ມີເກືອບ 80 ໂຮງງານ ນຳສິນຄ້າຮ່ວມງານວາງສະແດງສິນຄ້າເຟີນີເຈີວຽງຈັນ ຄັ້ງທີ 4

310

ງານວາງສະແດງຜະລິດຕະພັນສິນຄ້າເຟີນີເຈີວຽງຈັນ ຄັ້ງທີ 4 ປະຈໍາປີ 2019 ເປີດເປັນທາງການວານນີ້ ເຊິ່ງຜູ້ປະກອບການຕ່າງກໍນໍາສິນຄ້າຂອງຕົນເຂົ້າຮ່ວມງານ ເກືອບ 80 ໂຮງງານ ໂດຍງັດສິນຄ້າຂະໜາດນ້ອຍເຂົ້າຮ່ວມລວມມູນຄ່າ 20 ຕື້ກວ່າກີບ.

ທ່ານ ກອງມາລາ ພົມມາໄລ ຮອງປະທານສະມາຄົມເຟີນີເຈີລາວ ( ສຟລ ) ຜູ້ຊີ້ນໍາການຈັດງານວາງສະແດງ ໄດ້ກ່າວວ່າ: ງານຄັ້ງນີ້ມີຄວາມໝາຍສໍາຄັນຢ່າງຍິ່ງຕໍ່ການຈະເລີນເຕີບໂຕຂອງຂະແໜງທຸລະກິດເຟີນີເຈີ ເພື່ອໂຄສະນາຜະລິດຕະພັນໃຫ້ສັງຄົມຮັບຮູ້ທັງເປັນການຮອງຮັບການແຂ່ງຂັນກັບພາກພື້ນ ແລະ ສາກົນ ສົ່ງເສີມໃຫ້ຜູ້ປະກອບການໄດ້ມີການແລກປ່ຽນບົດຮຽນ ແລະ ປະສົບການດ້ວຍກັນ.

ການວາງສະແດງຖືວ່າເປັນວຽກງານໜຶ່ງທີ່ ສຟລ ກໍານົດເປັນແຮງຊຸກຍູ້ທີ່ເຮັດໃຫ້ຜູ້ປະກອບການມີຄວາມຫ້າວຫັນ, ຄວາມສາມັກຄີພາຍໃນ ເພື່ອຜັນຂະຫຍາຍຄໍາສັ່ງ 15/ນຍ ໃຫ້ເປັນຈິງ, ຜະລິດສິນຄ້າເຟີນີເຈີຕອບສະໜອງຕະຫຼາດ ເພື່ອນໍາເອົາທ່າແຮງບົ່ມຊ້ອນໃຫ້ເກີດດອກອອກຜົນຫຼາຍກວ່າເກົ່າ ເພື່ອເຮັດໃຫ້ການຈໍລະຈອນສິນຄ້າເຟີນີເຈີໃນຕະຫຼາດລາວມີການເຄື່ອນໄຫວຢ່າງຕໍ່ເນື່ອງ ແລະ ລຽນຕິດ ເຮັດໃຫ້ຕະຫຼາດເຟີນີເຈີເຂົ້າເຖິງຊຸມຊົນ, ກຸ່ມລູກຄ້າ, ຜູ້ຢາກໄດ້ສິນຄ້າຄຸນນະພາບກໍເຂົ້າມາໃນງານແຫ່ງດຽວ ເຖິງວ່າລູກຄ້າເຂົ້າມາບໍ່ໄດ້ສິນຄ້າທີ່ຕ້ອງການກໍສາມາດສັ່ງຜະລິດພິເສດໄດ້.

ທ່ານກ່າວວ່າ: ປີ 2019 ສັງເກດເຫັນວ່າກົນໄກການຕະຫຼາດເຟີນີເຈີລາວ ແມ່ນໝູນໄປໃນທິດທາງທີ່ດີ ປັດໄຈຫຼັກພວກເຮົາມີການເຊື່ອມຊຶມນະໂຍບາຍຂອງລັດ ເປັນຕົ້ນແມ່ນມາດຕະຖານສິນຄ້າ, ມາດຕະຖານການສົ່ງອອກ ໂດຍຖືສໍາຄັນວ່າຖ້າຜະລິດໄດ້ແຕ່ສົ່ງອອກບໍ່ໄດ້ກໍຖືວ່າທຸລະກິດຫຼົ້ມເຫຼວ, ຜະລິດໄດ້ຖ້າຂາຍບໍ່ໄດ້ແມ່ນສິ່ງທ້າທາຍຕໍ່ຜູ້ປະກອບການລາວ ຮຽກຮ້ອງໃຫ້ທຸກພາກສ່ວນໃນສັງຄົມຫັນມາຊົມໃຊ້ສິນຄ້າລາວຮ່ວມກັນ ພວກເຮົາໃນນາມຜູ້ປະກອບການກໍຈະນໍາເອົາບັນດາບົດຮຽນ, ຄໍາຄິດເຫັນຈາກລູກຄ້າມາປັບປຸງດ້ານການຜະລິດ, ການບໍລິການໃຫ້ດີຂຶ້ນເລື້ອຍໆ ແລະ ຫວັງຢ່າງຍິ່ງວ່າຈະໄດ້ຮັບການຊຸກຍູ້ຕື່ມຈາກພາກລັດ ເຮັດໃຫ້ສິິນຄ້າສາມາດສົ່ງອອກໄດ້ຕາມກົດໝາຍກໍານົດອອກ.

ສິ່ງໜຶ່ງທີ່ສໍາຄັນການຜະລິດເຟີນີເຈີປີ 2019 ແມ່ນເຕັມໄປດ້ວຍການແຂ່ງຂັນ, ແຮງຜະລິດຈາກປະສົບການຈິງຂອງພາກທຸລະກິດ, ສິ່ງແວດລ້ອມທຸລະກິດ, ຜະລິດຕາມຄວາມຕ້ອງການຂອງລູກຄ້າ, ການນໍາໃຊ້ເຕັກໂນໂລຊີເຂົ້າຊ່ວຍໃນການຜະລິດ, ການອອກແບບໃຫ້ທັນສະໄໝ ແລະ ປະສົມປະສານສິລະປະລາວເຂົ້າໄປ, ການເຊື່ອມໂຍງກັບຕ່າງປະເທດ, ນໍາໃຊ້ໄມ້ໃຫ້ໜ້ອຍລົງ ສ້າງຄຸນຄ່າໃຫ້ຜະລິດຕະພັນ ປີນີ້ໄດ້ລະດົມການສາທິດ, ຜະລິດສິ່ງເສດເຫຼືອຈາກໄມ້, ສົ່ງເສີມການນໍາໃຊ້ໄມ້ປູກໃຫ້ເພີ່ມຂຶ້ນເພື່ອຕັດຂໍ້ທ້າທາຍດ້ານວັດຖຸດິບຈາກທໍາມະຊາດລົງ.

ທ່ານ ຄໍາປຸ່ນ ເຈົ້າພຣະສີຮົ່ມຂາວ ຮອງປະທານ ສຟລ ໄດ້ກ່າວວ່າ: ງານວາງສະແດງຈະຈັດໄປຈົນຮອດວັນທີ 31 ມີນາ 2019 ທີ່ສູນການຄ້າ ລາວ – ໄອເຕັກ ເຊິ່ງມີຫ້ອງວາງສະແດງ 180 ຫ້ອງ. ໃນນັ້ນ, ມີຫົວໜ່ວຍທຸລະກິດ ແລະ ໂຮງງານທີ່ເຂົ້າຮ່ວມ 75 ຫົວໜ່ວຍ, ມາຈາກຕ່າງແຂວງ 17 ຫົວໜ່ວຍ, ທຸລະກິດໂອດ໊ອບ 20 ຫົວໜ່ວຍ ລວມມູນຄ່າສິນຄ້າໃນງານທັງໝົດ 20 ຕື້ກີບ ຄາດຄະເນຈະມີມູນຄ່າຊື້ – ຂາຍໃນງານ 80% ເປັນເງິນ ປະມານ 16 ຕື້ກີບ ຜູ້ເຂົ້າຊົມງານ 2,5 ແສນຄົນ.

ສໍາລັບກິດຈະກໍາພາຍໃນງານແມ່ນຈະມີການສະແດງຄອນເສີດຈາກສິລະປິນລາວ ແລະ ໄທ, ມີການເປີດໂຕປຶ້ມອາຊີບຂອງຂ້ອຍ, ການສະແດງຈາກນ້ອງນັກຮຽນໂຮງຮຽນສອນເຕັ້ນ, ປະກວດຄວາມສາມາດຂອງເດັກນ້ອຍ, ມີການຝຶກອົບຮົມການເຂົ້າເຖິງແຫຼ່ງທຶນ, ມີການສາທິດການແກະສະຫຼັກຈາກສະຖາບັນວິຈິດສິນແຫ່ງຊາດ ແລະ ອື່ນໆ.

ພິທີເປີດງານມີຂຶ້ນໃນວັນທີ 25 ມີນາ 2019 ທີ່ສູນການຄ້າ ລາວ – ໄອເຕັກ ໂດຍການເຂົ້າຮ່ວມຂອງ ທ່ານ ພັນທອງ ພິດທຸມມາ ຮອງລັດຖະມົນຕີກະຊວງອຸດສາຫະກຳ ແລະ ການຄ້າ, ມີຮອງປະທານ ສຟລ, ຜູ້ປະກອບການພາກທຸລະກິດເຂົ້າຮ່ວມ.