ຕະຫຼາດລາວອົດຊີ ຢືນຢັນຜະລິດຕະພັນໝູມີຄວາມປອດໄພ

591

ຕະຫຼາດຂາຍຍົກ – ຂາຍຍ່ອຍລາວອົດຊີ ເປີດເຜີຍກັບທີມຂ່າວເສດຖະກິດ – ການຄ້າ ວ່າ: ພາຍຫຼັງທີ່ກະແສພະຍາດອະຫິວາໝູອາຟຣິກກາ ລະບາດຢູ່ປະເທດຈີນ ແລະ ຫວຽດນາມ ນັ້ນພາກລັດກໍຄືຂະແໜງການກ່ຽວຂ້ອງກໍອອກແຈ້ງການ ຫ້າມນໍາເຂົ້າຜະລິດຕະພັນໝູ, ຊີ້ນໝູ. ນອກນັ້ນ, ທ່ານຮອງລັດຖະມົນຕີ ກະຊວງກະສິກໍາ ແລະ ປ່າໄມ້ ກໍຢືນຢັນວ່າພະຍາດດັ່ງກ່າວຍັງບໍ່ລະບາດໃນປະເທດເຮົາ ເພື່ອເປັນການສ້າງຄວາມໝັ້ນໃຈໃຫ້ຜູ້ບໍລິໂພກ ເຈົ້າຂອງຕະຫຼາດ ລາວອົດຊີ ກໍອອກມາຢືນຢັນວ່າຊີ້ນໝູທີ່ນໍາເຂົ້າມາຂາຍໃນຕະຫຼາດແມ່ນນໍາມາຈາກ 3ໂຮງງານຂ້າສັດ ຈາກນະຄອນຫຼວງວຽງຈັນ ມີໃບຢັ້ງຢືນຈາກສັດຕະວະແພດປະຈໍາໂຮງງານຢ່າງຖືກຕ້ອງ ແລະ ມີການກວດກາທຸກມື້.

ທ່ານ ນາງ ສຸດາໄລ ພັນທະມີໄຊ ຜູ້ຊ່ວຍຜູ້ບໍລິຫານຕະຫຼາດລາວອົດຊີ ໄດ້ກ່າວວ່າ: ການນໍາເຂົ້າຊີ້ນໝູມາຈໍາໜ່າຍໃນຕະຫຼາດຂາຍຍົກ – ຂາຍຍ່ອຍລາວອົດຊີ ໃນແຕ່ລະມື້ຈະມີທີມງານຈັດສັນຕະຫຼາດລົງກວດກາໃບຢັ້ງຢືນສັດຕະວະແພດຈາກໂຮງງານນັ້ນໆ ເຊິ່ງຊີ້ນໝູທີ່ນໍາມາຈໍາໜ່າຍໃນຕະຫຼາດລາວອົດຊີ ມີ 3ໂຮງງານ ຄື: ໂຮງານຂ້າສັດທັນສະໄໝດອນດູ່, ໂຮງງານຂ້າສັດໜອງດ້ວງ ແລະ ໂຮງງານຂ້າສັດ ປາກແຮດ ເມືອງນາຊາຍທອງ. ພາຍຫຼັງຊີ້ນໄດ້ເຂົ້າມາຮອດຕະຫຼາດແລ້ວກໍຍັງມີເຈົ້າໜ້າທີ່ຫ້ອງການອຸດສາຫະກຳ ແລະ ການຄ້າ, ເຈົ້າໜ້າທີ່ຫ້ອງການກະສິກໍາ ແລະ ປ່າໄມ້ ເມືອງສີໂຄດຕະບອງ ລົງມາກວດກາໃບຢັ້ງຢືນຈາກສັດຕະວະແພດປະຈໍາໂຮງງານຕື່ມອີກ ເຊິ່ງໃນຈຸດນີ້ກໍຢາກໃຫ້ພໍ່ແມ່ປະຊາຊົນຜູ້ບໍລິໂພກຊີ້ນໝູໃຫ້ມີຄວາມໝັ້ນໃຈໃນການຊື້ຊີ້ນເພື່ອນໍາໄປບໍລິໂພກ.

ທ່ານ ກອງຄໍາ ປັນຍາສິດ ຄະນະຈັດສັນຕະຫຼາດ ໄດ້ກ່າວວ່າ: ໃນການຢັ້ງຢືນຈາກສັດຕະວະແພດ ປະຈໍາໂຮງງານຂ້າສັດ ປາກແຮດ ເມືອງນາຊາຍທອງ ກໍຢາກສະເໜີໃຫ້ມີກາຈໍ້າຢ່າງຖືກຕ້ອງຄັກແນ່ ເພາະຜ່ານມາເຫັນວ່າມີແຕ່ລາຍເຊັນ ຕໍ່ບັນຫາດັ່ງກ່າວກໍສະເໜີໃຫ້ມີການປັບປຸງໃຫ້ມີກາຈໍ້າຢັ້ງຢືນ ເພື່ອສ້າງຄວາມໝັ້ນໃຈໃຫ້ກັບຜູ້ບໍລິໂພກ.

ນາງ ນ້ອຍໜຶ່ງໃນແມ່ຄ້າຂາຍໝູຢູ່ຕະຫຼາດລາວອົດຊີ ກ່າວວ່າ:ດຽວນີ້ເຫັນວ່າປະຊາຊົນບໍ່ຄ່ອຍນິຍົມຊື້ຊີ້ນໝູເພື່ອໄປປຸງແຕ່ງອາຫານສັງເກດໄດ້ຈາກຈໍານວນຂາຍຊີ້ນໝູຫຼຸດລົງ ຈາກ 5 ໂຕຕໍ່ມື້ໃນເມືອກ່ອນ ປັດຈຸບັນມີພຽງ 2 ໂຕຕໍ່ມື້.