ການຄ້າເມືອງບົວລະພາ ທຳລາຍສິນຄ້າໝົດອາຍຸ ລວມຄ່າເສຍຫາຍ 10 ລ້ານກວ່າກີບ

321

ຫ້ອງການອຸດສາຫະກຳ ແລະ ການຄ້າເມືອງບົວລະພາໄດ້ສົມທົບກັບພາກສ່ວນທີ່ກ່ຽວຂ້ອງລົງກວດສິນຄ້າ ຢູ່ຕາມສະຖານທີ່ຕ່າງໆພາຍໃນເມືອງພົບເຫັນສິນຄ້າລອກຮຽນແບບ, ສິນຄ້າໝົດອາຍຸ ແລະ ສິນຄ້ານຳເຂົ້າບໍ່ຖືກຕ້ອງຢູ່ 5 ກຸ່ມບ້ານ ແລະ 3 ບ້ານໃນເທດສະບານ ຈຳນວນຫຼາຍລາຍການ ຄິດເປັນມູນຄ່າເສຍຫາຍ 10 ລ້ານກວ່າກີບ.

ໃນວັນທີ 26 ມີນາ 2019 ນີ້ຢູ່ຫ້ອງການ ອຸດສາຫະກໍາ ແລະ ການຄ້າ ເມືອງບົວລະພາ, ແຂວງຄຳມ່ວນ ໄດ້ນໍາເອົາສິນຄ້າທີ່ນຳເຂົ້າແບບຜິດກົດໝາຍ, ສິນຄ້າລອກລຽນແບບ ແລະ ໝົດອາຍຸ ທີ່ຢືດໄດ້ຈາກ 5 ກຸ່ມບ້ານຄື: ກຸ່ມບ້ານຕາຫຼອງ, ກຸ່ມບ້ານຂະຍູ້, ກຸ່ມນ້ຳຈະຫຼາ, ກຸ່ມບ້ານຈະແລດ ແລະ ເຂດເທດສະບານເມືອງຄື: ບ້ານທ່າແຮ່, ບ້ານນາສົມບູນ ແລະ ບ້ານປ່າກ້ວຍໃຕ້ ມາທຳລາຍ ເປັນຕົ້ນແມ່ນອາຫານສຳເລັດຮູບ, ໝີ່ໄວໆ, ປາກະປ໋ອງ, ເຂົ້າໝົມ, ຢາປົວພະຍາດ ແລະ ເຄື່ອງດື່ມປະເພດຕ່າງໆ ນ້ຳອັດລົມ, ນົມສຳເລັດຮູບ ແລະ ອື່ນໆ ລວມທັງໝົດ 32 ລາຍການ ລວມມູນຄ່າທັງໝົດ 10.379.000 ກີບ (ສິບລ້ານ ສາມແສນ ເຈັດສິບເກົ້າພັນກີບ).

ຈຸດປະສົງຂອງການທຳລາຍໃນຄັ້ງນີ້ກໍ່ເພື່ອ ເປັນການສະກັດກັ້ນການລັກລອບການນຳເຂົ້າສິນຄ້າປະເພດຕ່າງໆແບບຜິດກົດໝາຍ ແລະ ສິນຄ້າທີ່ໝົດອາຍຸ ໃຫ້ໝົດໄປຈາກເມືອງບົວລະພາ, ເຊິ່ງສິນຄ້າດັ່ງກ່າວແມ່ນໄດ້ນໍາໄປຈູດທຳລາຍທີ່ສຸສານ ບ້ານນາພະນັງ ເມືອງບົວລະພາ ແຂວງ ຄຳມ່ວນ. ການທຳລາຍສິນຄ້າທີ່ຜິດກົດໝາຍ ແລະ ໝົດອາຍຸໃນຄັ້ງນີ້ນຳພາໂດຍ ທ່ານ ບຸນໝອມ ນໍລະມຸນ ຫົວໜ້າຫ້ອງການ ອຸດສາຫະກຳ ແລະ ການຄ້າເມືອງ ໃຫ້ກຽດເຂົ້າຮ່ວມໂດຍ ທ່ານ ຄັນທະລັງສີ ໄຊຍະລາດ, ຮອງເຈົ້າເມືອງເມືອງບົວລະພາ ພ້ອມດ້ວຍບັນດາຫົວໜ້າ, ຮອງຫົວໜ້າຫ້ອງການ ພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມ.