ແຂວງຄຳມ່ວນ ໄດ້ຮັບທຶນຊຸກຍູ້ການສຶກສາ 5 ຕື້ດົງ ຈາກແຂວງກາເມົາ ສສ ຫວຽດນາມ

362

ແຂວງກາເມົາ ສສ ຫວຽດນາມຈະໃຫ້ທຶນສະໜັບສະໜູນດ້ານການສຶກສາຢູ່ພາຍໃນແຂວງຄຳມ່ວນ ໃນມູນຄ່າ 5 ຕື້ດົງໂດຍຈະເລີ່ມແຕ່ປີ 2019 ຫາປີ 2023.

ໃນວັນທີ 22 ມີນາຜ່ານມາ ແຂວງຄຳມ່ວນ ແລະ ແຂວງກາເມົາ ສສ ຫວຽດນາມ ໄດ້ຈັດກອງປະຊຸມພົບປະລະຫວ່າງຄະນະຜູ້ແທນຂັ້ນສູງຂອງສອງແຂວງໂດຍການເຂົ້າຮ່ວມຂອງ ທ່ານ ສົມໃຈ ເພັດສີນວນ ຮອງເລຂາພັກແຂວງ ປະທານສະພາປະຊາຊົນແຂວງ, ທ່ານ ເຈີ່ນ ວັນ ຮ່ຽນ ກຳມະການປະຈຳພັກແຂວງ ປະທານສະພາປະຊາຊົນແຂວງ, ມີບັນດາພະແນກການ, ຕາງໜ້ານັກທຸລະກິດຈາກພາກສ່ວນຕ່າງໆທີ່ກ່ຽວຂ້ອງຂອງ 2 ຝ່າຍເຂົ້າຮ່ວມ.

ທ່ານ ສົມໃຈ ເພັດສີນວນ ໄດ້ລາຍງານສະພາບໂດຍລວມຂອງແຂວງຄຳມ່ວນ ໂດຍສະເພາະແມ່ນການພັດທະນາເສດຖະກິດຂອງແຂວງ ເຊິ່ງໄດ້ກຳນົດເອົາ 3 ທ່າແຮງ ເພື່ອເປັນພື້ນຖານໃນການພັດທະນາເສດຖະກິດ – ສັງຄົມ ຄື: ທ່າແຮງທາງດ້ານກະສິກຳ ແລະ ປ່າໄມ້, ທ່າແຮງທາງດ້ານພະລັງງານ ແລະ ບໍ່ແຮ່ ແລະ ດ້ານການບໍລິການເສັ້ນທາງຜ່ານ ແລະ ການທ່ອງທ່ຽວ. ດ້ານການພັດທະນາເສດຖະກິດຕາມແຜນການປີ 2018 ໄດ້ວາງຄາດໝາຍສູ້ຊົນໃຫ້ເສດຖະກິດຂະຫຍາຍຕົວ ໃນລະດັບ 8,01%, ລວມຍອດຜະລິດຕະພັນພາຍໃນ GDP ບັນລຸ 7.576 ຕື້ກີບ, ຜ່ານການຈັດຕັ້ງປະຕິບັດເສດຖະກິດເຕີບໂຕໃນລະດັບ 6,56%, ຫຼຸດຄາດໝາຍ 1,56%, ລວມຍອດຜະລິດຕະພັນພາຍໃນ ບັນລຸ 7.437 ຕື້ກີບ, ສະເລ່ຍໃສ່ຫົວຄົນໄດ້ 17,88 ລ້ານກີບຕໍ່ປີ ຫຼື ເທົ່າກັບ 2.121 ໂດລາສະຫະລັດ, ທຽບໃສ່ປີຜ່ານມາ ເພີ່ມຂຶ້ນ 21 ໂດລາສະຫະລັດ ( ປີ 2017 ໄດ້ 2.112 ໂດລາສະຫະລັດ ). ດ້ານການລົງທຶນຂອງເອກະຊົນພາຍໃນ ແລະ ຕ່າງປະເທດແມ່ນໄດ້ຊຸກຍູ້ ແລະ ດຶງດູດການລົງທຶນທັງພາຍໃນ ແລະ ຕ່າງປະເທດ ມີທັງໝົດ 63 ໂຄງການ, ມີທຶນທັງໝົດ 5.864,84 ຕື້ກີບ ເທົ່າກັບ 89,08% ຂອງແຜນການປີ. ການລົງທຶນສ່ວນໃຫຍ່ຂະແໜງການຂຸດຄົ້ນ ແລະ ປຸງແຕ່ງຫີນປູນ ແລະ ການບໍລິການອື່ນໆ.

????????????????????????????????????

ສໍາລັບແຂວງກາເມົາແມ່ນເປັນແຂວງໜຶ່ງທີ່ຕັ້ງຢູ່ພາກໃຕ້ສຸດຂອງ ສສ ຫວຽດນາມ ມີຊາຍແດນຕິດກັບຊາຍຝັ່ງທະເລ ທັງ3 ດ້ານ, ເປັນແຂວງທີ່ມີພື້ນຖານທາງດ້ານເສດຖະກິດດີພໍສົມຄວນໂດຍສະເພາະແມ່ນທາງດ້ານການທ່ອງທ່ຽວ,ການປະມົງທີ່ສາມາດສ້າງລາຍຮັບໃຫ້ກັບແຂວງເຊິ່ງຈຸດປະສົງຂອງການມາເຄື່ອນໄຫວຢ້ຽມຢາມ ແລະ ເຮັດວຽກຢູ່ແຂວງຄຳມ່ວນຂອງຄະນະຜູ້ແທນແຂວງກາເມົາໃນຄັ້ງນີ້ ແມ່ນມີ 3 ວຽກຕົ້ນຕໍ ຄື: ແລກປ່ຽນຂໍ້ມູນ – ຂ່າວສານດ້ານການພັດທະນາເສດຖະກິດ – ສັງຄົມ, ຕີລາຄາຄືນກ່ຽວກັບການຈັດຕັ້ງປະຕິບັດບົດບັນທຶກການຮ່ວມມືໃນໄລຍະຜ່ານມາແລະ ເຂົ້າອວຍພອນການນຳຂອງແຂວງຄຳມ່ວນ ເນື່ອງໃນໂອກາດປີໃໝ່ລາວທີ່ຈະມາເຖິງ.

ສ່ວນໝາກຜົນຂອງການຮ່ວມມືລະຫວ່າງແຂວງຄຳມ່ວນ ແລະ ແຂວງກາເມົາ ບົນຈິດໃຈມິດຕະພາບສາມັກຄີແບບພິເສດ ແລະ ການຮ່ວມມືຮອບດ້ານຂອງສອງພັກ, ສອງລັດ ແລະ ປະຊາຊົນສອງຊາດ ລາວ ແລະ ຫວຽດນາມ ເວົ້າລວມ, ເວົ້າສະເພາະສອງແຂວງຄຳມ່ວນ ແລະ ກາເມົາ ກໍໄດ້ມີບົດບັນທຶກກອງປະຊຸມພົບປະການນຳສອງແຂວງທີ່ໄດ້ລົງນາມກັນໃນວັນທີ 17 ພຶດສະພາ 2014 ທີ່ເມືອງທ່າແຂກ ແຂວງຄຳມ່ວນ ມີ 4 ເນື້ອໃນ ຄື: ການຮ່ວມມືດ້ານອຸດສາຫະກຳ, ການຮ່ວມມືດ້ານກະສິກຳ – ປ່າໄມ້, ການຮ່ວມມືດ້ານການທ່ອງທ່ຽວ ແລະ ການຮ່ວມມືດ້ານການປະມົງ ໄດ້ເຫັນວ່າທັງ 4 ດ້ານ ຍັງບໍ່ໄດ້ຈັດຕັ້ງປະຕິບັດ ແລະ ການນຳຂັ້ນສູງທັງສອງແຂວງ ກໍໄດ້ຜັດປ່ຽນກັນໄປຢ້ຽມຢາມ ແລະ ໃນປີ 2018 ທາງແຂວງກາເມົາ ສະໜັບສະໜູນທຶນການສຶກສາແກ່ແຂວງຄຳມ່ວນ ໃນມູນຄ່າ 5 ຕື້ດົງ, ປີລະ 1 ຕື້ດົງ, ກຳນົດເລີ່ມປີ 2019 – 2023 ໃນການສົ່ງນັກຮຽນ ຫຼືພະນັກງານໄປຮຽນທີ່ແຂວງກາເມົາ.