ປະທານປະເທດໂອ້ລົມພິທີໂຮມຊຸມນຸມ ສະຫຼອງວັນສ້າງຕັ້ງພັກ

465

ໃນວັນທີ 25 ມີນາ 2019 ກົມໂຄສະນາອົບຮົມກົມໃຫຍ່ການເມືອງກອງທັບ ໄດ້ຈັດພິທີໂຮມຊຸມນຸມສະເຫຼີມສະຫຼອງວັນສ້າງຕັ້ງພັກປະຊາຊົນປະຕິວັດລາວ ຄົບຮອບ 64 ປີ ຂຶ້ນທີ່ຫ້ອງປະຊຸມໃຫຍ່ການເມືອງກອງທັບ ກະຊວງປ້ອງກັນປະເທດໂດຍການໃຫ້ກຽດເຂົ້າຮ່ວມຂອງ ສະຫາຍ ບຸນຍັງ ວໍລະຈິດເລຂາທິການໃຫຍ່ຄະນະບໍລິຫານງານສູນກາງພັກ, ປະທານປະເທດ ແຫ່ງ
ສປປ ລາວ, ສະຫາຍ ພົນເອກ ຈັນສະໝອນ ຈັນຍາລາດກຳມະການກົມການເມືອງສູນກາງພັກ, ລັດຖະມົນຕີກະຊວງປ້ອງກັນປະເທດ, ມີຕາງໜ້າກະຊວງປ້ອງກັນຄວາມສະຫງົບພ້ອມດ້ວຍພະນັກງານຫຼັກແຫຼ່ງຂອງສອງກຳລັງປ້ອງກັນຊາດ ແລະ ປ້ອງກັນຄວາມສະຫງົບ ເຂົ້າຮ່ວມ.

ໃນພິທີ ສະຫາຍ ພົນຕີ ທອງລອຍ  ສີລິວົງ ກຳມະການສູນກາງພັກ, ຮອງລັດຖະມົນຕີກະຊວງປ້ອງກັນປະເທດ ໄດ້ຍົກໃຫ້ເຫັນເຖິງມູນເຊື້ອການກຳເນີດ ແລະ ການເຕີບໃຫຍ່ຂະຫຍາຍຕົວຂອງພັກປະຊາຊົນ ປະຕິວັດລາວ ຕະຫຼອດໄລຍະເວລາ 64 ປີຜ່ານມາ  ໂດຍສະເພາະມູນເຊື້ອອັນປີຊາສາມາດສະຫຼາດສ່ອງໃສຂອງພັກ ທີ່ໄດ້ນຳພາກອງທັບ ແລະ ປະຊາຊົນລາວບັນດາເຜົ່າລຸກຂຶ້ນຕໍ່ສູ້ ແລະ ຍາດເອົາເອກະລາດ, ອຳນາດອະທິປະໄຕ ແລະ ຄວາມມີອິດສະຫຼະພາບມາສູ່ປະຊາຊົນລາວບັນດາເຜົ່າ, ຫຼັງຈາກທີ່ປະເທດຊາດໄດ້ຮັບການປົດປ່ອຍຢ່າງສົມບູນແລ້ວ, ພັກໄດ້ນຳພາປວງຊົນລາວທັງຊາດປົກປັກຮັກສາ ແລະ ສ້າງສາພັດທະນາປະເທດຊາດ ເຮັດໃຫ້ຊີວິດການເປັນຢູ່ຂອງປະຊາຊົນນັບມື້ດີຂຶ້ນເປັນກ້າວໆມາ.

ໃນໂອກາດນີ້ ສະຫາຍ ບຸນຍັງ ວໍລະຈິດ ໄດ້ໂອ້ລົມຕໍ່ພິທີໂຮມຊຸມນຸມ ບາງຕອນກ່າວວ່າ: ສຳລັບຢູ່ພາຍໃນປະເທດເຮົາກໍຍັງປະສົບກັບສິ່ງທ້າທາຍຫຼາຍປະການເປັນຕົ້ນເກີດມີໄພພິບັດຕໍ່ເນື່ອງຫຼາຍຄັ້ງ, ຄວາມຫຍຸ້ງຍາກທາງດ້ານເສດຖະກິດມະຫາພາກ, ອິດທິກຳລັງປໍລະປັກ ແລະ ພວກກຸ່ມຄົນບໍ່ດີຍັງສືບຕໍ່ຍູ້ແຮງການເຄື່ອນໄຫວທຳລາຍມ້າງເພພວກເຮົາຢ່າງຮອບດ້ານ, ດ້ວຍຫຼາຍຮູບຫຼາຍສີ ແລະ ເລິກແລບກວ່າເກົ່າເຊິ່ງຍັງສຸມໃສ່ຍຸດທະສາດການຫັນປ່ຽນໂດຍສັນຕິ, ສວຍໃຊ້ບັນຫາສິດທິມະນຸດ, ປະຊາທິປະໄຕ, ຊົນເຜົ່າ, ສາສະໜາ, ໂຄສະນາທັບຖົມໂຈມຕີແນວທາງຂອງພັກ – ລັດ ໂດຍສະເພາະແມ່ນຜ່ານສື່ສັງຄົມອອນລາຍ ເພື່ອແບ່ງແຍກຄວາມສາມັກຄີພາຍໃນ ແລະ ອື່ນໆ.

ຕໍ່ສະພາບການດັ່ງກ່າວ ພັກ – ລັດຖະບານ ຈຶ່ງສືບຕໍ່ຢຶດໝັ້ນໃນແນວທາງການຕ່າງປະເທດສັນຕິພາບ, ເອກະລາດ, ມິດຕະພາບ ແລະ ການຮ່ວມມື, ຢຶດໝັ້ນໃນຫຼັກການເຄົາລົບເອກະລາດ, ອະທິປະໄຕ ແລະ ຜືນແຜ່ນດິນອັນຄົບຖ້ວນຂອງກັນ ແລະ ກັນ, ບໍ່ແຊກແຊງເຂົ້າວຽກງານພາຍໃນຂອງກັນ, ສະເໝີພາບ, ຕ່າງຝ່າຍຕ່າງມີຜົນປະໂຫຍດ ແລະ ຢູ່ຮ່ວມກັນໂດຍສັນຕິ. ພ້ອມທັງສຸມໃສ່ຕັ້ງໜ້າຂຸດຄົ້ນເສີມຂະຫຍາຍກຳລັງແຮງພາຍໃນຊາດຢ່າງສຸດຂີດ ສົມທົບກັບການຍາດແຍ່ງເອົາການຮ່ວມມື, ຊ່ວຍເຫຼືອຈາກພາຍນອກຢ່າງຕັ້ງໜ້າ, ບຸກບືນຜ່ານຜ່າການທົດສອບທ້າທາຍ ແລະ ເປັນເຈົ້າການໃນການຖືເອົາກາລະໂອກາດເງື່ອນໄຂອຳນວຍຕ່າງໆ ເພື່ອສ້າງສາພັດທະນາປະເທດຊາດຕາມແນວທາງການປ່ຽນແປງໃໝ່, ຮັບປະກັນໃຫ້ປະເທດຊາດມີສະຖຽນລະພາບທາງດ້ານການເມືອງ, ມີຄວາມສະຫງົບຮຽບຮ້ອຍທາງດ້ານສັງຄົມ ເພື່ອສ້າງເງື່ອນໄຂໃຫ້ການພັດທະນາເສດຖະກິດໃຫ້ມີການຂະຫຍາຍຕົວຢ່າງຕໍ່ເນື່ອງ ແລະ ເຮັດໃຫ້ຊີວິດການເປັນຢູ່ຂອງປະຊາຊົນບັນດາເຜົ່າໄດ້ຮັບການປັບປຸງດີຂຶ້ນເປັນກ້າວໆ.

ເພື່ອບັນລຸຄືແນວນັ້ນພວກເຮົາຕ້ອງໄດ້ອອກແຮງ ແລະ ສຸມທຸກຄວາມສາມາດເຂົ້າໃນການຈັດຕັ້ງປະຕິບັດ 2 ໜ້າທີ່ຍຸດທະສາດໃນເງື່ອນໄຂໃໝ່ ຄື: ຕ້ອງເຊີດຊູສະຕິລະວັງຕົວ, ມີສະຕິໃນການປົກປັກຮັກສາແນວທາງນະໂຍບາຍຂອງພັກ – ລັດ, ປົກປັກຮັກສາໝາກຜົນຂອງການປະຕິວັດ, ປົກປັກຮັກສາລະບອບໃໝ່ປະຊາທິປະໄຕ ປະຊາຊົນ ໄວ້ໃຫ້ໝັ້ນຄົງ, ສົມທົບແໜ້ນວຽກງານການປ້ອງກັນຊາດ – ປ້ອງກັນຄວາມສະຫງົບ, ກັບການສ້າງສາພັດທະນາເສດຖະກິດ – ສັງຄົມ, ກຳລັງປະກອບອາວຸດຕ້ອງເປັນຫຼັກແຫຼ່ງ, ເປັນພາຫະນະອັນແຫຼມຄົມຂອງພັກໃນການນຳພາທົ່ວປວງຊົນ ເຮັດວຽກງານປ້ອງກັນຊາດ – ປ້ອງກັນຄວາມສະຫງົບ. ໃນນີ້, ວຽກງານຮາກຖານ ເພື່ອສືບຕໍ່ກໍ່ສ້າງ ແລະ ປັບປຸງຕາໜ່າງປ້ອງກັນຊາດ – ປ້ອງກັນຄວາມສະຫງົບທົ່ວປວງຊົນຮອບດ້ານຢູ່ຮາກຖານໃຫ້ທົ່ວເຖິງ, ຍົກສູງສະຕິເປັນເຈົ້າໃນການປົກປັກຮັກສາທ້ອງຖິ່ນ, ຕ້ານທຸກການເຄື່ອນໄຫວມ້າງເພທຳລາຍໃນຫຼາຍດ້ານຂອງບັນດາອິດທິກຳລັງປໍລະປັກ ແລະ ກຸ່ມຄົນບໍ່ດີຢ່າງທັນການ ໄປພ້ອມກັບການເພີ່ມທະວີການເຮັດວຽກງານກໍ່ສ້າງຮາກຖານການເມືອງຕິດພັນກັບການພັດທະນາຊົນນະບົດຮອບດ້ານຕາມທິດ 3 ສ້າງ, ກົມກອງຢູ່ບ່ອນໃດຕ້ອງເຮັດວຽກງານກໍ່ສ້າງຮາກຖານຢູ່ບ່ອນນັ້ນໃຫ້ດີ.

ສະຫາຍໄດ້ກ່າວຕື່ມວ່າ: ພວກເຮົາຕ້ອງເຂົ້າໃຈວ່າ ຈຸດອ່ອນ, ຂໍ້ຄົງຄ້າງທີ່ກຳລັງເປັນສິ່ງທ້າທາຍຕໍ່ພັກເຮົາໃນຊຸມປີຕໍ່ໜ້າແມ່ນຄວາມທຸກຍາກຂອງປະຊາຊົນ ແລະ ຄວາມແຕກໂຕນໃນສັງຄົມ, ການເສື່ອມຖອຍດ້ານຄຸນທາດການເມືອງຂອງພະນັກງານ – ສະມາຊິກພັກຈຳນວນໜຶ່ງ, ບັນຫາໜີ້ສິນສາທາລະນະ, ບັນຫາປາກົດການຫຍໍ້ທໍ້ໃນສັງຄົມ ແລະ ບັນຫາການສໍ້ລາດບັງຫຼວງ ເຊິ່ງບັນຫາຄົງຄ້າງເຫຼົ່ານັ້ນກຳລັງເປັນຊ່ອງວ່າງໃຫຍ່ໃຫ້ອິດທິກຳລັງປໍລະປັກສວຍໃຊ້ ເພື່ອໂຄສະນາທັບຖົມໂຈມຕີພັກ – ລັດ ແລະ ລະບອບໃໝ່, ປຸກປັ່ນກະແສ ຄວາມບໍ່ພໍໃຈຂອງປະຊາຊົນ, ສ້າງຄວາມສັບສົນໃນສັງຄົມ ແລະ ຈະເປັນຜົນຮ້າຍຕໍ່ພາລະກິດປ່ຽນແປງຂອງພັກເຮົາ.

ດັ່ງນັ້ນ, ຕ້ອງສືບຕໍ່ປົກປັກຮັກສາ ແລະ ເສີມຂະຫຍາຍມູນເຊື້ອອັນດີງາມຂອງຕົນ, ຕ້ອງຕັ້ງໜ້າປັບປຸງກຳລັງໃນທຸກດ້ານໃຫ້ໜັກແໜ້ນເຂັ້ມແຂງ, ເອົາໃຈໃສ່ຕໍ່ການປັບປຸງລະບອບຄຸ້ມຄອງ – ບັນຊາ, ປັບປຸງກໍາລັງປະເພດຕ່າງໆ ໂດຍຖືເອົາຄຸນນະພາບເປັນຕົ້ນຕໍ. ໃນນັ້ນ, ຖືເອົາຄຸນນະພາບດ້ານການເມືອງ – ແນວຄິດເປັນກົກ, ເອົາຄວາມສາມາດດ້ານວິຊາສະເພາະ, ຫົວຄິດປະດິດສ້າງ ແລະ ການຈັດຕັ້ງບັນຊາເປັນສິ່ງສໍາຄັນ, ຕ້ອງມີແຜນການ, ປະຕິບັດລະບອບຫັດແອບ, ປັບປຸງລະບົບອົບຮົມສິດສອນ, ຄົ້ນຄວ້າຫຼັກສູດບໍາລຸງ – ກໍ່ສ້າງໃນເງື່ອນໄຂໃໝ່  ເພື່ອຍົກສູງຄວາມສາມາດທັງດ້ານສິລະປະຍຸດ – ຍຸດທະວິທີ, ວິຊາສະເພາະໃຫ້ສູງຂຶ້ນ, ທັງປັບປຸງສະຕິການຈັດຕັ້ງລະບຽບວິໄນໃຫ້ເຂັ້ມງວດ.

ພ້ອມກັນນີ້, ກໍຕ້ອງເອົາໃຈໃສ່ປັບປຸງຊ່ວຍເຫຼືອກໍາລັງທ້ອງຖິ່ນຢູ່ຮາກຖານໃນການປັບປຸງບັນຊາ, ອົບຮົມຫັດແອບເພື່ອໃຫ້ເຂົາເຈົ້າສາມາດເຮັດລ້ອນໜ້າທີ່ປົກປັກຮັກສາທ້ອງຖິ່ນຂອງຕົນ. ພ້ອມນັ້ນ, ກໍຕ້ອງເອົາໃຈໃສ່ວຽກສຶກສາປ້ອງການຊາດໃຫ້ກວ້າງຂວາງ, ມີຄຸນນະພາບ ເພື່ອເປັນກໍາລັງສໍາຮອງກໍລະນີເກີດສະພາບ.

ຂໍ້ມູນຈາກ: Laoedaily