ພວຕ ຊຽງຂວາງ ກວດກາບໍລິມາດຫົວຈ່າຍນໍ້າມັນເຊື້ອໄຟ ໄດ້ 295 ປໍ້າ

410

ພະແນກວິທະຍາສາດ ແລະ ເຕັກໂນໂລຊີແຂວງຊຽງຂວາງ ( ພວຕ ຊຽງ ຂວາງ ) ເປີດເຜີຍຜົນການກວດສອບຄຸນນະພາບນໍ້າມັນຢູ່ແຕ່ລະປໍ້າຢູ່ທົ່ວແຂວງໃນໄລຍະຜ່ານມາສາມາດກວດກາ – ກວດສອບບໍລິມາດຫົວຈ່າຍນໍ້າມັນເຊື້ອໄຟ ໄດ້ 295 ປໍ້າ ຈຳນວນ 558 ຫົວຈ່າຍ, ກວດຕາມສາງນໍ້າມັນທົ່ວແຂວງ ໄດ້ 3 ສາງ.ຂະນະທີ່ກວດກາຄຸນນະພາບນໍ້າມັນເຊື້ອໄຟຢູ່ດ່ານສາກົນນໍ້າກັ່ນ ( ເລີ່ມກວດແຕ່ກາງເດືອນມິຖຸນາ 2016 ເປັນຕົ້ນມາ ) ສາມາດກວດໄດ້ 1.119 ຄັນ, ບໍລິມາດທັງໝົດ 41.400.865 ລິດ. ໃນນີ້. ນໍ້າມັນກາຊວນ 30.872.915 ລິດ ແລະ ນໍ້າມັນແອັດຊັງ 10.527.950 ລິດ.

ທ່ານ ບຸນມີ ສີລາວົງຫົວໜ້າພະແນກວິທະຍາສາດ ແລະ ເຕັກໂນໂລຊີ ແຂວງຊຽງ ຂວາງ ໄດ້ລາຍງານໃນກອງປະຊຸມໃຫຍ່ ຄັ້ງທີI ຂອງວຽກງານວິທະຍາສາດ ແລະເຕັກໂນໂລຊີທົ່ວແຂວງຊຽງຂວາງ ວ່າ: ສໍາລັບດ້ານວຽກງານວິຊາສະເພາະໃນໄລຍະຜ່ານມາພະແນກສາມາດຈັດຕັ້ງປະຕິບັດ ຄື: 1). ວຽກງານມາດຕະຖານ ແລະ ວັດແທກໄດ້ເອົາໃຈໃສ່ລົງຕິດຕາມ – ກວດກາ. ໃນນັ້ນ, ສາມາດປະຕິບັດໄດ້ດັ່ງນີ້: ກວດກາ – ກວດສອບຄຸນນະພາບນໍ້າມັນເຊື້ອໄຟຢູ່ດ່ານສາກົນນໍ້າກັ່ນ ໄດ້ 1.119 ຄັນ,ບໍລິມາດທັງໝົດ 41.400.865 ລິດ. ໃນນີ້, ນໍ້າມັນກາຊວນ 30.872.915 ລິດ, ນໍ້າມັນແອັດຊັງ 10.527.950 ລິດ ( ເລີ່ມກວດແຕ່ກາງເດືອນມິຖຸນາ 2016ເປັນຕົ້ນມາ ).

ກວດສອບບໍລິມາດຫົວຈ່າຍນໍ້າມັນເຊື້ອໄຟໄດ້ 295 ປໍ້າ ຈຳນວນ 558 ຫົວຈ່າຍ ແລະ ກວດຕາມສາງນໍ້າມັນ ໄດ້ 3 ແຫ່ງ; ກວດສອບກົງເຕີໄຟຟ້າໄດ້ ຈຳນວນ 1.335 ໜ່ວຍ, ບໍ່ຖືກຕ້ອງຕາມມາດຕະຖານ 140 ໜ່ວຍ ( ແຕ່ລະປີໃນການກວດກາແມ່ນກວດ 3%ຂອງກົງເຕີໄຟຟ້າທັງໝົດ ເຊິ່ງທົ່ວແຂວງມີກົງເຕີໄຟຟ້າ 44.488 ໜ່ວຍ; ກວດສອບກົງເຕີນໍ້າປະປາ ໄດ້ 1.138 ໜ່ວຍ ແລະ ຂຶ້ນທະບຽນບໍລິມາດນຕາມໂຮງງານນໍ້າດື່ມທົ່ວແຂວງ ໄດ້ 24 ໂຮງງານ; ກວດກາ ແລະ ຂຶ້ນທະບຽນຊິງຊັ່ງທົ່ວໄປຕາມຫ້າງຮ້ານ, ຕະຫຼາດທົ່ວແຂວງ ໄດ້ 1.294 ໜ່ວຍ ສາມາດເກັບລາຍຮັບວິຊາການ ແລະ ມອບເຂົ້າງົບປະມານຈຳນວນ 198.008.000 ກີບ.

ສໍາລັບວຽກງານຊັບສິນທາງປັນຍາໄດ້ສົມທົບກັບພາກສ່ວນທີ່ກ່ຽວຂ້ອງລົງກວດສິນຄ້າອຸປະໂພກ ແລະ ບໍລິໂພກທີ່ບໍ່ໄດ້ມາດຕະຖານ, ສິນຄ້າໝົດອາຍຸ, ສິນຄ້າລອກຮຽນແບບເຄື່ອງໝາຍການຄ້າຢູ່ບັນດາເມືອງ,ຕາມທ້ອງຕະຫຼາດເທສະບານ ໄດ້ດັ່ງນີ້: ລົງກວດແປ້ງນົວກາຈອງ ( ລາຊາຊູລົດ ) 5 ຄັ້ງ ຢຶດໄດ້ທັງໝົດ 10.139 ຖົງ, ສິນຄ້າບໍລິໂພກອື່ນໆ 75 ລາຍການ; ສ່ວນສິນຄ້າປະເພດອຸປະໂພກ ເຊັ່ນ: ຢາງໃນລົດຈັກໄດ້ 464 ເສັ້ນ, ຢາງນອກ 12 ເສັ້ນ, ຢາສະຜົມຊັນຊິວ 1.525 ຊອງ, ເຄື່ອງສໍາອາງ ຈໍານວນ 13 ລາຍການ ລວມມູນຄ່າສິນຄ້າທີ່ສາມາດຢຶດໄດ້ທັງໝົດ 38.463.000 ກີບ; ກວດສິນຄ້າປອມແປງລອກຮຽນແບບເຄື່ອງໝາຍການຄ້າປະເພດນໍ້າມັນເຄື່ອງລົດຈັກ ( ຍີ່ຫໍ້ສະເຕດ ), ຢູ່ເມືອງແປກ ມີ 3 ຮ້ານ ຢຶດສິນຄ້າໄດ້ທັງໝົດ 329 ແກັດ 3.954 ຕຸກ ລວມມູນຄ່າທັງໝົດ 42.902.000 ກີບ; ຍື່ນຄຳຮ້ອງຂໍຂຶ້ນທະບຽນເຄື່ອງໝາຍການຄ້າໃຫ້ແກ່ບັນດາຫົວໜ່ວຍທຸລະກິດ.

ໃນນັ້ນ, ມີບໍລິສັດກາເຟເມືອງຊຽງ, ຮ້ານອາຫານຕົ້ນແປກ, ບໍລິສັດມາລີນາ ວາງສະແດງສິນຄ້າ ແລະ ຄອນເສີດ, ກອງຄູ່ຊາວພວນບູຮານ, ໂຮງງານນໍ້າດື່ມ ໄດ້ 3 ໂຮງງານ ຄື: ໂຮງງານນໍ້າດື່ມຫົງທອງ, ໂຮງງານນໍ້າດື່ມອິນຊີທອງ ແລະ ໂຮງງານນໍ້າດື່ມມີຣ່າ; ໄດ້ຮັບໃບຢັ້ງຢືນການຈົດທະບຽນຖິ່ນກຳເນີດເຂົ້າໄກ່ນ້ອຍ ແລະ ໄດ້ເປີດກອງປະຊຸມມອບ – ຮັບໃບຢັ້ງຢືນດັ່ງກ່າວໃຫ້ແກ່ສະມາຄົມຄຸ້ມຄອງຖິ່ນກຳເນີດເຂົ້າໄກ່ນ້ອຍແຂວງຊຽງຂວາງ.