ຕຳຫຼວດດ່ານສາກົນບໍ່ເຕນ ຢືດຊິ້ນໝູລັກລອບນໍາເຂົ້າ 5ໂຕນກວ່າ (ປາຍທາງວຽງຈັນ)

388

ຊ່ວງນີ້ສະຖານະການຂອງຊີ້ນໝູນຳເຂົ້າຂ້ອນຂ້າງມີຄວາມສ່ຽງ ໂດຍສະເພາະຈາກຈີນ ແລະ ຫວຽດນາມທີ່ເກີດມີການລະບາດຂອງພະຍາດອະຫິວາໝູອາຟຣິກາ ລັດຖະບານແມ່ນໄດ້ສັ່ງຫ້າມເດັດຂາດບໍ່ໃຫ້ເອົາເຂົ້າມາບໍ່ວ່າຈະເປັນໝູເປັນຫຼືຜະລິດຕະພັນໝູ ແຕ່ເຖິງປານນັ້ນຍັງມີຜູ້ລັກລອບນຳເຂົ້າ 5 ໂຕນກວ່າຜ່ານດ່ານສາກົນບໍ່ເຕນແຂວງຫຼວງນ້ຳທາ ດີແຕ່ເຈົ້າໜ້າທີ່ກວດພົບ ແລະຢືດໄວ້ແລ້ວປະຊາຊົນກໍ່ປອດໄພ.

ໃນວັນທີ 24 ມີນາ 2019 ທີ່ຜ່ານມານີ້ ເຈົ້າໜ້າທີ່ກວດຄົນເຂົ້າ-ອອກເມືອງ ດ່ານສາກົນບໍ່ເຕ່ນ ແຂວງຫຼວງນໍ້າທາ ໄດ້ຍຶດສິນຄ້າປະເພດຊີ້ນໝູ ຈາກຜູ້ຄ້າຂາຍ ແລະ ປະກອບການນັກທຸລະກິດຊາວຈີນ ຈຳນວນ 200 ກວ່າເປົາ ມີນໍ້າໜັກ 5.400 ກິໂລກຼາມ ລວມມູນຄ່າສິນຄ້າທັງໝົດ 80 ກວ່າ ລ້ານກີບ ໃນຂະນະທີ່ນຳເຂົ້າຜ່ານດ່ານສາກົນບໍ່ເຕ່ນ ເພື່ອໄປຈຳໜ່າຍຢູ່ໃນນະຄອນຫຼວງວຽງຈັນ.

ທ່ານ ຄຳແພງ ນະພາວັນ ຫົວໜ້າຂະແໜງລ້ຽງສັດ ແລະ ການປະມົງແຂວງຫຼວງນໍ້າທາ ໃຫ້ຮູ້ວ່າ: ຊີ້ນໝູ ແລະ ຜະລິດຕະພັນໝູທີ່ຍຶດໄດ້ຄັ້ງນີ້ ແມ່ນເຈົ້າໜ້າທີ່ໄດ້ກວດພົບຢູ່ລົດເປົ້າໝາຍຂົນສົ່ງສິນຄ້າ ໝາຍເລກທະບຽນ ບກ 0725 ຫຼວງນໍ້າທາ ເຊິ່ງເຈົ້າຂອງສິນຄ້າ ຊື່ ທ້າວ ຊຽວເຊີນ ອາຍຸ 43 ປີ ນັກທຸລະກິດຊາວຈີນ ມີຈຳນວນ 200 ເປົາ ນໍ້າໜັກ 5.400 ກິໂລກຼາມ ຜູ້ກ່ຽວຈະນຳເຂົ້າມາ ສ ປປ ລາວ ໂດຍຜ່ານດ່ານສາກົນບໍ່ເຕ່ນ ເພື່ອຈະນຳສົ່ງໄປຂາຍຕາມຕະຫຼາດຢູ່ນະຄອນຫຼວງວຽງຈັນ ເພາະວ່າ ຜ່ານມາຜູ້ກ່ຽວເຄີຍຄ້າຂາຍ ແລະ ນຳເຂົ້າຊີ້ນໝູມາແລ້ວ 2 ຄັ້ງ.

ມາໃນວັນທີ 25 ມີນາ ພະແນກກະສິກຳ ແລະ ປ່າໄມ້ ແຂວງຫຼວງນໍ້າທາ ໄດ້ສົມທົບກັບພາກສ່ວນທີ່ກ່ຽວຂ້ອງນໍາຊີ້ນ ແລະ ຜະລິດຕະພັນໝູຈຳນວນດັ່ງກ່າວໄປທຳລາຍຖີ້ມ ດ້ວຍການຝັງດິນ ພ້ອມໃສ່ຢາຂ້າເຊື້ອພະຍາດ ເພື່ອຮັບປະກັນບໍ່ໃຫ້ພະຍາດລະບາດ.

ສ່ວນທ້າວ ຊຽວເຊີນ ເຈົ້າຂອງສິນຄ້າ ແມ່ນນຳຕົວມາເຮັດບົດບັນທຶກສຶກສາອົບຮົມກ່າວເຕືອນ ແລະ ບໍ່ໃຫ້ຜູ້ກ່ຽວ ເຄື່ອນໄຫວນໍາເຂົ້າຊິ້ນສ່ວນສັດປະເພດໝູເຂົ້າມາ ສ ປປ ລາວ ຕື່ມອີກ ຈົນກວ່າຈະໄດ້ຮັບການອະນຸຍາດ.

ຂໍ້ມູນຈາກ: ນສພ ຄວາມສະຫງົບ.