ສະໜາມບິນໜອງຄ້າງ ກັບມາກໍ່ສ້າງຫຼັງຢຸດໄປເກືອບ 3 ປີ

485

ໂຄງການກໍ່ສ້າງສະໜາມບິນໜອງຄ້າງ ເມືອງຊຳເໜືອ ແຂວງຫົວພັນ ໄດ້ກັບມາສືບຕໍ່ກໍ່ສ້າງອີກຄັ້ງ ພາຍຫຼັງທີ່ໄດ້ຢຸດການກໍ່ສ້າງຊົ່ວຄາວມາແຕ່ປີ 2015. ການລົງມືກໍ່ສ້າງຮອບໃໝ່ແມ່ນໄດ້ເລີ່ມມາແຕ່ເດືອນທັນວາ 2018 ຜ່ານມາ ແຕ່ຍັງບໍ່ທັນມີການລາຍງານທີ່ຊັດເຈນເຖິງກຳນົດຂອງໂຄງການທີ່ຈະສຳເລັດເທື່ອ.

ທ່ານ ສົມບູນ ດາວສະຫວັນ ຫົວໜ້າກອງສະໜາມບິນລາວ, ກະຊວງໂຍທາທິການ ແລະ ຂົນສົ່ງ ໃຫ້ສຳພາດວ່າ: ກຸ່ມບໍລິສັດ Hoang Ahn Gia Lai ໄດ້ກັບມາດຳເນີນການກໍ່ສ້າງສະໜາມບິນໜອງຄ້າງອີກຄັ້ງ ນັບແຕ່ເດືອນທັນວາ 2018 ຜ່ານມາ ຈົນເຖິງປັດຈຸບັນ ມີ ຄວາມຄືບໜ້າປະມານ 50% – 60% ໜ້າວຽກສ່ວນໃຫຍ່ທີ່ເຮັດສໍາເລັດ ປະກອບມີ: ເສັ້ນທາງຂຶ້ນ – ລົງຂອງຍົນ, ອາຄານ, ຫ້ອງປະຕິບັດງານ ແລະ ຫ້ອງຮອງຮັບຜູ້ໂດຍສານຕ່າງໆ ແຕ່ຍັງບໍ່ໄດ້ມີການລະບຸເຖິງວັນເວລາຊັດເຈນທີ່ຈະສຳເລັດເທື່ອ.

ສະໜາມບິນສາກົນໜອງຄ້າງ ໄດ້ເລີ່ມລົງມືກໍ່ສ້າງມາແຕ່ປີ 2013 ໃນມູນຄ່າ 74 ລ້ານໂດລາສະຫະລັດ ໂດຍບໍລິສັດ ຮວງແອ໋ງຢາລາຍ ແລະ ຕໍ່ມາກໍໄດ້ມີການຢຸດການກໍ່ສ້າງຊົ່ວຄາວ ໃນປີ 2015 ທ່າມກາງຄວາມສົງໄສຂອງມວນຊົນ ແລະ ກາຍເປັນຂ່າວໃຫຍ່ໃນເວລານັ້ນ ຈົນມາເຖິງປີ 2016 ແຫຼ່ງຂ່າວຫວຽດນາມ ລາຍງານວ່າສາເຫດຂອງການຢຸດ ຍ້ອນສະພາບທາງດ້ານການເງິນຂອງຜູ້ຮັບເໝົາໂຄງການບໍ່ມີຄວາມຄ່ອງຕົວນັ້ນເອງ.

ແນວໃດກໍຕາມ, ສະໜາມບິນໜອງຄ້າງ ຈະໃຫ້ເປັນອີກແຫ່ງຂອງສະໜາມບິນສາກົນໃນລາວ ເບື້ອງຕົ້ນແມ່ນມີກຳນົດສ້າງໃຫ້ສຳເລັດໃນປີ 2015 ສະໜາມບິນແຫ່ງດັ່ງກ່າວມັນໄດ້ກາຍເປັນຄວາມຫວັງອັນສຳຄັນຂອງລັດຖະບານໃນການເຊື່ອມຈອດເສັ້ນທາງທາງອາກາດ, ອຳນວຍ ຄວາມສະດວກໃຫ້ກັບນັກທ່ອງທ່ຽວທີ່ຈະເດີນທາງຈາກ ວຽງຈັນ – ຫົວພັນ ແລະ ບັນດາແຂວງໃກ້ຄຽງ ທັງເປັນການຍົກລະດັບການທ່ອງທ່ຽວຂອງແຂວງຫົວພັນ ໂດຍສະເພາະບັນດາຖ້ຳທ່ານຜູ້ນຳທີ່ຕິດພັນກັບປະຫວັດສາດທີ່ລືຊື່, ນ້ຳຕົກ ແລະ ສະຖານທີ່ທ່ອງທ່ຽວສຳຄັນອີກຫຼາຍແຫ່ງ ທີ່ເປັນທ່າແຮງດຶງດູດເອົານັກທ່ອງທ່ຽວທັງພາຍໃນ ແລະ ຕ່າງປະເທດເຂົ້າມາທ່ຽວຊົມ ແລະ ສຶກສາໃຫ້ກັບຄົນຮຸ່ນຫຼັງຕໍ່ໆໄປ.

[ ຂ່າວ: ສຸລິນ; ຮູບ: ນັກຂ່າວແຂວງຫົວພັນ ]