ເມືອງຈັນທະບູລີ ເປີດງານວາງສະແດງ ສິນຄ້າຜະລິດຕະພັນ ODOP

678

ເມືອງຈັນທະບູລີ ໄດ້ເປີດງານວາງສະແດງ ຂາຍສິນຄ້າຜະລິດຕະພັນຫນຶ່ງເມືອງໜຶ່ງຜະລິດຕະພັນ ແລະສິນຄ້າຄອບຄົວຕົວແບບ ຂຶ້ນໃນຕອນເຊົ້າ ວັນທີ 27 ມີນາ 2019 ທີ່ເດີ່ນຕະຫຼາດນາຄາຣາດຊິຕີ້ (ແຄມຂອງ) ແລະຈະດຳເນີນໄປຮອດ ວັນທີ 02 ເມສາ 2019.

ທ່ານ ພູວັນ ເພັດຍາລາດ ຫົວໜ້າຫ້ອງການ ອຸດສາຫະກຳ-ການຄ້າ ເມືອງຈັນທະບູລີ ນະຄອນຫຼວງວຽງຈັນ ກ່າວວ່າ: ງານຄັ້ງນີ້ເກີດຂຶ້ນເພື່ອເປັນການຊຸກຍູ້ສົ່ງເສີມ  ວິສາຫະກິດຂະໜາດນ້ອຍ, ຂະໜາດກາງ ແລະ ຈຸວິສະຫະກິດ ໃຫ້ຫົວໜ່ວຍທຸລະກິດໄດ້ມີການແລກປ່ຽນບົດຮຽນເຊິ່ງກັນ ແລະ ກັນ ໃຫ້ມີການພັດທະນາຜະລິດຕະພັນຂອງຕົນເຊັ່ນ: ຮູບແບບການຫຸ້ມຫໍ່, ການນຳສະເໜີຜະລິດຕະພັນ, ການຄຸ້ມຄອງບໍລິຫານຈັດການ, ການນຳສະເໜີສິນຄ້າ ແລະ ບໍລິການຂອງຕົນໃຫ້ສັງຄົມໄດ້ຮັບຮູ້,  ພ້ອມກັນນີ້ກໍ່ເພື່ອເປັນການກະຕຸກຊຸກຍູ້ໃຫ້ປະຊາຊົນໃຫ້ມີການຂະຫຍາຍໂຕຂື້ນເລື້ອຍໆ.

ນອກຈາກນີ້ຍັງເປັນການໂຄສະນາສິນຄ້າ, ສ້າງຕາໜ່າງຮອງຮັບການຜະລິດສິນຄ້າໃຫ້ເປີດກວ້າງ ແລະ ແລກປ່ຽນບົດຮຽນ, ປະສົບການ, ເຕັກນິກ, ການຜະລິດ ສ້າງໃຫ້ສິນຄ້າມີຄຸນນະພາບ ແລະ ສ້າງຄວາມສົນໃຈ ໃຫ້ນັກລົງທຶນເຂົ້າມາພັດທະນາເມືອງຈັນທະບູລີໃຫ້ຫຼາຍຂື້ນ, ຕິດພັນກັບການດຶງດູດທ່ອງທ່ຽວທັງພາຍໃນ ແລະ ຕ່າງປະເທດ ທີ່ເຂົ້າມາທ່ຽວຊົມນະຄອນຫຼວງວຽງຈັນ ແລະ ມີການຈັບຈ່າຍຊື້ສິນຄ້າພາຍໃນໃຫ້ຫຼາຍຂື້ນ.

ໂດຍມີຜູ້ເຂົ້າຮ່ວມຈາກເມືອງຈັນທະບູລີ, ຈາກບັນດາແຂວງ ແລະ ເມືອງອື່ນໆ ໃນນະຄອນຫຼວງວຽງຈັນ 70 ຫົວໜ່ວຍມີມູນຄ່າສິນຄ້າ 560ລ້ານ. ສິນຄ້າທີ່ເຂົ້າມາຮ່ວມວາງສະແດງປະກອບມີ ສິນຄ້າຫັດຖະກຳ, ໄມ້ແກະສະລັກແປຮູບ, ຜ້າໄໝ, ເສຶ້ອຜ້າ, ອາຫານ ແລະ ເຄື່ອງດື່ມຕ່າງໆ.

ໃນງານຍັງມີການສະແດງສິລະປະໃນຕອນແລງ ຂອງນ້ອງນັກຮຽນ ຈາກມໍຕົ້ນ-ມໍປາຍ ໃນຂອບເຂດເມືອງຈັນທະບູລີ ແລະ ຈະມີການໂຄສະນາ ຜະລິດຕະພັນຂອງສະຖາບັນການເງິນ, ທະນາຄານ,  ບໍລິສັດທ່ອງທ່ຽວ, ເຄື່ອຂ່າຍໂທລະສືບມືຖື ແລະ ອື່ນໆ.

ເຂົ້າຮ່ວມເປີດງານມີທ່ານ ນາງ ບົວລອນ ວົງດາລາແສນ ເຈົ້າເມືອງ ຈັນທະບູລີ,ທ່ານ ເບີຣິນ ເພັດຈັນທະລາດ ຫົວຫນ້າພະແນກອຸດສະຫະກຳການຄ້າ ນະຄອນຫຼວງວຽງຈັນ.