ໂຮມເຂດເສດຖະກິດພິເສດໃນນະຄອນຫຼວງເຂົ້າເປັນອັນດຽວ

475

ນະຄອນຫຼວງວຽງຈັນ ໄດ້ສຳເລັດການເຕົ້າໂຮມເອົາບັນດາເຂດເສດຖະກິດພິເສດ ( ຂພສ ) ທີ່ມີຢູ່ປະມານ 4 – 5 ເຂດ ເຂົ້າຢູ່ໃນຄະນະບໍລິຫານ ແລະ ການຄຸ້ມຄອງເປັນອັນດຽວ. ທັງນີ້, ກໍເພື່ອອໍານວຍຄວາມສະດວກໃນການບໍລິຫານ ແລະ ການພັດທະນາເປັນໄປຕາມທິດຄຸ້ມຄອງຂອງລັດຖະບານ.

ພິທີມອບ – ຮັບການບໍລິຫານ ແລະ ການຄຸ້ມຄອງ ລະຫວ່າງ ຄະນະສະພາບໍລິຫານ ຂພສ ໃນນະຄອນຫຼວງວຽງຈັນ ແລະ ຄະນະຄຸ້ມຄອງ ຂພສ ນະຄອນຫຼວງວຽງຈັນ ໄດ້ຈັດຂຶ້ນໃນວັນທີ 25 ມີນາຜ່ານມາ ທີ່ເຂດເສດຖະກິດພິເສດ ບຶງທາດຫຼວງ ໂດຍແມ່ນ ທ່ານ ສຸບັນ ຈຸນລະຊາ ເປັນຫົວໜ້າຄະນະຄຸ້ມຄອງເຂດເສດຖະກິດພິເສດ ນະຄອນຫຼວງວຽງຈັນ ເປັນຜູ້ຮັບໜ້າທີ່ ເຊິ່ງມອບໂດຍບັນດາຜູ້ຕາງໜ້າເຂດຕ່າງໆ ເປັນກຽດເຂົ້າຮ່ວມໃນງານຄັ້ງນີ້ຂອງ ທ່ານ ນາງ ຄຳຈັນ ວົງແສນບູນ ຮອງລັດຖະມົນຕີ ກະຊວງແຜນການ ແລະ ການລົງທຶນ, ທ່ານ ສີຫຸນ ສິດທິລືໄຊ ຮອງເຈົ້າຄອງນະຄອນຫຼວງວຽງຈັນ ພ້ອມດ້ວຍພາກສ່ວນທີ່ກ່ຽວຂ້ອງເຂົ້າຮ່ວມ.

ທ່ານ ສົມກຽດ ສີຫາລາດ ຮອງຄະນະຄຸ້ມຄອງ ຂພສ ນະຄອນຫຼວງວຽງຈັນ ກ່າວວ່າ: ໂດຍປະຕິບັດຕາມກົດໝາຍ ວ່າດ້ວຍສົ່ງເສີມການລົງທຶນ ສະບັບເລກທີ 02/ສພຊ, 14/ສພຊ, ດຳລັດ 443/ນຍ ໃນທີ່ຜ່ານມາ ແລະ ດຳລັດ 188/ລບ, ຂໍ້ຕົກລົງ 1971/ກຜທ ໃນປັດຈຸບັນການພັດທະນາເຂດເສດຖະກິດພິເສດໃນນະຄອນຫຼວງ ມີທ່າຂະຫຍາຍຕົວຢ່າງຕໍ່ເນື່ອງ ແລະ ໄດ້ປັບປຸງເຂົ້າສູ່ລະບົບໃຫ້ນັບມື້ດີຂຶ້ນ ນັບແຕ່ໄດ້ມີການພັດທະນາຈົນເຖິງປັດຈຸບັນ ເຂດເສດຖະກິດພິເສດໃນນະຄອນຫຼວງທີ່ກວມເອົາ 5 ເຂດ ປະກອບມີ: ເຂດພັດທະນາກວມລວມໄຊເສດຖາ, ບຶງທາດຫຼວງ, ລອງແທ່ງ – ວຽງຈັນ, ດົງໂພສີ ແລະ ເຂດອຸດສາຫະກຳ ວຽງຈັນ – ໂນນທອງ ມີນັກລົງທຶນທັງພາຍໃນ ແລະ ຕ່າງປະເທດເຂົ້າມາລົງທຶນແລ້ວ 132 ບໍລິສັດ, ມີທຶນຈົດທະບຽນທັງໝົດ 666 ລ້ານກວ່າໂດລາສະຫະລັດ ມີແຜນການຈະລົງທຶນເຖິງ 4.516 ລ້ານກວ່າໂດລາສະຫະລັດ ມອບພັນທະໃຫ້ລັດຖະບານ 3,4 ລ້ານໂດລາສະຫະລັດ, ສ້າງວຽກເຮັດງານທຳເກືອບ 4 ພັນຄົນ ຕ່າງປະເທດ 363 ຄົນ ກວມເອົາອັດຕາຄ່າຈ້າງງານພາຍໃນສູງເຖິິງ 90,8% ໃນນະຄອນຫຼວງ.

ໄລຍະຜ່ານມາເຂດເສດຖະກິດພິເສດໃນນະຄອນຫຼວງ ແມ່ນຂຶ້ນກັບກະຊວງແຜນການ ແລະ ການລົງທຶນ ເຊິ່ງແຕ່ລະເຂດມີການບໍລິຫານກັນເອງ ການໂຮມເຂົ້າເປັນຄະນະບໍລິຫານດຽວຈະຊ່ວຍອຳນວຍຄວາມສະດວກຕ່າງໆໃນການຕັດສິນໃຈ ໂດຍເບື້ອງຕົ້ນໃນຈຳນວນ 5 ເຂດເສດຖະກິດພິເສດທີ່ຢູ່ໃນນະຄອນຫຼວງແມ່ນເຂົ້າມາມອບ – ຮັບໜ້າທີ່ຢ່າງເປັນທາງການແລ້ວ 4 ເຂດ, ຍັງເຫຼືອພຽງແຕ່ເຂດນິຄົມອຸດສາຫະກຳ ວຽງຈັນ – ໂນນທອງ ທີ່ຍັງຢູ່ໃນຂັ້ນຕອນຂອງການດຳເນີນເອກະສານໃຫ້ຖືກຕ້ອງຕາມລະບຽບການຂອງກົດໝາຍ.