ກາແດງ ລາວ – ຈີນຮັດແໜ້ນສາຍພົວພັນຊ່ວຍເຫຼືອເພື່ອນມະນຸດ

360

ໃນທ້າຍອາທິດຜ່ານມາ ທ່ານ ຄຳຮຸ່ງ ເຮືອງວົງສີ ປະທານອົງການກາແດງລາວ ໄດ້ຕ້ອນຮັບ ທ່ານ ຫາຍຈິ່ງ ຫວັງ ( Mr. Haijing Wang ) ຮອງປະທານກາແດງ ສປ ຈີນ ພ້ອມດ້ວຍຄະນະ ທີ່ໄດ້ເດີນທາງມາຢ້ຽມຢາມ ສປປ ລາວ ເພື່ອເສີມຂະຫຍາຍຮັດແໜ້ນສາຍພົວພັນການຮ່ວມມືໃຫ້ເພີ່ມທະ ວີຍິ່ງຂຶ້ນ.

ທ່ານ ຄຳຮຸ່ງ ເຮືອງວົງສີ ໃຫ້ຮູ້ວ່າ:ໄລຍະຜ່ານມາສະພາກາແດງ ສປ ຈີນໄດ້ໃຫ້ການຊ່ວຍເຫຼືອວຽກງານກູ້ໄພກາແດງລາວໃນການຝຶກອົບຮົມຍົກລະດັບໃຫ້ອາສາສະໝັກ ແລະສະໜັບສະໜູນງົບປະມານ ເພື່ອຈັດຕັ້ງປະຕິບັດໂຄງການຫຼຸດຜ່ອນຄວາມສ່ຽງໄພພິບັດ.

ໂດຍໄດ້ຈັດຕັ້ງປະຕິບັດຢູ່ 3 ແຂວງ ຄື:ແຂວງວຽງຈັນ ກວມເອົາ 05 ເມືອງ ( ເມືອງຊະນະຄາມ, ເມືອງແກ້ວອຸດົມ, ເມືອງໂພນໂຮງ, ເມືອງໝື່ນ ແລະ ເມືອງເຟືອງ ), ນະຄອນຫຼວງວຽງຈັນ ແລະ ຫຼວງພະບາງຜ່ານການຈັດຕັ້ງປະຕິບັດໂຄງການມີປະຊາຊົນໄດ້ຮັບຜົນປະໂຫຍດທັງໝົດ 72.503 ຄົນ.

ທ່ານ ຫາຍຈິ່ງ ຫວັງ ( Mr.Haijing Wang ) ຮອງປະທານກາແດງ ສປ ຈີນ ກໍໄດ້ສະແດງຄວາມດີອົກດີໃຈ ແລະ ຂອບໃຈຕໍ່ອົງການກາແດງລາວທີ່ໄດ້ໃຫ້ການຕ້ອນຮັບຢ່າງອົບອຸ່ນຕໍ່ການຢ້ຽມ ຢາມ ແລະ ໄດ້ແຈ້ງໃຫ້ຊາບຈຸດປະສົງມາຢ້ຽມ ເພາະເປັນຂີດໝາຍອັນສຳຄັນໃນການເສີມສ້າງສາຍພົວພັນ ແລະ ການຮ່ວມມືໃນອະນາຄົດ.

ຈາກນັ້ນ, ກໍໄດ້ລົງນາມເຊັນບົດບັນທຶກຄວາມເຂົ້າໃຈ ເພື່ອເປັນກອບການຮ່ວມມືໃນອະນາຄົດແລະ ໃນໂອກາດດຽວກັນທາງສະພາກາແດງ ສປ ຈີນ ກໍໄດ້ມອບເງິນໃຫ້ແກ່ອົງການກາແດງລາວ ເພື່ອສືບຕໍ່ຊ່ວຍເຫຼືອປະຊາຊົນຜູ້ປະສົບໄພພິບັດ ຈຳນວນ 1 ແສນໂດລາສະຫະລັດ.