ສຳເລັດການກໍ່ສ້າງອາຄານຮຽນ ແລະ ນ້ຳລິນ ຢູ່ເມືອງພູກູດ

617

ເມືອງພູກູດ ແຂວງຊຽງຂວາງໄດ້ຮັບການຊ່ວຍເຫຼືອຈາກສູນລວມຄຣິສຕະຈັກຂ່າວປະເສີດ ແຫ່ງ ສປປ ລາວໃນການສ້າງອາຄານຮຽນຖາວອນ ( ປະຖົມ ) ບ້ານພຽງດີ ຂະໜາດ 8 x 21 ແມັດ, ມີ 3 ຫ້ອງຮຽນ, ຫ້ອງນ້ຳນອກອາຄານຮຽນ 1 ຫຼັງ, ມີ 2 ຫ້ອງ ພ້ອມດ້ວຍເຟີນີເຈີຄົບຊຸດລວມມູນຄ່າ 313,8 ລ້ານກີບ ແລະ ທຶນສົມທົບຂອງປະຊາຊົນພາຍໃນບ້ານເປັນໄມ້ໂຄງຫຼັງຄາ ແລະ ແຮງງານ ເປັນມູນຄ່າ 50 ລ້ານກີບ.

ນອກນີ້, ຍັງຊ່ວຍກໍ່ສ້າງນ້ຳລິນ ບ້ານພຽງດີ ຄຸ້ມສົບມ່ວງ ມູນຄ່າ 118,35 ລ້ານກີບ, ປະຊາຊົນໄດ້ປະກອບສ່ວນເປັນໄມ້ແບບ ແລະ ແຮງງານ ມູນຄ່າ 28 ລ້ານກີບ ລວມມູນຄ່າການຊ່ວຍເຫຼືອຄັ້ງນີ້ 432,18 ລ້ານກີບ, ປະຊາຊົນປະກອບສ່ວນ 78 ລ້ານກີບ ໂຄງການດັ່ງກ່າວໄດ້ເລີ່ມຕົ້ນກໍ່ສ້າງວັນທີ 14 ພຶດສະພາ 2018 ເຖິງ 15 ກໍລະກົດ 2018 ສຳເລັດ 100%.

ມາຮອດວັນທີ 30 ມີນາ 2019 ຈຶ່ງໄດ້ຈັດພິທີມອບ – ຮັບອາຄານຮຽນ ແລະ ນ້ຳລິນດັ່ງກ່າວຢູ່ໂຮງຮຽນປະຖົມສົມບູນ ບ້ານພຽງດີ ກ່າວມອບໂດຍ ທ່ານ ຄຳພອນ ຂຸນທະປັນຍາ ປະທານສູນລວມຄຣິສຕະຈັກຂ່າວປະເສີດ ແຫ່ງ ສປປ ລາວ ພ້ອມດ້ວຍຄະນະ ກ່າວຮັບໂດຍ ທ່ານ ນາງ ສີພອນ ພິລາວົງ ຮອງຫົວໜ້າພະແນກພາຍໃນ, ທ່ານ ສົມດີ ບຸນໄຊ ຮອງເຈົ້າເມືອງໆພູກູດ ໂດຍຊ້ອງໜ້າຄະນະພັກບ້ານ ແລະ ພໍ່ແມ່ປະຊາຊົນພາຍໃນບ້ານ.

ຂ່າວ: ບຸນມີ ແສງທຸມມີ, Credit: Laoedaily