວ່າ: ເສັ້ນທາງໄລຍະ ອຸດົມໄຊ – ຫຼວງພະບາງ, ອຸດົມໄຊ – ຫຼວງນໍ້າທາ ເຫັນວ່າມີ ຄວາມສະດວກສະບາຍການສ້ອມແປງແມ່ນໃກ້ຈະສໍາເລັດສົມບູນຍັງເຫຼືອພຽງແຕ່ຄວາມລະອຽດເລັກໜ້ອຍເທົ່ານັ້ນ ສຳລັບຜູ້ທີ່ມີຈຸດປະສົງຈະເດີນທາງມາອຸດົມໄຊ ຫຼື ຜ່ານເສັ້ນທາງດັ່ງກ່າວປັດຈຸບັນແມ່ນໃຊ້ໄດ້ຢ່າງປົກກະຕິ.