ບໍລິຄຳໄຊ ສະເຫຼີມສະຫຼອງ 35 ປີ ຄົບຮອບວັນສ້າງຕັ້ງແຂວງ

508

ເນື່ອງໃນໂອກາດວັນຄົບຮອບການສ້າງຕັ້ງແຂວງ ບໍລິຄຳໄຊ ຄົບຮອບ 35 ປີ (6 ມີນາ 1984-6 ມີນາ 2019 ) ໃນຕອນເຊົ້າວັນທີ 5 ມີນາ 2019 ຜ່ານມາ ການນຳຂັ້ນແຂວງ ພ້ອມດ້ວຍຄະນະໄດ້ໄປວາງພວງມາລາຢູ່ອະນຸສາວະລີນັກຮົບນິລະນາມ ແລະ ອະນຸສາວະລີ ທ່ານ ສີສົມພອນ ລໍວັນໄຊ ແລະ ວາງກະຕ່າດອກໄມ້ຢູ່ອະນຸສອນສະຖານ ປະທານ ໄກສອນ ພົມວິຫານ ເພື່ອສະແດງເຖິງຄວາມເຄົາລົບຮັກ, ຄວາມກະຕັນຍູຮູ້ບຸນຄຸນ ເຖິງຄຸນງາມຄວາມດີ, ນ້ຳໃຈຕໍ່ສູ້ຢ່າງພິລະອາດຫານ ແລະ ບໍ່ຍອມຈຳນົນຂອງນັກຮົບປະຕິວັດ ທີ່ເສຍສະຫຼະຊີວິດ, ເລືອດເນື້ອ ເພື່ອພາລະກິດປະຕິວັດປົດປ່ອຍຊາດ ຈົນໄດ້ຮັບໄຊຊະນະ ແລ້ວປະກາດເອກະລາດ, ແລະ ສະຖາປະນາສາທາລະນະລັດ ປະຊາທິປະໄຕ ປະຊາຊົນລາວ ຂຶ້ນຢ່າງສະຫງ່າຜ່າເຜີຍໃນວັນທີ 2 ທັນວາ 1975.

ສຳລັບພິທີສະເຫຼີມສະຫຼອງວັນສ້າງຕັ້ງແຂວງ ບໍລິຄໍາໄຊ ຄົບຮອບ 35 ປີ ໄດ້ຈັດຂຶ້ນໃນວັນທີ 6 ມີນາ 2019 ຜ່ານມາ ຢູ່ເດີ່ນອະນຸສອນສະຖານທ່ານ ສີສົມພອນ ລໍວັນໄຊ, ເປັນກຽດເຂົ້າຮ່ວມຂອງ      ທ່ານ ພັນຄຳ ວິພາວັນ, ຮອງປະທານປະເທດ, ມີບັນດາການນຳແຂວງ ພ້ອມດ້ວຍມວນຊົນພາຍໃນແຂວງເຂົ້າຮ່ວມຢ່າງຫຼວງຫຼາຍ.

ໃນພິທີ ທ່ານ ກອງແກ້ວ ໄຊສົງຄາມ, ເຈົ້າແຂວງ ບໍລິຄໍາໄຊ ໄດ້ຍົກໃຫ້ຍົກໃຫ້ເຫັນເຖິງມູນເຊື້ອ ແລະ ປະຫວັດຄວາມເປັນມາຂອງແຂວງ ກໍ່ຄື ປະຊາຊົນບັນດາເຜົ່າຊາວບໍລິຄໍາໄຊທີ່ໄດ້ປະກອບສ່ວນອັນໃຫຍ່ຫຼວງເຂົ້າໃນພາລະກິດປົດປ່ອຍຊາດ ແລະ ສະຖາປະນາເປັນ ສປປ ລາວ ໃນວັນທີ 2 ທັນວາ 1975. ຜ່ານຂະບວນການດັ່ງກ່າວໄດ້ມີຫຼາຍຕາແສງ, ບ້ານ, ພະນັກງານ, ສະມາຊິກພັກ ແລະ ປະຊາຊົນບັນດາເຜົ່າ ໄດ້ກາຍເປັນແບບຢ່າງທີ່ດີເດັ່ນແຫ່ງນ້ຳໃຈຕໍ່ສູ້ພິລະອາດຫານ, ເດັດດ່ຽວໜຽວແໜ້ນບໍ່ຍອມຈຳນົນສັດຕູ ຄື: ຕາແສງຈຳ, ຕາແສງນ້ຳສັກ, ຕາແສງພັນວຽງ, ຕາແສງພູໝື່ນ, ບ້ານສົບຂອນ, ນາໄໝ, ນາກວາງ ແລະ ບ່ອນອື່ນໆ.

ພ້ອມກັນນັ້ນ, ຍັງມີພະນັກງານນັກຮົບປະຕິວັດຫຼາຍທ່ານທີ່ໄດ້ສ້າງວິລະກຳອັນລ້ຳເລີດ, ອຸທິດຊີວິດຕົນ ເພື່ອປະເທດຊາດ ເຊັ່ນ: ພໍ່ຊຽງມູນ, ທ່ານ ຄຳອອນ, ທ່ານ ພົມມາ ແລະ ຜູ້ອື່ນໆ. ພາຍຫຼັງປະເທດຊາດໄດ້ຮັບການປົດປ່ອຍ, ເພື່ອເຮັດໃຫ້ການຊີ້ນຳ-ນຳພາມີຄວາມສະດວກ, ຕອບສະໜອງຮອງຮັບ 2 ໜ້າທີ່ຍຸດທະສາດ ຄື: ປົກປັກຮັກສາ ແລະ ສ້າງສາພັດທະນາປະເທດຊາດ, ກົມການເມືອງສູນກາງພັກໄດ້ມີມະຕິ ເລກທີ 03/ກມສພ, ລົງວັນທີ 6 ມີນາ 1984 ວ່າດ້ວຍການສ້າງຕັ້ງແຂວງ ບໍລິຄຳໄຊ ໂດຍໄດ້ລວມເອົາບັນດາເມືອງທີ່ຢູ່ຫ່າງໄກສອກຫຼີກຂອງແຂວງ ວຽງຈັນ ແລະ ແຂວງ ຄໍາມ່ວນ ເລີ່ມແຕ່ນັ້ນເປັນຕົ້ມມາ.

ຕະຫຼອດໄລຍະ 35 ປີ ຜ່ານມາ ພາຍໃຕ້ການນຳພາຂອງອົງຄະນະພັກໃນແຕ່ລະລຸ້ນ, ແຕ່ລະສະໄໝສືບເນື່ອງກັນມານັ້ນ ແລະ ດ້ວຍຄວາມຕັດສິນໃຈສູງຜ່ານຜ່າທຸກຂໍ້ຫຍຸ້ງຍາກ, ເສີມຂະຫຍາຍຈິດໃຈ ເອກະລາດເປັນເຈົ້າຕົນເອງ ແລະ ມະນາຈິດປະຕິວັດ, ບຸກບືນສ້າງຄວາມເຂັ້ມແຂງດ້ວຍຕົນເອງ ໄດ້ເຮັດໃຫ້ແຂວງ ບໍລິຄໍາໄຊ ບັນລຸໄດ້ຜົນສຳເລັດອັນສຳຄັນຫຼາຍປະການ ເຮັດໃຫ້ໂສມໜ້າໃໝ່ຂອງແຂວງມີການປ່ຽນແປງດີຂຶ້ນໃນຫຼາຍດ້ານ ເປັນຕົ້ນ: ສາມາດແກ້ໄຂໄດ້ບັນຫາຄວາມບໍ່ສະຫງົບທີ່ແກ່ຍາວມາຫຼາຍປີແລ້ວນັ້ນສຳເລັດລົງຢ່າງຂາດຕົວ, ກາຍເປັນແຂວງທີ່ມີຄວາມສະຫງົບກ້າວໆມາ; ອັນພົ້ນເດັ່ນແມ່ນການສ້າງຮາກຖານການເມືອງພັດທະນາຊົນນະບົດ ຮອບດ້ານແກ້ໄຂຄວາມທຸກຍາກຂອງປະຊາຊົນ ຕິດພັນກັບການແກ້ໄຂຄວາມບໍ່ສະຫງົບ, ແກ້ໄຂການດຳລົງຊີວິດເລື່ອນລອຍຂອງປະຊາຊົນ ເຊິ່ງໄດ້ກາຍເປັນປົດຮຽນໃຫ້ແກ່ບ່ອນອື່ນໆ.

ຈາກຜົນສຳເລັດດັ່ງກ່າວໄດ້ມີບຸກຄົນ, ກົມກອງລວມໜູ່ໄດ້ຮັບການຍ້ອງຍໍຈາກສູນກາງຫຼາຍລະດັບ, ແຂວງໄດ້ຮັບຫຼຽນໄຊພິລະອາດຫານຊັ້ນ I ສາມໜ່ວຍ, ຫຼຽນໄຊພິລະອາດຫານຊັ້ນ II ສອງໜ່ວຍ, ຫຼຽນໄຊພິລະອາດຫານຊັ້ນ III ໜຶ່ງໜ່ວຍ ແລະ ຫຼຽນໄຊແຮງງານຊັ້ນ II ສາມໜ່ວຍ ຢ່າງສົມກຽດ.

ໃນພິທີສະເຫຼີມສະຫຼອງວັນສ້າງຕັ້ງແຂວງ ບໍລິຄໍາໄຊ ຄົບຮອບ 35 ປີ ຄັ້ງນີ້, ຍັງໄດ້ມີພິທີມອບຫຼຽນໄຊແຮງງານ ຊັ້ນ I ໃຫ້ແຂວງ ບໍລິຄໍາໄຊ ໂດຍການໃຫ້ກຽດປະດັບຫຼຽນຂອງ ທ່ານ ພັນຄຳ ວິພາວັນຮອງປະທານປະເທດ.

ຂໍ້ມູນ: Lao National Radio