ລະລຶກເຖິງວັນແມ່ຍິງສາກົນ ທີ 8 ເດືອນ 3

437

ວັນທີ 8 ເດືອນ 3 ໄດ້ໝູນວຽນມາຄົບຮອບ 109ປີ ( 8/3/1910-8/3/2019)ອີກ ເຊິ່ງເຮັດໃຫ້ແມ່ຍິງທົ່ວພາກພື້ນໃນໂລກໄດ້ພ້ອມພຽງຄຽງໃຈເຕົ້າໂຮມກັນເພື່ອຫວນຄືນເຖິງມູນເຊື້ອອັນຊົງກຽດ ແລະພິລາດອາດຫານໃນການລຸກຮືຂຶ້ນຕໍ່ສູ້ເອົາຄວາມເປັນທຳຈາກພວກນາຍທືນເຈົ້າຂອງໂຮງຈັກໂຮງງານທີ່ເອົາປຽບເອົາລັດເຮັດໃຫ້ເຫຼົ່າກຳມະກອນເພດຍິງໄດ້ຮັບຜົນກະທົບເຖິງວິຖີຊີວິດການເປັນຢູ່ແບບດ້ອຍສິດທິສະເໝີພາບລະຫວ່າງເພດ.

ການປະທ້ວງໄດ້ເກີດຂຶ້ນໃນວັນທີ 28 /2 /1909ໂດຍກຸ່ມຂອງ ພັກສັງຄົນນິຍົມແມ່ຍິງຊາວອະເມຣິກັນ ແລະ ກາຍເປັນຜົນບວກໃຫ້ແກ່ແມ່ຍິງສາກັນທົ່ວໂລກ. ພາຍຫຼັງໜຶ່ງປີຜ່ານມາ ວັນທີ 8 ເດືອນ 3 ປີ 1910ໄດ້ຈັດຕັ້ງກອງປະຊຸມສະມັດຊາແມ່ຍິງສາກົນຄັ້ງທີ່2 ແລະ ປະກາດໃຫ້ກຳນົດເອົາວັນທີ 8 ເດືອນ 3 ຂອງທຸກໆປີເປັນວັນແມ່ຍິງສາກົນ. ສໍາລັບປະເທດ ສປປລາວເຮົາກໍ່ເຊັ່ນດຽວໄດ້ມີການຮັບຮູ້ ແລະໄດ້ຈັດຕັ້ງປະຕິບັດມາເມື່ອເຖິງວາລະຕາມການກຳນົດ ພາຍຫລັງທີ່ລາວເຮົາໄດ້ກາຍເປັນສະມາຊິກຂອງແມ່ຍິງປະຊາທິປະໄຕສາກົນ ແລະໄດ້ສົ່ງຜູ້ແທນແມ່ຍິງລາວເຂົ້າຮ່ວມກອງປະຊຸມ ສືບສານມາຈົນເຖິງປັດຈຸບັນ.

ເຖິງແມ່ນວ່າວັນເວລາຈະຜ່ານພົ້ນໄປ ແຕ່ ປະຫວັດສາດຄັ້ງນັ້ນຍັງຈາລຶກໃນຈິດສຳນຶກຂອງເອື້ອຍນ້ອງແມ່ຍິງທົ່ວໂລກ, ຍັງຮູ້ບຸນຄຸນໃນອຸດົມການຂອງເຫຼົ່າປະທ້ວງນັ້ນຢູ່ສະເໝີ’’ບໍ່ມີວັນນັ້ນ ກໍ່ປັດສະຈາກວັນນີ້’’ ວັນແຫ່ງສິດສະເໝີພາບລະຫວ່າງຍິງ-ຊາຍ.

ບັນດາເອື້ອຍນ້ອງແມ່ຍິງລາວ ມີຄວາມພາກພູມໃຈຢ່າງຫຼົ້ນເຫຼືອ ທີ່ໄດ້ຮັບການສະໜັບສະໜູນຈາກການຈັດຕັ້ງທຸກຂັ້ນ ໂດຍການຊີ້ນຳ ນຳພາຂອງພັກລັດຖະບານ ໃຫ້ເອື້ອຍນ້ອງແມ່ຍິງໄດ້ເຄື່ອນໄຫວ ເພື່ອຄວາມກ້າວໜ້າຂອງເອື້ອຍນ້ອງແມ່ຍິງ.ພວກເຮົາຮູ້ສຶກເປັນພິເສດທີ່ໂດຍກຳເນີດທີ່ເປັນເພດແມ່ທີ່ອ່ອນໂຍນ ເປັນເພດທີ່ໃຫ້ກຳເນີດບຸດຕີບຸດຕາໜໍ່ແໜງອັນປະເສີດຂອງປະເທດຊາດ, ເປັນແມ່ທີ່ດີໃຫ້ຄວາມອົບອຸ່ນລ້ຽງດູ ສິດສອນລູກເຕົ້າຢ່າງບໍ່ຮູ້ອິດໂຮຍ, ໃຫ້ສົມກັບແມ່ທີ່ຍອມແມ່ນແຕ່ຊີວິດຂອງຕົນໃນວັນທີ່ລູກແຕ່ລະຄົນຈະອອກມາມືນຕາເຫັນໂລກ. ວັນນີ້ ຜູ້ເປັນແມ່ພາກພູມໃຈຫລາຍທີ່ເຫັນວ່າໃນທຸກຄອບຄົວ, ການຈັດຕັ້ງທັ້ງພາກລັດ ແລະເອກະຊົນ ໄດ້ພ້ອມກັນຈັດຕັ້ງສະຫຼອງວັນສຳຄັນແດ່ເພດຍິງ.

ນອກຈາກຈະປະຕິບັດຕາມວາລະແລ້ວ ແມ່ຍິງສາກົນ ຍັງຈະຕ້ອງໄດ້ພ້ອມພຽງກັນ ຕັ້ງໜ້າປະຕິບັດຄຳຂວັນປະຈໍາ ວັນແມຍິງສາກົນ 2019ດັ່ງເຊັ່ນ ແມ່ຍິງທຸກຄົນຕ້ອງພ້ອມພຽງກັນປະຕິບັດໃຫ້ເກີດຜົນ ຄືຄວາມດຸນດຸ່ຽງເພື່ອຄວາມກ້າວໜ້າໂດຍເນັ້ນໃຫ້ເຫັນຄວາມສະເໝີພາບ ຍິງ-ຊາຍ.

‘’ ພ້ອມກັນຄິດໃຫ້ເທົ່າທຽມກັນ, ສ້າງຄວາມສະຫຽວສະຫລາດ ແລະ ສ້າງນະວັດຕະກຳສູ່ຄວາມປ່ຽນແປງ’’

ມ້ວນທ້າຍ ຝາກຄວາມສາມັກຄີເປັນເອກະພາບມາຍັງເອື້ອຍນ້ອງເພດຍິງທຸກຖ້ວນໜ້າຂໍຈົ່ງໄດ້ຮັບຄວາມສຳເລັດໃນພາລະກິດສ່ວນຕົວກໍຄືສວນລວມ, ພ້ອມກັນກ້າວໜ້າປະຕິບັດຄວາມຝັນຂອງແມ່ຍິງສາກົນໃຫ້ໄດ້ເພື່ອຄວາມ ສະເໝີພາບອັນຍືນຍົງ.