ປະຊາຊົນເມືອງສະໜາມໄຊ ຍົກຍ້າຍເຂົ້າເຮືອນພັກຊົ່ວຄາວແລ້ວ

362

ຍາມໃນການຟື້ນຟູຊີວິດການເປັນຢູ່ຂອງປະຊາຊົນ ເມືອງສະໜາມໄຊ ແຂວງອັດຕະປື ທີ່ຖືກຜົນກະທົບຈາກສັນເຂື່ອນກັນນ້ຳເຊປຽນ – ເຊນ້ຳນ້ອຍແຕກພັງ ຕົກມາຮອດປັດຈຸບັນການບຸກເບີກເນື້ອທີ່ສ້າງເຮືອນພັກຊົ່ວຄາວສຳເລັດສົມບູນແລ້ວ ແລະ ໄດ້ຍົກຍ້າຍປະຊາຊົນເຂົ້າເຮືອນພັກຊົ່ວຄາວສຳເລັດ 100% ສ່ວນການບຸກເບີກເນື້ອທີ່ທໍາການຜະລິດ 2 ພັນກວ່າເຮັກຕາ ຄືບໜ້າກວ່າ 30%.

ວັນທີ 5 ມີນາ 2019 ທີ່ສໍານັກງານນາຍົກລັດຖະມົນຕີ, ຄະນະກຳມະການສະເພາະກິດແກ້ໄຂໄພພິບັດລະດັບຊາດໄດ້ຈັດກອງປະຊຸມຕີລາຄາສະພາບການແກ້ໄຂໄພພິບັດ ແລະ ຟື້ນຟູຊີວິດການເປັນຢູ່ຂອງປະຊາຊົນ ເມືອງສະໜາມໄຊ ແຂວງອັດຕະປື ໂດຍການເປັນປະທານຂອງ ທ່ານ ສອນໄຊ ສີພັນດອນ ຮອງນາຍົກລັດຖະມົນຕີ, ປະທານຄະນະກຳມະການສະເພາະກິດແກ້ໄຂໄພພິບັດລະດັບຊາດ; ມີບັນດາທ່ານໃນຄະນະກຳມະການດັ່ງກ່າວເຂົ້າຮ່ວມ.

ທ່ານ ສົມສະນິດ ສຸວັນນະລາດ ຮອງລັດຖະມົນຕີ, ຮອງຫົວໜ້າຫ້ອງວ່າການສຳນັກງານນາຍົກລັດຖະມົນຕີ, ຫົວໜ້າໜ່ວຍງານປະສານງານ, ຄະນະກຳມະການສະເພາະກິດແກ້ໄຂໄພພິບັດລະດັບຊາດ ກ່າວວ່າ: ມາເຖິງປັດຈຸບັນໄດ້ສຳເລັດການຍົກຍ້າຍປະຊາຊົນອອກຈາກເຕັ້ນໄປຢູ່ເຮືອນພັກຊົ່ວຄາວ ສຳເລັດ 100%; ການບຸກເບີກເນື້ອທີ່ປຸກສ້າງທີ່ພັກຖາວອນ ເກືອບ 300 ເຮັກຕາ ສຳເລັດ 100% ເຊິ່ງກໍາລັງຕັດແຜນຜັງ ແລະ ຕາຜ້າ; ການບຸກເບີກເນື້ອທີ່ທໍາການຜະລິດ ຈຳນວນ 2.140 ເຮັກຕາ ສໍາເລັດແລ້ວ 33%; ການປະເມີນຜົນກະທົບ ແລະ ມູນຄ່າການເສຍຫາຍທາງດ້ານເສດຖະກິດ – ສັງຄົມ ແລະ ສິ່ງແວດລ້ອມ ເຫັນວ່າຜົນເສຍຫາຍດ້ານເສດຖະກິດຄົວເຮືອນ ຈຳນວນ 19 ບ້ານ ທີ່ຖືກຜົນກະທົບແມ່ນສໍາເລັດ 100% ໂດຍມີມູນຄ່າຄວາມເສຍຫາຍ ປະມານ 220 ຕື້ກີບ, ຜົນເສຍຫາຍດ້ານພື້ນຖານໂຄງລ່າງ ປະມານ 130 ຕື້ກີບ, ຜົນເສຍຫາຍຂອງພາກທຸລະກິດ ແລະ ຜູ້ປະກອບການ ປະມານ 124 ຕື້ກີບ, ສ່ວນການວັດແທກຂະໜາດເຮືອນ, ທີ່ດິນປຸກສ້າງ ແລະ ທີ່ດິນກະສິກໍາ ຢູ່ບັນດາບ້ານທີ່ຖືກຜົນກະທົບໜັກແມ່ນສໍາເລັດ 80%.

ຫຼັງຈາກນັ້ນ, ຜູ້ເຂົ້າຮ່ວມກອງປະຊຸມໄດ້ຜັດປ່ຽນກັນປະກອບຄຳຄິດເຫັນຕໍ່ການຈັດຕັ້ງປະຕິບັດວຽກງານທີ່ຕິດພັນກັບຂອບເຂດ ແລະ ຄວາມຮັບຜິດຊອບຂອງຂະແໜງການຕົນ, ພ້ອມທັງສະເໜີບາງທິດທາງແຜນການຈັດຕັ້ງປະຕິບັດວຽກງານໃນຕໍ່ໜ້າ ລວມທັງຄຳສະເໜີປັບປຸງແກ້ໄຂວຽກງານຈຳນວນໜຶ່ງທີ່ຍັງຄົງຄ້າງ, ມີຄວາມຊັກຊ້າ, ບໍ່ເປັນໄປຕາມແຜນ ແລະ ລະບຽບການທີ່ກຳນົດໄວ້.
ທ່ານ ສອນໄຊ ສີພັນດອນ ຮອງນາຍົກລັດຖະມົນຕີ ກໍມີຄຳຖາມເຈາະຈີ້ມຕໍ່ບາງບັນຫາ ເປັນຕົ້ນແບບເຮືອນທີ່ຈະປຸກສ້າງໃຫ້ປະຊາຊົນຢູ່ຖາວອນ, ການຄຸ້ມຄອງ – ນຳໃຊ້ງົບປະມານເຂົ້າໃນໂຄງການຕ່າງໆ, ການບໍລິຫານວຽກງານ ແລະ ອື່ນໆ, ແຜນການພັດທະນາ ແລະ ຟື້ນຟູດ້ານຕ່າງໆ ໂດຍສະເພາະແມ່ນການຈັດສັນອາຊີບໃຫ້ປະຊາຊົນ, ການປະເມີນຜົນເສຍຫາຍ, ການຊົດເຊີຍຜົນເສຍຫາຍ, ການປະສານງານ ແລະ ເຮັດວຽກຮ່ວມກັບພາກສ່ວນຕ່າງໆທັງສູນກາງ, ທ້ອງຖິ່ນ ແລະ ບໍລິສັດທີ່ກ່ຽວຂ້ອງ ພ້ອມທັງໄດ້ເນັ້ນໜັກໃຫ້ພາກສ່ວນ ແລະ ຂະແໜງການທີ່ກ່ຽວຂ້ອງເອົາໃຈໃສ່ຕື່ມຕໍ່ບັນຫາສຳຄັນຈຳນວນໜຶ່ງ ເພື່ອເຮັດໃຫ້ການຈັດຕັ້ງປະຕິບັດວຽກງານໃນຕໍ່ໜ້າມີຜົນສຳເລັດ ແລະ ໄດ້ຮັບປະສິດທິຜົນສູງ ເປັນຕົ້ນຈັດຕັ້ງປະຕິບັດລະບຽບການນຳໃຊ້ເງິນງົບປະມານໃຫ້ຖືກຕ້ອງຕາມເປົ້າໝາຍ ແລະ ລະບຽບການຢ່າງເຂັ້ມງວດບົນພື້ນຖານຂໍ້ມູນລວມສູນ, ປະຢັດມັດທະຍັດ ແລະ ມີປະສິດທິຜົນສູງ.

ສືບຕໍ່ຈັດຕັ້ງປະຕິບັດແຈ້ງການເລກທີ 200/ຫສນຍ ແລະ 290/ຫສນຍ ໃຫ້ມີຜົນສໍາເລັດ; ສືບຕໍ່ສ້າງແຜນການເຄື່ອນໄຫວ ແລະ ແຜນກິດຈະກຳຂອງແຕ່ລະຄະນະໃຫ້ສຳເລັດ ແລະ ສາມາດຈັດຕັ້ງປະຕິບັດໄດ້; ສືບຕໍ່ສ້າງແຜນປະເມີນຜົນ, ຟື້ນຟູ ແລະ ຈັດສັນອາຊີບໃຫ້ເປັນລະບົບ, ຕໍ່ເນື່ອງ ແລະ ສອດຄ່ອງກັບເງື່ອນໄຂທ່າແຮງຕົວຈິງ; ສືບຕໍ່ກະກຽມຈັດຕັ້ງປະຕິບັດບັນດາໂຄງການຮີບດ່ວນ ແລະ ໃຫ້ໄດ້ເລີ່ມຈັດຕັ້ງປະຕິບັດ ໂດຍສັງລວມບັນຊີໂຄງການ, ຫົວໜ່ວຍລາຄາ, ບໍລິມາດວຽກ, ມູນຄ່າໂຄງການ, ເອກະສານລະອຽດ ເພື່ອສະເໜີລັດຖະບານອະນຸມັດ ແລະ ບໍລິສັດ ພິຈາລະນາຮັບຮອງເອົາຫົວໜ່ວຍລາຄາ ແລະ ມູນຄ່າໂຄງການ; ສືບຕໍ່ລົງຊຸກຍູ້ຊ່ວຍເຫຼືອ, ປຸກລະດົມ, ຕິດຕາມ ແລະ ເບິ່ງແຍງຊີວິດການເປັນຢູ່ຂອງປະຊາຊົນທີ່ໄດ້ຮັບຜົນກະທົບຢ່າງເປັນປົກກະຕິ ແລະ ຕໍ່ເນື່ອງ.

ສືບຕໍ່ປະເມີນໂຄງການທີ່ໄດ້ປະຕິບັດມາແລ້ວໃຫ້ສຳເລັດໂດຍໄວ, ເອົາໃຈໃສ່ເຮັດວຽກໂຄສະນາເຜີຍແຜ່ ກ່ຽວກັບການແກ້ໄຂໄພພິບັດ ແລະ ຟື້ນຟູຊີວິດການເປັນຢູ່ຂອງປະຊາຊົນ ເມືອງສະໜາມໄຊ ໃຫ້ສັງຄົມໄດ້ຮັບຮູ້ຢ່າງ ກວ້າງຂວາງ ແລະ ເຂົ້າໃຈຢ່າງຖືກຕ້ອງຕໍ່ກັບສະພາບຄວາມເປັນຈິງ ແລະ ຄວາມພະຍາຍາມຂອງທຸກພາກສ່ວນໃນການແກ້ໄຂບັນຫາດັ່ງກ່າວທັງໄລຍະຜ່ານມາ ແລະ ໃນອະນາຄົດ.

ຮູບພາບຈາກ: Sourioudong Sundara